ဆိုင်ကယ်မတော်တဆမှုကြောင့် တနှစ်အတွင်း လူ ၂၃၀၀ ကျော် သေဆုံး
2.3K
ပြီးခဲ့တဲ့ ၂ဝ၁၈ ခုနှစ်အတွင်းဖြစ်ပွားခဲ့တဲ့ မော်တော်ဆိုင်ကယ်မတော်တဆမှုအတွင်း လူပေါင်း ၂၃၀၀ ကျော် သေဆုံးတယ်လို့ ဒုသမ္မတ ဦးဟင်နရီဗန်ထီးယူက ပြောပါတယ်။
ဧပြီ ၈ ရက်က နေပြည်တော်မှာ ကျင်းပတဲ့ အမျိုးသားယာဉ်အန္တရာယ်၊ လမ်း အန္တရာယ်ကင်းရှင်းရေးကောင်စီ အစည်းအဝေးမှာ ပြောခဲ့တာ ဖြစ်ပါတယ်။
မော်တော်ယာဉ်အမျိုးအစားအလိုက် ယာဉ်တိုက်မှုနှုန်းကိုလေ့လာကြည့်ပါက ၂ဝ၁၈ ခုနှစ် အတွင်းဖြစ်ပွားခဲ့တဲ့ မော်တော်ဆိုင်ကယ်ယာဉ်မတော်တဆနှုန်း ဟာ ၄၉ ရာခိုင်နှုန်းရှိပြီး ၂၃၇၆ ဦးသေဆုံး၊ ၁၂၉၈၅ ဦး ဒဏ်ရာရရှိခဲ့တယ်လို့ ဒုသမ္မတ ဦးဟင်နရီဗန်ထီးယူ ကပြောပါတယ်။
“ယာဉ်တိုက်မှုဖြစ်စဉ်ထက်ဝက်ခန့်ဟာ မော်တော်ဆိုင်ကယ်ကြောင့် ဖြစ်ပွားနေတာကို သတိမူပြီး ပြီးခဲ့တဲ့ စတုတ္ထအကြိမ် အမျိုးသားယာဉ်အန္တရာယ်၊ လမ်းအန္တရာယ်ကင်းရှင်းရေး ကောင်စီ NRSC အစည်းအဝေးမှာ မော်တော်ဆိုင်ကယ် တိုက်ခိုက်မှု၊ သေဆုံး၊ ဒဏ်ရာရမှုလျှော့ချဖို့ မော်တော်ဆိုင်ကယ်ဦးထုပ်အရည်အသွေးစံချိန်စံညွှန်းတွေ ထွက်ပေါ်လာဖို့ လုပ်ဆောင်နေတယ်”
ဒါ့အပြင် ယာဉ်မတော်တဆမှုဆိုင်ရာ စာရင်းဇယား၊ အချက်အလက်တွေ တိကျ မှန်ကန် ပြည့်စုံမှသာ NRSC အနေနဲ့ ထိရောက်အောင်မြင်တဲ့ လုပ်ငန်းစဉ်/ မူဝါဒတွေကို ချမှတ် ဖော်ဆောင်နိုင်မယ်လို့လည်း ပြောပါတယ်။
NRSC ရဲ့ ၂ဝ၁၈ ခုနှစ် နှစ်ချုပ်အစီရင်ခံစာအရ (၁ဝ)နှစ်တာကာလအတွင်း တောက်လျှောက်အတက်ဘက်ကိုသာ ဦးတည်လာခဲ့တဲ့ ယာဉ်တိုက်မှု၊ ဒဏ်ရာရမှုနဲ့ သေဆုံးမှုအခြေအနေဟာ ၂ဝ၁၈ခုနှစ်မှာ အနည်းငယ် ပြန်လည် လျော့ကျလာခဲ့တယ်လို့ ဆိုပါတယ်။
၂ဝ၁၉ ခုနှစ် နှစ်ဆန်းပိုင်းနှစ်လအတွင်းမှာတော့ သေဆုံးမှုသိသိ သာသာမြင့်တက်လာ တာကို NRSC က စိစစ်တွေ့ရှိထားပါတယ်။
၂ဝ၁၈ခုနှစ်အတွင်း ကားမောင်းနှင်၊ စီးနင်းစဉ်မှာ အသက်ကယ်ထိုင်ခုံခါးပတ်ကို အသုံးမပြုတဲ့အတွက်လူ ၁,၂၁၄ ဦး သေဆုံးခဲ့ပြီး ဒဏ်ရာရ ၆၂၇၆ ဦးထိ ရှိခဲ့ပါတယ်။
