ယခင်အစိုးရမကောင်းကြောင်း မပြောရန် မကွေးတိုင်း ကြံ့ခိုင်ရေးပါတီပြော
DVB
·
June 5, 2019
အရင်အစိုးရအပေါ် မကောင်းကြောင်းပြောဆို ဝေဖန်ပြစ်တင်တာတွေ မလုပ်ဖို့ လက်ရှိ မကွေးတိုင်းဒေသကြီးအစိုးရကို မကွေးတိုင်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ပြောကြားလိုက်ပါတယ်။
လက်ရှိအစိုးရအဖွဲ့အနေနဲ့ ပြီးခဲ့တဲ့ ၃ နှစ်တာဆောင်ရွက်ချက်တွေ သတင်းစာရှင်းလင်းပွဲမှာ အရင်အစိုးရအပေါ် ပြစ်တင်မှုတွေရှိနေတဲ့အတွက် ဇွန်လ ၄ ရက် မနက်က မကွေးတိုင်း ကြံ့ခိုင်ရေးပါတီက သတင်းစာရှင်းလင်းပြောကြားခဲ့တာပါ။
၅နှစ်တစ်ကြိမ် အစိုးရ အပြောင်းလဲရှိနေမှာဖြစ်ပြီး အရင်အစိုးရ မကောင်းကြောင်းကို ပြောနေမယ့်အစား မိမိရဲ့လုပ်ဆောင်ချက်ကိုပဲ အကောင်ဆုံးဖြစ်အောင် လုပ်ဆောင်စေ ချင်တယ် မကွေးတိုင်းကြံ့ခိုင်ရေးပါတီ ပြောရေးဆိုခွင့်ရှိသူ ဦးအောင်နိုင်လင်းက ပြောပါတယ်။
"မကွေးတိုင်းဒေသကြီး အစိုးရအဖွဲ့ သုံးနှစ်တာလုပ်ဆောင်ချက် သတင်းစာရှင်းလင်းပွဲမှာ လမ်းဖောက်တာတွေ၊ ဆေးခန်းဆောက်တာတွေ၊ စာသင်ကျောင်းဆောက်တာတွေ ယေဘုယျ အားဖြင့် ပြောသွားတယ်။ လမ်းဖောက်တာတွေကတော့ ကောင်းပါတယ်။ ကောင်းတဲ့ဟာတွေကို ကြိုဆိုပါတယ်။ သို့သော်လည်း လုပ်ဆောင်ချက်တွေပြောတဲ့ အခါမှာ အရင်လူဆိုတဲ့ စကားရပ်ကို ထည့်ပြောလေ့ရှိပါတယ်။”
ကြံ့ခိုင်ရေးပါတီအနေနဲ့ အတိုက်ခံပါတီဖြစ်ပေမယ့် အတိုက်ခံမလုပ်ဘဲ လက်ရှိအစိုးရရဲ့ လုပ်ဆောင်ချက်တွေကိုစောင့်ကြည့်တဲ့ အနေထားနဲ့ဘဲ ရပ်တည်ခဲ့ပြီး ပြည်သူထိခိုက်မှုများပြား လာပါက ပြည်သူ့ရှေ့ ကနေ အတိုက်ခံအဖြစ်ရပ်တည်သွားမယ်လို့လည်း ဆိုပါတယ်။
ဦးအောင်နိုင်လင်းက “စွမ်းအင်ဝန်ကြီးကိုယ်တိုင်ကလည်း ဆိုလာဓာတ်အားပေးစက်ရုံနဲ့ ပတ်သက်လို့ အရင်လူတွေ အမ်အိုယူ လက်မှတ်ထိုးခဲ့လို့ တယူနစ် ၁၉၀ ကျပ်ကျတယ်ဆိုတဲ့ စကားရပ်ကို ထည့်သုံးထားတယ်။ စာသင်ကျောင်းတွေ အဆင့်တိုးမြှင့်တဲ့နေရာမှာလည်း တိုးမြှင့်ကြောင်း ပြချင်ရုံနဲ့ ဆရာ ဆရာမလုံလောက်မှု မရှိဘူး။ ကျေးလက်လမ်းတွေ ငွေကုန်ခံပြီး အဆင့်မြှင့်တင် ပေးပေမယ့်လည်း ထုတ်ကုန်မရှိလို့ သစ်ခိုးထုတ်တာတွေ ပိုများလာတယ်။ လျှပ်စစ်မီးဆိုရင်လည်း အချိန်ပိုင်းနဲ့ ပေးနေတာ ယနေ့ထိဖြစ်တယ်။ စစ်အစိုးရလက်ထက်က အချိန်ပိုင်းနဲ့ပေးခဲ့ပေမယ့် ပြည်ခိုင်ဖြိုး အစိုးရလက်ထက်မှာ အချိန်ပြည့်ပေးခဲ့တယ်"လို့ သတင်းထောက်တွေကိုပြောပါတယ်။
မကွေးတိုင်း ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီအနေနဲ့ မကွေးတိုင်း အခြေစိုက် သတင်းထောက်တွေနဲ့ အခုလို တွေ့ဆုံတာ ဒုတိယကြိမ်မြောက်ဖြစ်ပါတယ်။
သတင်း-မင်းထီး