စည်းကမ်းချက် ၂၀ မလိုက်နာသည့် ခရီးသည်တင်ယာဉ်များ အမြန်လမ်းပေါ်မောင်းခွင့်မရှိ
DVB
·
April 8, 2019
ရန်ကုန်-မန္တလေး အမြန်လမ်းပေါ် မောင်းနှင်မယ့် ခရီးသည်ယာဉ်တွေ လိုက်နာရမယ့် စည်းကမ်းချက် ၂၀ ကို အမြန်လမ်း ပူးပေါင်း စစ်ဆေးရေးအဖွဲ့က ထုတ်ပြန်လိုက်ပါတယ်။
စည်းကမ်းချက်တွေထဲမှာ ခရီးသည်တင် အမြန်ယာဉ်တွေ၊ မီနီဘတ်စ်တွေ၊ ဘုရားဖူးယာဉ်တွေအနေနဲ့ အရေးပေါ်ထွက်ပေါက် အသုံးပြုနိုင်အောင်ထားရှိဖို့၊ မီးသတ်ဆေးဘူး ၂ ဘူးတပ်ဆင်ဖို့၊ ယာဉ်မောင်းနဲ့ ခရီးသည်တွေအားလုံး ခါးပတ်တပ်ဆင်ဖို့ စတာတွေ ပါဝင်ပါတယ်။
ဒ့ါအပြင် ယာဉ်ကိုယ်ထည်၊ ကားတာယာနဲ့ ယာဉ်အစိတ်အပိုင်းတွေကောင်းမွန်ဖို့ အင်ဂျင်မီးခိုးထွက်နှုန်း ၅၀ ရာခိုင်နှုန်း BOSH Unit ထက်မပိုဖို့၊ သတ်မှတ်လူစီးထိုင်ခုံ အရေအတွက်ထက် ပိုမတပ်ဆင်ဖို့ ၊ လေကာမှန်၊ ရေသုတ်တံနဲ့ ရောင်ပြန်ပြားတွေ တပ်ဆင်ဖို့ တွေလည်း ပါဝင်ပါတယ်။
ခရီးသည်တင်ကား ယာဉ်မောင်းတွေအနေနဲ့လည်း (င)ယာဉ်မောင်းလိုင်စင် ရှိရာမှာဖြစ်ပြီး၊ အရက်သေစာ မသောက်စားဖို့၊ အချိန် ၈ နာရီထက်ကျော်လွန်တဲ့ ခရီးစဉ်တွေမှာ ယာဉ်မောင်း ၂ ဦးပါရှိဖို့၊ ကားခေါင်မိုးပေါ်မှာ လူနဲ့ ပစ္စည်းတွေ မတင်ဖို့၊ တယ်လီမက်တစ်စနစ်တပ် ကုန်ကားတွေ အနေနဲ့ အမိုးအကာ စနစ်တကျအုပ်ဆိုင်း ခြည်နှောင်ဖို့ တွေလည်း လိုက်နာရမှာ ဖြစ်ပါတယ်။
အဆိုပါ စည်းကမ်းချက် အချက် ၂၀နဲ့ မကိုက်ညီတဲ့ ယာဉ်တွေအနေနဲ့ အမြန်လမ်းမှာ ဒီကနေ့ ဧပြီ ၈ ရက် ကစတင်ပြီး ဖြတ်သန်း မောင်းနှင်ခွင့်ပေးမှာ မဟုတ်ဘူးလို့လည်း ထုတ်ပြန်ချက်မှာ ဖော်ပြထားပါတယ်။