ဝါးတောင်စစ်ဘေးရှောင်စခန်းမှ ဒုက္ခသည်တဦး မိုင်းထိမှန်
DVB
·
May 9, 2019
ကျောက်တော်မြို့ ဝါးတောင်စစ်ဘေးရှောင်စခန်းမှ ဒုက္ခသည်တဦး မနေ့က မိုင်းထိမှန်ပြီး ဒဏ်ရာပြင်းထန်စွာ ရရှိခဲ့လို့ ကျောက်တော်ဆေးရုံကနေ စစ်တွေဆေးရုံ ပို့ဆောင်ခဲ့ရတယ်လို့ သိရပါတယ်။
ရခိုင်ပြည်နယ်၊ ကျောက်တော်မြို့၊ ဝါးတောင်စစ်ဘေးရှောင်ဒုက္ခသည်စခန်းမှ မြိုတိုင်းရင်းသားတဦးဖြစ်တဲ့ ဦးပန်းအောင်ချေဟာ မေလ ၈ ရက်နေ့ မနက်ပိုင်းက မိုးရာသီအတွက် တဲဆောင်ဖို့ မြို့ချောင်းအနီး တောထဲ ဝါးသွားခုတ်စဉ် မိုင်းထိမှန်ကာ ညာဘက်ခြေဖဝါး ဒဏ်ရာပြင်းထန်စွာရရှိခဲ့တာပါ။
ကျောက်တော်ဆေးရုံ ပို့ဆောင်ရာ ခြေထောက်ဖြတ်ရမှာ ဖြစ်တာကြောင့် စစ်ဆေးရုံ ယူဆောင်ဖို့ ဆရာဝန်ကညွှန်ကြားတဲ့အတွက် စစ်တွေ ပို့ဆောင်ခဲ့ရတယ်လို့ ဝါးတောင် စစ်ဘေးရှောင်စခန်းတာဝန်ခံ ဦးမောင်လှက ပြောပါတယ်။
"သူတို့က မူလ ခမောင်းကျေးရွာက ဖြစ်ပါတယ်။ စစ်ဘေးရှောင်ဒုက္ခသည်တွေပါ။ မိုးရာသီအတွက် တဲဆောက်ဖို့ ကြိုတင်ပြီး ၀ါးတွေခုတ်နေကြတာပါ။ သူတို့သွားတာက လူအများကြီးပါ။ တယောက်တနေရာဝါးခုတ်ကြတယ်၊ ဝါးခုတ်ပြီး သစ်သီးတွေရှာကြတယ်။ ပိန္နဲသီးတို့၊ သရက်သီးတို့ပေါ့။ အသီးတွေကို ဝါးတောင်ကျေးရွာမှာ ရောင်းချတယ်၊ ဒီလိုအသက်မွေးနေကြတာပါ။ အပြန်မှာ ထောင်မိုင်း နှင်းမိတာပါ။ ဒဏ်ရာပြင်းထန်တဲ့အတွက် ကျောက်တော်ဆေးရုံက ခြေထောက်ဖြတ်ရမယ် ပြောလို့ စစ်တွေကို ပို့ဆောင်ထားပါတယ်။"
ဝါးတောင် စစ်ဘေးဒုက္ခသည်စခန်းမှာ တပ်မတော်နဲ့ အေအေ တိုက်ပွဲတွေကြောင့် ထွက်ပြေးလာတဲ့ အိမ်ထောင်စု ၂၃၄ စု၊ လူဦးရေ ၁၂၂၁ ဦး ခိုလှုံနေကြတယ်လို့ သိရပါတယ်။
ဗညား
