မင်းပြားတွင် ခြေထောက်နှစ်ဖက် ကြိုးချည်ထားသည့် အလောင်းတွေ့ရှိ
DVB
·
April 7, 2019
ရခိုင်ပြည်နယ်၊ မင်းပြားမြို့၊ ဦးစိုးတင့်ရပ်ကွက်အနီး ကင်းချောင်းပေါက်ချောင်း၊ လေးမြို့ မြစ်ကမ်းနားဘေးမှာ ခြေထောက်နှစ်ဖက်ကို ကြိုးချည်ထားပြီး ကျောက်တုံးနဲ့ တွဲလောင်း သေဆုံးနေတဲ့ လူတဦးကို တွ့ရှိခဲ့ရတယ်လို့ ဦးစိုးတင့်ရပ်ကွက်နေထိုင်သူတွေက ပြောပါတယ်။
မျောပါလာတဲ့သူက ယောက်ျားတဦးဖြစ်ပြီး ဒီကနေ့ မနက်ပိုင်းက အဲ့ဒီ ဦးစိုးတင့် ရပ်ကွက်မှာ နေထိုင်သူတွေက လေးမြို့ မြစ်ကမ်းနားဘေးမှာ အလောင်းတလောင်းကို တွေ့ရှိခဲ့ တယ်လို့ မျက်မြင်တွေ့ရှိခဲ့တဲ့ ကိုစိုးနိုင်ကပြောပါတယ်။
“အဲ့ဒီမှာ လူတွေဝိုင်းကြည့်နေလို့ ကျနော်က သွားကြည့်တာ။ ယောက်ျားအလောင်းပဲ၊ ကမ်းနားမှာကပ်ပြီးတော့ မှောက်လျှက်ဖြစ်နေတာ၊ ခြေထောက်နှစ်ဖက်ကိုတော့ ကြိုးချည် ထားတယ်။ နောက်ပြီးတော့ ခြေထောက်ကို ကျောက်လုံးတလုံး တွဲချဉ်ထားတယ်။ လေးမြို့မြစ်ဘက်က ဒီရေအကျနဲ့ မျောလာတာဖြစ်မယ်”လို့ပြောပါတယ်။
မျောပါလာတဲ့ အလောင်းဟာ ပွဖောင်နေပြီး ခြေထောက်တွေနဲ့ ပေါင်းတွေမှာ ပွင်းပဲ့နေတာ တွေ တချို့တွေရပြီး ဘယ်သူဘယ်ဝါဆိုတာ မသိဘူးလို့ ရပ်ကွက်နေသူတွေကပြောပါတယ်။ လက်ရှိတွေ့ခဲ့ရှိခဲ့တဲ့ အလောင်းကိုတော့ သက်ဆိုင်ရာ ရဲတပ်ဖွဲ့တွေကို အကြောင်းကြားထားတယ်လို့ ဦးစိုးတင့်ရပ်ကွက်နေသူတွေကပြောပါတယ်။
မင်းပြားမြို့ရဲစခန်းစခန်းမှူးက “ကျနော်တို့ဆီကို အဲ့သတင်းမရောက်သေးဘူးခင်ဗျ၊ ရောက်တာနဲ့ ကျနော်တို့ အတည်ပြုပြီးတော့ ပြန်ပြောပေးပါ့မယ်ဗျ” လို့ ပြောပါတယ်။
ရခိုင်ပြည်နယ်က မြို့နယ် ၅ မြို့နယ်မှာ ညမထွက်ရ အမိန့်တရပ် ထုတ်ပြန်ထားပြီး မင်းပြားမြို့နယ်လည်း ပါဝင်ပါတယ်။
သတင်း-ဝဏ္ဏခွာညို