ရဲလုံခြုံရေး မိသားစုဝင် ၇ ဦးကို အေအေဖမ်းဆီး၊ မသင်္ကာဖွယ် ၂၃ ဦးကို တပ်မတော်ဖမ်းဆီး
DVB
·
April 11, 2019
ရခိုင်ပြည်နယ်၊ မြောက်ဦးမြို့ရှိ အမှတ် (၃၁) လုံခြုံရေးရဲတပ်ဖွဲ့ဌာနချုပ် အိမ်ထောင်သည် လိုင်းခန်းရှိ ရဲလုံခြုံရေးတပ်ဖွဲ့ဝင်တွေရဲ့ မိသားစုဝင် ၇ ဦးကို ရက္ခိုင့်တပ်မတော် (အေအေ) က ဖမ်းဆီးသွားတယ်လို့ ရဲတပ်ဖွဲ့က သတင်းထုတ်ပါတယ်။
ဧပြီ ၉ ရက် ည ၁၀ နာရီခွဲလောက်က အေအေအဖွဲ့ဝင် အင်အား ၂၀၀ လောက်က အမှတ် (၃၁) လုံခြုံရေးရဲတပ်ဖွဲ့ဌာနချုပ်ကို လက်နက်ကြီး၊ လက်နက်ငယ်တွေနဲ့ ဝင်ရောက်ပစ်ခတ် တိုက်ခိုက်ခဲ့ရာမှာ ရဲတပ်ဖွဲ့ဝင်တွေက ပြန်လည်ခုခံတိုက်ခိုက်ခဲ့လို့ ပင်မဌာနချုပ်ရဲ့ အရေးကြီး နေရာတွေ ကျဆုံးမှုမရှိဘဲ အိမ်ထောင်သည်လိုင်းခန်း အထိသာ ဝင်ရောက်နိုင်ခဲ့တယ်လို့ ဆိုပါတယ်။
အဆိုပါဖြစ်စဉ်မှာ ရဲတပ်ဖွဲ့ဝင် ၂ဦးကျဆုံးပြီး ၇ ဦးပျောက်ဆုံးကာ မိသားစုဝင် ဇနီးတဦးကို ပစ်ခတ်သတ်ခံခဲ့ရသလို လုံခြုံရေးရဲတပ်ဖွဲ့ဝင်တွေရဲ့ ဇနီး ၃ ဦး၊ မိခင် တဦး၊ ယောက်ျားလေး တဦးနဲ့ မိန်းကလေးငယ် ၂ ဦးတို့ကို အေအေတပ်ဖွဲ့က ဖမ်းဆီးခေါ်ဆောင်သွားခဲ့တယ်လို့ ရဲဇာနည် သတင်းမှာ ဖော်ပြပါတယ်။
အေအေတပ်ဖွဲ့တွေကို ရဲတပ်ရင်းဌာနချုပ်လုံခြုံရေးတပ်ဖွဲ့ဝင်တွေနဲ့ တပ်မတော် စစ်ကြောင်း တွေက လေကြောင်းနဲ့ လက်နက်ကြီးပစ်ကူရယူ ပြန်လည်တိုက်ခိုက်ရာမှာ အေအေ တပ်ဖွဲ့တွေဟာ မနက် ၅ နာရီခွဲလောက်မှာ ပြန်လည်ဆုတ်ခွာသွားခဲ့တယ်လို့ တပ်မတော် သတင်းမှန်ပြန်ကြားရေးအဖွဲ့ကလည်း သတင်းထုတ်ပြန်ပါတယ်။
ဆုတ်ခွာသွားတဲ့ အေအေတပ်ဖွဲ့တွေကို တပ်မတော် စစ်ကြောင်းတွေက လိုက်လံ တိုက်ခိုက်ရာမှာ မနေ့ မွန်းလွဲ ၁ နာရီလောက်က ရန်ကုန်-စစ်တွေပြည်ထောင်စု ကားလမ်းပေါ်ရှိ လက္ကာကျေးရွာအနီး အရပ်ဝတ် အေအေအဖွဲ့နဲ့ ၂ နာရီလောက်ကြာ ပစ်ခတ်မှုဖြစ်ခဲ့ပြီး အေအေ တပ်ဖွဲ့တွေက လက္ကာကျေးရွာထဲကို ထွက်ပြေးတိမ်းရှောင်သွားခဲ့တယ်လို့ ဆိုပါတယ်။
