ခေါင်းစိုက်ပြီး ရှပ်တိုက်ဆင်းခဲ့ရသည့် လေယာဉ်ကို ပြေးလမ်းပေါ်က ဖယ်ရှား
DVB
·
May 13, 2019
မန္တလေးမြို့၊ တံတားဦး အပြည်ပြည်ဆိုင်ရာ လေဆိပ် ပြေးလမ်းပေါ်မှာ လေယာဉ်ရှေ့ဘီး ချမရလို့ ခေါင်းစိုက်ပြီး အရေးပေါ် ရှပ်တိုက်ဆင်းသက်ခဲ့ရတဲ့ မြန်မာ အမျိုးသားလေကြောင်းလိုင်း ခရီးသည်တင်လေယာဉ်ကို မနေ့ညပိုင်းက ဖယ်ရှားခဲ့ပါတယ်။
ပြေးလမ်းပေါ် လေယာဉ်ရှိနေတုန်းမှာ အကန့်အသတ်နဲ့ လေယာဉ်အသေးတွေကို ဆင်းခွင့်ပေးခဲ့ပြီး လေကြောင်းခရီးစဉ်တချို့ကို ရွှေ့ဆိုင်းတာတွေ လုပ်ခဲ့ရပါတယ်။
ဝန်ထမ်း ၇ ဦးနဲ့ ခရီးသည် ၈၂ ဦး လိုက်ပါလာပြီး ရန်ကုန်ကနေ ပျံသန်းလာတဲ့ မြန်မာ အမျိုးသားလေကြောင်းလိုင်းက Embraer-190, XY-AGQ လေယာဉ် ခရီးစဉ်အမှတ် ယူဘီ (၁၀၃)ဟာ မနေ့မနက်က မန္တလေးလေဆိပ်ကိုအဆင်း ရှေ့ဘီးချမရလို့ ဆီကုန်အောင် ပတ်မောင်းပြီးမှ နောက်ဘီးတွေနဲ့ မှေးပြီးမှ ဦးစိုက်ဆင်းသက်ခဲ့ရတာပါ။
ဒီလိုဆင်းသက်ရာမှာ လေယာဉ်ဝမ်းဗိုက်က ပွတ်တိုက်ပြီး မီးတောက်တွေဖြစ်ခဲ့ပေမယ့် အားလုံး ဘေးကင်းခဲ့ပါတယ်။ အဲဒီလေယာဉ်ပေါ်မှာ သရုပ်ဆောင် နေမင်း အပါအ၀င် တခြား သရုပ်ဆောင်တွေလည်း လိုက်ပါခဲ့ပြီး လေယာဉ်ကို ကျွမ်းကျွမ်းကျင်ကျင်နဲ့ ဆင်းသက်နိုင်တဲ့ လေယာဉ်မှူး ဦးမြတ်မိုးအောင်နဲ့ အဖွဲ့သားတွေ အားလုံးကို လူမှုကွန်ရက်စာမျက်နှာမှာ ချီးကျုးရေးသားထားပါတယ်။
ဒါ့အပြင် MNA လေကြောင်းလိုင်းကလည်း လေယာဉ်မှူးနဲ့ အဖွဲ့သား (၇)ယောက်စလုံးကို လေယာဉ်ကို အရေးပေါ်အခြေအနေမှာ ဆုံးဖြတ်ချက် မှန်မှန်နဲ့ ဘေးကင်းအောင်လုပ်နိုင်တဲ့ အတွက် ကျေးဇူးတင် ဂုဏ်ပြုတယ်ဆိုပြီး ထုတ်ပြန်ထားပါတယ်။