ပုသိမ်မြို့ သိုးမွေးစက်ရုံ၌ သရဲဝင်ပူးသည်ဆိုကာ အလုပ်သမများ သတိလစ်၍ ဆေးရုံပို့ဆောင်
3.7K
ဧရာဝတီတိုင်း၊ ပုသိမ်စက်မှုဇုန်ရှိ သိုးမွေးစက်ရုံမှာ ဧပြီ ၂ ရက် ဒီကနေ့ မနက်ပိုင်းက စက်ရုံ အလုပ်သမ ၂၃ ဦးဟာ သရဲဝင်ပူးတယ်ဆိုပြီး အော်ဟစ်သတိလစ်ခဲ့တာကြောင့် ဆေးရုံသို့ ပို့ဆောင်ခဲ့ရပါတယ်။
ပုသိမ်စက်မှုဇုန်အတွင်းက မြန်မာနစ်တင်းဇက်ထရီ သိုးမွေးစက်ရုံက အလုပ်သမတဦး အိမ်သာ အပြန်မှာ အော်ဟစ်လိုက်တာကြောင့် ကျန်တဲ့ အမျိုးသမီးတွေပါ လန့်ပြီး သတိလစ်တာနဲ့ တက်တာတွေ ဖြစ်ကုန်တယ်လို့ မျက်မြင်တွေ့ရှိသူတွေက ပြောပါတယ်။
“မူးတာတွေ သတိလစ်တာတွေပေါ့၊ တချို့ဆို အံတွေကြိတ်နေတာ တွေရှိတယ်။ အကုန်လုံးကိုတော့ ဆေးရုံကိုပို့ပေးနေပါတယ်"လို့ မြန်မာနိုင်ငံ လူမှုကယ်ဆယ်ရေးအဖွဲ့ ဧရာဝတီတိုင်း ရုံးအဖွဲ့ဝင် ကိုအောင်ထက်ပိုင် က ပြောပါတယ်။
အလုပ်သမားတွေ သတိလစ်မူးလဲ၊ ငိုယိုအော်ဟစ် နေတဲ့အတွက် စက်ရုံတာဝန်ရှိသူတွေနဲ့ ရဲတပ်ဖွဲ့ဝင်တွေ လာရောက်ကြည့်ရှုခဲ့သလို ဘုန်းကြီးတွေပင့်ဆောင်ပြီး တရားနာယူခဲ့ တယ်လို့ သိရပါတယ်။
အလုပ်သမတွေကိုတော့ မြန်မာနိုင်ငံ လူမှုကယ်ဆယ်ရေးအဖွဲ့ (ဧရာဝတီတိုင်း ဒေသကြီး)က လူနာတင်ယာဉ် ၁၀ စီးနဲ့ အခြားပရဟိတလူမှုအဖွဲ့အစည်းတွေက လူနာတင်ယာဉ် တွေနဲ့ ပုသိမ်ပြည်သူ့ ဆေးရုံကြီးကို ပို့ဆောင်ပေးခဲ့ပါတယ်။
မြမင်းဦး(ပုသိမ်)