တပ်မတော်စစ်ကြောင်းက ရွာထဲ လိုက်လံရှင်းလင်းရာမှာ ရွာသားတွေနဲ့ ရောနှော တပ်ဖျောက်ထားတဲ့ ရွာခံမဟုတ်တဲ့ မသင်္ကာဖွယ်ရွာသား ၂၃ ဦးကို အရှင်ဖော်ထုတ် ဖမ်းဆီး ရမိခဲ့တဲ့အကြောင်းနဲ့ ဖမ်းမိထားသူတွေဟာ အေအေအဖွဲ့မှ သာထွန်းစံ ခေါင်းဆောင်တဲ့ အဖွဲ့ဝင် ၃၅ ဦး ပါအဖွဲ့က သိန်းထွန်းစိန်ပါ ၁၃ ဦး၊ စိစစ်ဆဲ ၁၀ ဦး၊ ပေါင်း ၂၃ ဦးဖြစ်ကြောင်း သိမ်းဆည်းရမိခဲ့တဲ့ ဖွဲ့စည်းပုံ စာရွက်စာတမ်းတွေအရ သိရှိရတယ်လို့ တပ်မတော် သတင်းမှန် ပြန်ကြားရေအဖွဲ့ရဲ့ ထုတ်ပြန်ချက်မှာ ဖော်ပြပါတယ်။
မြောက်ဦးပြည်နယ်လွှတ်တော်အမတ် ဦးထွန်းသာစိန်ကတော့ လက္ကာကျေးရွာမှာ ဖမ်းဆီး ခံရသူ ၂၇ ဦး ရှိပြီး အေအေ တပ်ဖွဲ့ဝင်တွေ မဟုတ်ဘဲ သာမှန်အရပ်သားပြည်သူတွေသာ ဖြစ်တယ်လို့ ဒီဗွီဘီကို ပြောပါတယ်။
"လက္ကာကျေးရွာက ၁၉ ဦးပါပါတယ်။ နောက် ကျေးရွာတွေက ၈ ဦးပါတယ်။ လက္ကာကျေးရွာက ၁၉ ဦးက သာမန်အရပ်သူ အရပ်သားတွေဆိုတာ မြောက်ဦး အမတ်တဦး အနေနဲ့ လေ့လာသိရှိရတယ်။ နောက်ကျေးရွာက လူတွေကိုတော့ မပြောတတ်ဘူး။ အိမ်လုပ်ဖို့ ရောက်နေကြတဲ့ လက်သမားအဖွဲ့တွေလို့ သိရတယ်။”
ဒီကိစ္စနဲ့ပတ်သက်ပြီး လက္ကာကျေးရွာ အုပ်ချုပ်ရေးမှူး အောင်သန့်မြင်က "မနေ့က ဖမ်းဆီး တဲ့ ပုံစံကတော့ အေအေအဖွဲ့က လက္ကာရွာကို ၀င်ပြေးသွားတယ်ဆိုပြီးတော့ လာရောက်စစ်ဆေး ပါတယ်။ ယောက်ျားတွေကို အင်္ကျီတွေချွတ်ခိုင်းပြီး ဒဏ်ရာတွေရှိမရှိစစ်ပါတယ်။ သူတို့က သာမန် အရပ်သားတွေဆိုတော့ ဘာဒဏ်ရာမှလည်းမရှိပါ။ အေအေ အဖွဲနဲ့လည်း ဆက်သွယ်မှုမရှိပါ။ ရွာက လူငယ်တွေမှာ ဘုရားရေပ္ပယ်ဖို့နဲ့ ပရဟိတလုပ်ငန်းတွေလုပ်ဖို့ ဖွဲ့စည်းထားတဲ့ စာရွက်ကို တွေ့တော့ အေအေကဖွဲ့စည်းထားတဲ့ အဖွဲ့ဆိုပြီး တပ်ကစွပ်စွဲပြောပါတယ်။ ကျနော်က ပြန်ပြောပါ တယ်။ ဒီစာရွက်က လူငယ်တွေ ပရဟိတရပ်ဝန်းနဲ့ သင်္ကြန်တွင်း ဘုရားရေပ္ပယ်ဖို့ ကောက်ယူထားတဲ့ စာရင်းသာဖြစ်တယ်။ ဒီကလေးတွေက ရိုးရိုးသားနေထိုင်နေကြတဲ့ သူတွေ ဖြစ်တယ်လို့ပြောပါတယ်။ သူတို့ အိမ်တွေကို လိုက်ပြီးရှာဖွေမယ်၊ သေနတ်တွေရှိနိုင်တယ်လို့ တပ်ကပြောပါတယ်။ ကျနော်က ပြန်ပြောပြပါတယ်။ နေအိမ်တွေကို စိတ်ကြိုက်ရှာ ဖွေနိုင်ပါ တယ်။ ရပ်မိရပ်ဖတွေနဲ့ လိုက်ကြည့် ပေးမယ်လို့ပြောပါတယ်။ သူတို့ကတော ရှာဖွေမူတွေ မလုပ်ခဲ့ပါဘူး။ အေအေနဲ့ ပတ်သတ်နေတယ်ဆိုတဲ့ အထောက်အထားဘာမှ မရပဲ ဖမ်းဆီးသွား တာသာ ဖြစ်ပါတယ်"လို့ပြောပါတယ်။
ဖမ်းဆီးခံရသူတွေထဲမှာ ပလက်ဝမှ မြောက်ဦး KBZ ဘဏ်မှာ ငွေလာထုတ်ရာမှာ ငွေထုတ်လို့ မရသေးတဲ့အတွက် လက္ကာကျေးရွာရှိ အသိအိမ်မှာ တည်းခိုနေသူ တဦးနဲ့ အိမ်ဆောက်ဖို့လာတဲ့ လက်သမားအဖွဲ့ဝင် မာင်ရွှေကံကျေးရွာက ၁ ဦး အုတ်ဖိုကံကျေးရွာက ၁ ဦး၊ ခွဆုံကျေးရွာက ၁ ဦး၊ ယွန်းချောင်းရွာက ၁ ဦး၊ တိမ်ညိုရွာက ၁ ဦး၊ ပြိုင်းချရွာက ၁ ဦး၊ ရွှေကျင်ပြင်ရွာက ၁ ဦးနဲ့ လက္ကာ ကျေးရွာက ၁၉ ဦးတို့ ဖြစ်ကြပါတယ်။
အခုဖမ်းဆီးခံရသူတွေကို ပြန်လွှတ်ပေးဖို့ ရခိုင်ပြည်နယ်တည်ငြိမ်အေးချမ်းရေး အထောက်အကူပြု ကော်မတီနဲ့ ရခိုင်ပြည်နယ် ၀န်ကြီးချုပ်ထံကိုလည်း တင်ပြထားတယ်လို့ သိရပါတယ်။
အခုဖမ်းဆီးခံရသူတွေဟာ သာမန်လက်လုပ်လက်စား ပြည်သူတွေသာ ဖြစ်တယ်ဆိုတာ ကို မိသားစုဝင်တွေလက်မှတ်ရေးထိုးပြီး ရခိုင်ပြည်နယ်တည်ငြိမ်အေးချမ်းရေး အထောက်အကူပြု ကော်မတီ ဥက္ကဋ္ဌနဲ့ ပြည်နယ်လွှတ်တော်ကို လိပ်မူပြီးစာပေးပို့ဖို့ လုပ်ဆောင်နေပါတယ်လို့ မြောက်ဦးလွှတ်တော်အမတ် ဦးထွန်းသာစိန်က ပြောပါတယ်။
သတင်း-ဗညား
ဓာတ်ပုံ-CINCDS
