နိုင်ငံတကာကရာတေးပြိုင်ပွဲတွင် ကချင်ကလေးငယ် ၃ ဦး ချန်ပီယံဆုရရှိ

ဂျပန်နိုင်ငံ တိုကျိုမြို့မှာ ကျင်းပခဲ့တဲ့ နိုင်ငံတကာချစ်ကြည်ရေး ကရာတေးပြိုင်ပွဲမှာ ကချင်ပြည်နယ် စစ်ရှောင်စခန်းက ကလေးတယောက်အပါအဝင် ကချင်ကလေး ၃ ယောက် ချန်ပီယံဆု ရခဲ့ပါတယ်။ မြန်မာနိုင်ငံကိုယ်စားပြုပြီး ၇ ယောက် သွားရောက်ယှဉ်ပြိုင်ရာမှာ ကချင်ကစားသမား ဂျာလ၊ ဆိုင်းလတ်အောင်နဲ့ မဆန်မိုင်နူး တို့ ရရှိခဲ့ကြတာဖြစ်ပါတယ်။ “စစ်ရှောင်စခန်းက ၂ ယောက် ပါတယ်။ အဲဒီမှာ ဆုရတာက ဂျာလ တယောက် ရပါတယ်။ မြစ်ကြီးနားက စုစုပေါင်း ၅ ယောက်၊ ရန်ကုန်က ၂ ယောက် သွားတာပါ” လို့ နည်းပြ ဖြစ်တဲ့ ကိုယိန်းဘောမ်က ပြောပါတယ်။ ဂျာလဟာ မြစ်ကြီးနားမြို့ ဒူကထောင် စစ်ရှောင်စခန်းက ဖြစ်ပြီး ဆိုင်းလတ်အောင်နဲ့ မဆန်မိုင်နူးတို့ကတော့ အမြွှာမောင်နှမ ဖြစ်ပါတယ်။ ဒီပြိုင်ပွဲကို ဧပြီလ ၂၀ နဲ့ ၂၁ ရက်က ကျင်းပပြုလုပ်ခဲ့တာဖြစ်ပြီး နိုင်ငံပေါင်းစုံက ဝင်ရောက် ယှဉ်ပြိုင်ခဲ့တာပါ။ အခုလိုအနိုင်ရရှိတဲ့အတွက် နောက်ဆုံးအဆင့်ဖြစ်တဲ့ တိုကိုမြို့မှာ ထပ်ကျင်းပမယ့် ကမ္ဘာ့အဆင့်ပြိုင်ပွဲကို တက်လှမ်းနိုင်ခဲ့ပြီး နိုဝင်ဘာလမှာ လာရောက်ယှဉ်ပြိုင်ခွင့်ရသွားပြီလို့ မြန်မာနိုင်ငံလုံးဆိုင်ရာ Kyokushin Karate တာဝန်ခံ ဦးမင်လွင်က ဒီဗွီဘီကို ပြောပါတယ်။ ပိုင်စိုး၊ ဇော်ဇော်လှိုင်

More News
Up