ပေါက်တွင် လေပြင်းတိုက်ခိုက်၊ အိမ်ခြေ ၁၀၀ ကျော် ပျက်စီး
DVB
·
April 18, 2019
မကွေးတိုင်း ပေါက်မြို့နယ်မှာ ဧပြီ ၁၇ ရက်နေ့ ညနေ ၅ နာရီကျော်အချိန်က လေပြင်းတိုက်ခိုက်ခဲ့တာကြောင့် ကျေးရွာ ၁၁ ရွာမှ ဘုန်းကြီးကျောင်း၊ စာသင်ကျောင်းအပါအ၀င် နေအိမ် အဆောက်အဦ ၁၁၈ လုံး ပျက်စီးဆုံးရှုံးခဲ့တယ်လို့ ပေါက်မြို့နယ် အထွေထွေအုပ်ချုပ်ရေး ဦးစီးဌာနက သိရပါတယ်။
ကျေးရွာ ၁၁ ရှိ လူနေအိမ် ၄ လုံး ပြိုကျတာ၊ စာသင်ကျောင်းဝန်းရှိ ပင်မ စာသင်ဆောင် နဲ့ ဆရာမတွေ နေအိမ် ၆ လုံး အမိုးလန်ပျက်စီးပြီး ဘုန်းကြီးကျောင်း ၄ ကျောင်း အမိုးလန်ပျက်စီးတာ နဲ့ လူနေအိမ်အဆောက်ဦ ၉၉ လုံး သွပ်မိုး၊ ထရံကာတွေ ပျက်စီးဆုံးရှုံးခဲ့တာပါ။
လေပြင်းတိုက်ခတ်မှုကြောင့် မြို့နယ်အတွင်းရှိ လင်တောင်၊ မျှားပိုင်၊ ခင်အေး၊ လေးပင်အိုင့်၊ မြေနီ(မ)၊ ပေါက်ချောင်း(ထ)စု၊ ခင်တန်းရှည်၊ သရက်တော၊ ဆပန်၊ မိုးကောင်း၊ ရွှေဘုံသာ၊ ပင်လောင်၊ ကျောက်တံခါး၊ ရွှေဘုံသာ စတဲ့ကျေးရွာတွေနဲ့ ကျောက်မဲတောင် တောတဲတိုက်တွေက အဆောက်အဦတွေ ပျက်စီးဆုံးရှုံးခဲ့တာဖြစ်ပြီး ဆုံးရှုံးမှုခန့်မှန်းတန်ဖိုးငွေ ကျပ်သိန်း ၁၁၀ လောက် ရှိတယ်လို့ သိရပါတယ်။
လွှတ်တော်ကိုယ်စားလှယ်တွေနဲ့ ပေါက်မြို့နယ် အထွေထွေအုပ်ချုပ်ရေးဦးစီးဌာန တာဝန်ရှိသူတွေ ဦးဆောင်ပြီး ကယ်ဆယ်ရေးလုပ်ငန်းများ ဆောင်ရွက်နေတယ်လို့သိရပါတယ်။
ကိုလင်း(ချောက်)