ပျော်ဘွယ်မြို့ ဆိုင်ကယ်ရောင်းဝယ်ဆိုင် မီးလောင်၊ ဆိုင်ကယ်အစီး၂၀ ဆုံးရှုံး
DVB
·
April 4, 2019
မန္တလေးတိုင်းဒေသကြီး ပျော်ဘွယ်မြို့ ဧပြီ ၃ ရက်မနက်က ရွှေပြည်ရန်နိုင်ရပ်ကွက် K ဟိန်းဆိုင်ကယ် ရောင်းဝယ်ဆိုင် မီးလောင်ခဲ့တာကြောင့် ဆိုင်ကယ်မျိုးစုံအစီး ၂၀ မီးလောင်သွားတယ်လို့ ပျော်ဘွယ်မြို့နယ် မီးသတ်တပ်ဖွဲ့က ပြောပါတယ်။
ဦးအောင်သီဟ ပိုင်ဆိုင်တဲ့ K ဟိန်းဆိုင်ကယ်ရောင်းဝယ်ဆိုင် မီးလောင်ရာ ဆိုင်ကယ်မျိုးစုံ အစီး၊ ၂၀ ကာလတန်ဖိုး သိန်း ၁၄၀ လောက် ဆုံးရှုံးသွားပါတယ်။
ပျော်ဘွယ်မြို့ မီးသတ်ဦးစီး ဦးအောင်သက်လှိုင်က "မီးဘယ်က စပြီး လောင်တယ်ဆိုတာ စုံစမ်းစစ်ဆေးနေဆဲပါ။ မီးသတ်ယာဉ်နဲ့ ရေသယ်ယာဉ်ပေါင်း ၆ စီး သုံးရတယ်။ သန္ဓေ အရန်မီးသတ် တပ်ဖွဲ့ဝင် ၃၃ ဦးနဲ့ ရပ်ကွက်ပြည်သူတွေ ပူးပေါင်းပြီး မီးငြိမ်းသတ်ပါတယ်" လို့ ပြောပါတယ်။
မြို့နယ်အုပ်ချုပ်ရေးရုံးက တာဝန်ကျ ဝန်ထမ်းတဦးက "ဆိုင်ကယ်ရောင်းဝယ်ဆိုင် မီးလောင်ပါတယ်။ ဆိုင်ကယ်တွေပဲ မီးလောင်သွားတာပါ၊ အခြားအိမ် မီးမကူးပါဘူး၊ လူနဲ့တိရစ္ဆာန် ထိခိုက်မှု မရှိပါဘူး"လို့ ပြောပါတယ်။
ရွှေပြည်ရန်နိုင်ရပ်ကွက်မှာ အိမ်ခြေ ၁၀၀၀ ကျော်ရှိပြီး လူဦးရေ ၅၀၀၀ ကျော် နေထိုင်ပါတယ်။ မီးလောင်ကျွမ်းမှုနဲ့ ပတ်သက်ပြီး ပျော်ဘွယ်မြို့မရဲစခန်းမှာ မီပေါ့ဆမှုနဲ့ အမှုဖွင့်ထားပါတယ်။
သတင်း-မောင်မောင်လင်း
