အပူလျှပ်ရောဂါ (Heat Stroke) ကြောင့် ပဲခူးပြည်သူ့ဆေးရုံမှာ အရေးပေါ်လူနာ ၂ ဦး ရောက်ရှိလာပြီး ၁ ဦး သေဆုံးသွားတယ်လို့ သိရပါတယ်။ မြန်မာနိုင်ငံတ၀န်းလုံးမှာ အပူချိန်မြင့်မားမှုကြောင့် ကျန်းမာရေးဌာနတွေကနေ ကျန်းမာရေး သတိပေးမှုတွေလည်း ပြုလုပ်နေပြီး ပဲခူးမြို့မှာ ဧပြီလအတွင်း အပူချိန် ၄၀ ဒီဂရီ စင်တီဂရိတ်ခန့်အထိ မြင့်တက်လာနေတာပါ။ Heat Stroke လို့ခေါ်တဲ့ အပူလျှပ်ရောဂါကြောင့် ဧပြီ ၂၀ ရက်နေ့က ပဲခူးဆေးရုံကို လူနာ ၂ ဦး ရောက်ရှိလာပြီး ၁ ဦးသေဆုံးသွားတာပါ။ Heat Stroke ဖြစ်လာရင် သတိလစ်တာ၊ တက်တာတို့ ဖြစ်နိုင်ပြီး ဆေးရုံဆေးခန်းတို့ကို ခေါ်လာပေးဖို့ လိုအပ်တယ်လို့ ဆေးရုံအုပ်ကြီး ဒေါက်တာ ရန်နိုင်မောင်က ပြောပါတယ်။ “ဒီရောဂါ လက္ခဏာ နဲ့ သူတွေက အရိပ်မရတဲ့နေရာ နေပူတွေထဲမှာ ဒီလိုမျိုးတွေ များသောအားဖြင့် ဖြစ်တယ်။ အရမ်းပင်ပင်ပန်းပန်း လုပ်ရတဲ့သူတွေ လမ်းလုပ်သားတွေ၊ ဒါမျိုးတွေဆိုလည်း ဖြစ်တတ်တယ်။ ကလေးတွေဆိုလည်း နေပူထဲမှာ သွားပြီးဆော့တယ်၊ ဒါဆိုသူတို့ကို အရိပ်ထဲမှာ ခေါ်ထားရမယ်။ လေပန်ကာတို့ ဘာတို့နဲ့ မှုတ်ထားလို့ရတယ်။ လူနာရဲ့ အခြေအနေက ပိုဆိုးလာရင် အဖျားတွေ အရမ်းကြီးလာတယ် မကျဘူးဆိုရင်တော့ ဆေးရုံတို့ ဆေးပေးခန်းတို့ကို ခေါ်လာပါ။ နောက်ပြီး အဲလိုမျိုးတွေ ဖြစ်လို့ရှိရင် လူနရဲ့  အ၀တ်အစားတွေကို ချွတ်ပေးလို့ရတယ်၊ ရေပတ်တိုက်ပေးလို့ ရတယ်၊ ဓာတ်ဆားရေလည်း တိုက်ပေးစေခြင်တယ်၊ ဒါမှ ခန္ဓာကိုယ်ရဲ့ အပူချိန်က ကျသွားမှာ ဖြစ်တယ်။ လူနာ အပူချိန်တွေ အရမ်းများလာရင်၊ ဂယောင်ချောက်ချားဖြစ်လာရင်၊ ပြီးတော့ စိတ်ရှုပ်ထွေးတဲ့လက္ခဏာဖြစ်လာရင် သတိလစ်တာတို့ တက်တာတို့ ဖြစ်လာရင် ဆေးရုံဆေးခန်းတွေကို ခေါ်လာပေးပါ။” အခုတလော ပဲခူးဆေးရုံရဲ့ ဖျားနာဆောင်မှာ နေ့စဉ်နဲ့အမျှ ဖျားနာသူတွေ များနေတဲ့အတွက် နေရာထိုင်ခင်း အခက်ခဲတွေ ဖြစ်နေပါတယ်။ အောင်စိုးမိုး