အိုင်ဗရီကို့စ်မှာ ဖျက်ဆီးခံရတဲ့ မြန်မာ့ဆန်ကိစ္စနဲ့ ပတ်သက်ပြီး အစိုးရနဲ့ ပူးပေါင်းဖြေရှင်းသွားမယ်လို့ ဆန်တင်ပို့ခဲ့တဲ့ ကုမ္ပဏီတာဝန်ရှိသူတယောက်က ပြောပါတယ်။ ပြီးခဲ့တဲ့ရက်ပိုင်းက အိုင်ဗရီကို့စ်နိုင်ငံမှာ အရည်အသွေးမမီလို့ဆိုပြီး မြန်မာနိုင်ငံက ဆန်တန်ချိန် ၁၈၀၀၀ ကို ဖျက်ဆီးပစ်ခဲ့ပါတယ်။ အာဖရိကတိုက်က ဂီနီနိုင်ငံမှာ ရောင်းဖို့အတွက် စင်ကာပူကုမ္ပဏီ Olam International Co. Ltd ကို ရွှေဝါရောင်ကုမ္ပဏီက မက်ထရစ် တန် ၁၃၅၀၀၊ MEC က မက်ထရစ်တန် ၈၀၀၀ နဲ့ ဧရာဟင်္သာကုမ္ပဏီက မက်ထရစ်တန် ၅၀၀ ရောင်းချခဲ့တယ်လို့ စီးပွားရေးနဲ့ ကူးသန်းရောင်းဝယ်ရေး ဒု ဝန်ကြီး ဦးအောင်ထူးက သူ့ရဲ့ လူမှုကွန်ရက်မှာ ရေးသားထားပါတယ်။ ဧရာဟင်္သာ ကုမ္ပဏီဒါရိုက်တာ ဦးအာယုက “စင်ကာပူ Trader (ကုန်သည်) က ကျနော်တို့ဆီက ဝယ်သွားတယ်။ ရောင်းတယ်၊ သယ်တယ် ပြုတယ်ပေါ့ဗျာ။ လမ်းမှာ ဖြစ်တဲ့ ပြဿနာက ကျနော်တို့လည်း မသိရသေးဘူး။ အခု သတင်းတွေဖတ်ပြီး သိပြီးတော့ စီးပွားကူးသန်းတို့၊ ဆန်စပါးအသင်းချုပ်တို့နဲ့ ဆက်သွယ်နေတယ်ခင်ဗျ။ သူတို့နဲ့ ပူးပေါင်းပြီး ဆောင်ရွက်မှာပါ။ ကုန်သည်နဲ့လည်း အဆက်အသွယ်မရဘူး။ သူတို့ဆီက အကျိုးအကြောင်းကို ကျနော်တို့လည်း သိချင်နေတယ်” လာမယ့် တနင်္လာနဲ့ အင်္ဂါလောက်မှာ ဒီကိစ္စကို အစည်းအဝေးလုပ်ဖို့ ရှိတယ်လို့လည်း ပြောပါတယ်။ စီးပွားရေးနဲ့ ကူးသန်းရောင်းဝယ်ရေး ဒု ဝန်ကြီး ဦးအောင်ထူးက ဒီသင်္ဘောဟာ မြန်မာနိုင်ငံက ဆန်တန်ချိန် ၂၂၀၀၀ ကို တင်ဆောင်ခဲ့ပြီး ရန်ကုန်ကနေ ၂၀၁၈ အောက်တိုဘာ ၁၅ ရက်မှာ ထွက်ခွာသွားတယ်လို့ ဆိုပါတယ်။ ၂၀၁၈ ဒီဇင်ဘာမှာ ဂီနီနိုင်ငံကိုရောက်ပြီး ဆန်တွေချနေတုန်း ဆန်အလေးချိန်မပြည့်တဲ့ ပြဿနာပေါ်ခဲ့သေးသလို တခြားနိုင်ငံတွေမှာ ရောင်းမရတော့တဲ့အခါ မြန်မာနိုင်ငံကို ပြန်သယ်ဖို့ အတွက် ကုမ္ပဏီက လာပြောလို့ လက်ခံခဲ့ပေမယ့် သင်္ဘောက ပြန်ရောက်မလာခဲ့ဘူးလို့လည်း ဆိုပါတယ်။ ဦးအာယုက “ဒီတစီးနောက်ပိုင်းမှာ ၁၀ စီးမက ကျနော်တို့ နိုင်ငံခြားကို တင်ထားပြီးပြီ။ အဲဒီအစီးတွေမှာ ဘာမှမဖြစ်ဘဲ ဒီတစီးမှာ ဖြစ်တယ်ဆိုတာတော့ လမ်းခရီးကြောင့်လား၊ သင်္ဘောကြောင့်လား၊ အချိန်ကြာလို့ ဖြစ်တာလား ဆိုတာ ဂဃနဏ မသိရဘူးဗျ။ တင်ခဲ့တိုင်း တင်ခဲ့တိုင်းမှာ နိုင်ငံတကာ သတ်မှတ်ထားတဲ့ စံချိန်စံညွန်းအတိုင်းပဲ ကျနော်တို့ တင်တယ်။” ဌာနဆိုင်ရာနဲ့ အဖွဲ့အစည်းတွေရဲ့ စာရွက်စာတမ်း လုံလုံလောက်လောက်လည်း ပေးခဲ့ပြီး ဖြစ်တယ်လို့ သူက ပြောပါတယ်။ အလေးချိန်လျော့တယ်ဆိုတာနဲ့ပတ်သက်ပြီးတော့ သူက “စားသောက်ကုန် ပစ္စည်းဆိုတော့ ကြာလာရင် ဝိတ်က လျော့တတ်တာပဲလေ။ ဒါနဲ့ပတ်သက်ပြီးတော့ မှတ်ချက်တော့ မပေးလိုဘူး။ ဒါပေမယ့် ကျနော်တို့ မျက်စိအောက်မှာတော့ မဟုတ်ဘူးဗျာ” လို့ ပြောပါတယ်။ ရောင်းချခဲ့တဲ့ ဆန်တွေဟာ ဧည့်မထ ၂၅ မတ် ဆန်တွေ ဖြစ်ပါတယ်။ အိုင်ဗရီကို့စ်နိုင်ငံမှာ မြန်မာ့ဆန်တွေ ဖျက်ဆီးခံရတဲ့ ကိစ္စရပ်နဲ့ စပ်လျဉ်းပြီး မြန်မာနိုင်ငံ ဆန်စပါးအသင်းချုပ်က စိစစ်လေ့လာတွေ့ရှိချက်တွေ၊ ဖြစ်စဉ်အကြောင်းတရားတွေအပေါ် ဧပြီ ၂၂ ရက်နေ့ ကုန်သည်စက်မှုအသင်းချုပ်မှာ သတင်းမီဒီယာတွေနဲ့တွေ့ဆုံပြီး သတင်းစာရှင်းလင်းပွဲပြုလုပ်သွားမယ်လို့ သိရပါတယ်။