ငွေစက္ကူအတုအမှုဖြင့် တရားစွဲခံရသည့် နော်သောသွဲ့ထူး အပြစ်မရှိကြောင်း တရားရုံးဆုံးဖြတ်
DVB
·
April 18, 2019
ပဲခူးတိုင်းဒေသကြီး ဒိုက်ဦးမြို့နယ်မှာ ၁၀၀၀၀ တန် ငွေစက္ကူအတု ကိုင်ဆောင်မှုနဲ့ တရားစွဲခံထားရတဲ့ နော်သောသွဲ့ထူးကို အပြစ်မရှိကြောင်း တရားရုံးက ဆုံးဖြတ်ချက် ချလိုက်တယ်လို့ အမှုမှာ လိုက်ပါဆောင်ရွက်ပေးနေတဲ့ အကျိုးဆောင်ရှေ့နေက ပြောပါတယ်။
ဧပြီ ၁၈ ရက်နေ့ နေ့လယ်က နော်သောသွဲ့ထူး အမှုအတွက် ရုံးထုတ်စစ်ဆေးခဲ့တာဖြစ်ပြီး အကျိုးဆောင်ရှေ့နေ စောထူးသာစောက “ရာဇဝတ်ကျင့်ထုံးဥပဒေပုဒ်မ ၂၅၃ (၁) အရ ကလေးမလေးမှာ အပြစ်မရှိကြောင်း ပေါ်လွင်တဲ့အတွက် စွဲချက်မတင်မီ အမှုမှ အပြီးပြတ် လွှတ်လိုက်တယ်” လို့ ဒီဗွီဘီကို ပြောပါတယ်။
ဒိုက်ဦးမြို့နယ်၊ လယ်ကြားမြောင်ရွာနေ နော်သောသွဲ့ထူးဟာ စင်ကာပူနိုင်ငံမှာ အိမ်အကူအလုပ် သွားရောက်အလုပ်လုပ်ခဲ့ပြီး မြန်မာနိုင်ငံ ပြန်ဖို့အတွက် လုပ်အားခတွေကို အိမ်ရှင် အမျိုးသမီးက စင်ကာပူက ငွေလဲကောင်တာတခုမှာ မြန်မာငွေ သိန်း ၃၀ လောက် လဲလှယ်ပေးခဲ့ပါတယ်။
နော်သော့သွဲ့ထူး အသက် ၂၅ နှစ် မြန်မာနိုင်ငံ ပြန်ရောက်ပြီးနောက် အဲဒီကရလာတဲ့ ကျပ် ၁၀၀၀၀ တန် ငွေစက္ကူတွေဟာ အတုဖြစ်နေကြာင်း သိရှိပြီးနောက် အာဏာပိုင်တွေထံ သွားရောက်အပ်နှံရာမှ ပြီးခဲ့တဲ့ ဒီဇင်ဘာ ၆ ရက်က ဖမ်းဆီးခံခဲ့ရတာပါ။
ဒိုက်ဦးမြို့မရဲစခန်းက သူ့ကို မြန်မာနိုင်ငံတော်ဗဟိုဘဏ် ဥပဒေပုဒ်မ ၁၀၅/၁၀၆ နဲ့ တရားစွဲဆိုထားတာဖြစ်ပြီး ၂၀၁၉ ဇန်န၀ါရီ ၃ ရက်နေ့ ပထမဆုံး ရုံးချိန်းမှာ အာမခံရရှိခဲ့တာလည်း ဖြစ်ပါတယ်။
ပုဒ်မ ၁၀၅ ဟာ ထောင်ဒဏ် ၃ နှစ်နဲ့ ငွေဒဏ်၊ ပုဒ်မ ၁၀၆ ဟာ ထောင်ဒဏ် အနည်းဆုံး ၁၀ နှစ်ကနေ နှစ်၂၀ ထိ ချမှတ်နိုင်တယ်လို့ ၂၀၁၃ ဗဟိုဘဏ်ဥပဒေမှာ ပြဋ္ဌာန်းထားပါတယ်။
သတင်း၊ ဓာတ်ပုံ – နေလင်းထိုက်
