ဆီဆိုင်မြို့တွင် မြေသိမ်းဆည်းခံမြေပြန်ရရှိရေး တောင်သူများဆန္ဒပြတောင်းဆို
DVB
·
May 1, 2019
ပအိုဝ်းကိုယ်ပိုင်အိုပ်ချုပ်ခွင့်ရဒေသ ဆီဆိုင်မြို့နယ်မှာ တပ်မတော် ခမရ ၄၂၃နဲ့ ခမရ ၄၂၄ တပ်ရင်းတွေက သိမ်းဆည်းထားတဲ့ လယ်မြေတွေ ပြန်ရရှိဖို့ မေ ၁ ရက်နေ့ အလုပ်သမားနေ့မှာ လမ်းလျှောက်ဆန္ဒပြ တောင်းဆိုကြပါတယ်။
စိုက်ပျိုးရာသီရောက်တော့မှာ ဖြစ်လို့ မြေယာပြန်ရရှိရေးအတွက် တောင်သူ အင်အား ၃၀၀ ကျော်က ဆန္ဒပြကြတာပါ။
မြေသိမ်းခံတောင်သူ ဦးကြည်ဟန်က “ကျနော်တို့က မြေနဲ့ အသက်မွေးဝမ်းကြောင်းပြုနေတာမြေမရှိရင်အသက်မရှင်နိုင်ဘူး၊ ဘိုးဘွားလက်ထက် ကတည်းက လုပ်လာခဲ့တာ၊ ဒီနှစ် သူတို့ပေးမလုပ်ဘူးဆိုရင် ဒုက္ခရောက်ကုန်မှာ၊ အဲ့ဒါကြောင့် လူကြီးတွေလာရောက် စစ်ဆေးစေချင်တဲ့အတွက် ဆန္ဒပြတောင်း ဆိုတာပါ” လို့ ပြောပါတယ်။
အဲဒီမြေဟာ ၁၉၉၁ ခုနှစ်ကတည်းက သိမ်းဆည်းထားတာဖြစ်ပြီး တောင်သူတွေက သီးစားချ လုပ်ကိုင်ခဲ့ကြပြီး ၂၀၁၀ နောက်ပိုင်း သီးစားချမပေးရဘဲလုပ်ကိုင်လို့ရပေမယ့် ဒီနှစ်မှာ လုပ်ကိုင်လို့မရတော့ဘူးဆိုတဲ့အတွက် ဆန္ဒပြတောင်းဆို တာဖြစ်ပါတယ်။
ပအိုဝ်းတောင်သူလယ်သမားသမဂ္ဂအဖွဲ့ဝင် ခွန်ကျော်ဆွေက “ဒီမြေထဲစိုက်ပြီး ထွက်လာတဲ့ စိုက်ပျိုးသီးနှံတွေကို ကျန်းမာရေး ပညာရေး စားဝတ်နေရေး တွေဖြေရှင်းပေးနေတာ။ သူတို့ ပြန်မစွန့်လွှတ်ဘူးဆိုရင် တောင်သူတွေ အနာဂတ် မဲ့သွားတာပေါ့” လို့ ပြောပါတယ်။
တောင်ကြီး-လွိုင်ကော် ပြည်ထောင်စုလမ်းမ အနောက်ဘက်က သိမ်းဆည်းခံရတဲ့ မြေဧက ၁၉၀၀ အပြင် လမ်းမအရှေ့ဘက်ဧက ၅၀၀ ရှိတောင်သူတွေကလည်း မြေပြန်ရရှိရေး အဆင့်ဆင့် စာတင်ထား ပေမယ့်လည်း ထူးခြားမှုမရှိတဲ့အတွက် ဆန္ဒပြရတာလို့ တောင်သူတွေက ဆိုပါတယ်။
ဆန္ဒပြပွဲမှာ ဆီဆိုင်မြို့နယ် အတွင်း ဟိုခဲရပ်ကွက်(နောင်လုံ)၊ မြကန်သာရပ်ကွက်၊ သီရိရပ်ကွက်၊ အောင်ချမ်းသာရပ်ကွက်၊ ကောင်းမူဗွာရွာ၊ ထီမန်းရွာ၊ ကောင်တောင်ရိုးရွာ စတဲ့ သိမ်းဆည်းခံ တောင်သူတွေ ပါဝင်ခဲ့ကြပါတယ်။
သတင်း- ခွန်ရာဇာ
