ရက်ပိုင်းအတွင်း မိုးရွာ၍ အပူချိန်လျော့လာနိုင်ဟု မိုးဇလခန့်မှန်း
ပိုင်စိုး
·
April 22, 2019
လက်ရှိမြန်မာနိုင်ငံ တ၀န်းမှာ အပူချိန်တွေ စံချိန်တင်မြင့်တက်နေပေမယ့် မကြာခင်ရက်ပိုင်းမှာ မိုးရွာနိုင်တာကြောင့် အပူချိန်လျော့လာနိုင်တယ်လို့ မိုးလေဝသနဲ့ ဇလဗေဒ ညွှန်ကြားရေးမှူးချုပ်က ခန့်မှန်း ပြောပါတယ်။
လက်ရှိမှာတော့ ချောက်မြို့မှာ အပူချိန် ၄၆ ဒီဂရီစင်တီဂရိတ်အထိ ရှိနေပြီး နေ့အပူချိန်တွေကတော့ စစ်ကိုင်းတိုင်း (အောက်ပိုင်း)၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ချင်းပြည်နယ်၊ ရှမ်းပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်နဲ့ ရခိုင်ပြည်နယ်တို့မှာ ဧပြီလရဲ့ ပျမ်းမျှအပူချိန်ထက် ၁.၅ ဒီဂရီစင်တီဂရိတ် ပိုနေနိုင်တယ်လို့ မိုးဇလက ထုတ်ပြန်ထား ပါတယ်။
မိုးဇလဌာန ညွှန်ကြားရေးမှူးချုပ် ဒေါက်တာကျော်မိုးဦးက “လာမယ့် တရက် ၂ ရက်အတွင်းမှာ အရှေ့ဘက်က လာတဲ့ တိမ်တိုက်တွေကြောင့် မိုးရွာရင် အပူချိန်တွေ ပြန်ပြီးတော့ ကျလာနိုင်ပါတယ်။ အဓိက ကတော့ မိုးရွာတဲ့ ဒေသတွေမှာပေါ့။ တနိုင်ငံလုံးမှာလည်း နည်းနည်းတော့ လျော့နိုင်ပါတယ်” လို့ ပြောပါတယ်။
ဒီနေ့ညနေအထိ ခန့်မှန်းချက်အနေနဲ့ စစ်ကိုင်းတိုင်း၊ မန္တလေးတိုင်း၊ ပဲခူးတိုင်း၊ တနင်္သာရီတိုင်း၊ ကချင်ပြည်နယ်၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်နဲ့ ကယားပြည်နယ် တို့မှာ နေရာကွက်ကျား မိုးနည်းနည်းရွာနိုင်တယ်လို့လည်း မိုးဇလက ထုတ်ပြန်ထားပါတယ်။
မိုးရွာလို့ အပူချိန်လျော့နိုင်ပေမယ့် ဧပြီလရဲ့ ပျမ်းမျှအပူချိန်ထက်တော့ ပိုနေနိုင်သေး တယ်လို့လည်း ဒေါက်တာကျော်မိုးဦးက ပြောပါတယ်။
ဧပြီ တတိယ ၁၀ ရက်ပတ်ထဲမှာ ဘင်္ဂလားပင်လယ်အော်တောင်ပိုင်းမှာ လေဖိအားနည်းရပ်ဝန်း တ ကြိမ် ဖြစ်ပေါ်နိုင်ပြီး စစ်ကိုင်းတိုင်းအထက်ပိုင်း၊ တနင်္သာရီတိုင်းနဲ့ ကချင်ပြည်နယ်တို့မှာ ၄ ရက်ကနေ ၆ ရက်လောက်၊ စစ်ကိုင်းတိုင်းအောက်ပိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ချင်း၊ ရှမ်း၊ ကယား၊ ကရင်၊ မွန်နဲ့ ရခိုင်ပြည်နယ်တို့မှာ ၁ ရက်ကနေ ၃ ရက်လောက် အထိ ရွာနိုင်တယ်လို့ မိုးဇလက ခန့်မှန်းထားပါတယ်။