စွန့်လွှတ်မြေပေါ်တွင် တပ်ခြံစည်းရိုးခတ်မှု ရွှေသောင်ယံဒေသခံများ ကန့်ကွက်
1K
ဧရာဝတီတိုင်း၊ ရွှေသောင်ယံမြို့၊ ခရင်ချောင်းရွာက ပြန်လည်စွန့်လွှတ်ထားတဲ့ အုန်းဥယျာဉ်ခြံမြေတွေပေါ်မှာ မတ်လ ၂၂ ရက်က အနောက်တောင်တိုင်းစစ်ဌာနချုပ် အမှတ် ၅ တိုင်းဗဟိုလေ့ကျင့်ရေးတပ်ကနေ ခြံစည်းရိုးခတ်တဲ့အတွက် ဒေသခံတွေက ကန့်ကွက်ပါတယ်။
ခရင်ချောင်းရွာက ဦးသိန်းမောင် အပါအဝင်တောင်သူ ၁၆ ဦးရဲ့ အုန်းခြံဥယျာဉ်မြေတွေကို ၁၉၉၆ ခုနစ်ကအမှတ် ၅ တိုင်းဗဟိုလေ့ကျင့်ရေးတပ်ကနေ အုန်းပင်ဖိုးလျော်ကြေးပေးပြီး သိမ်းယူခဲ့ကာ အနောက်တောင်တိုင်းစစ်ဌာနချုပ်ရိပ်သာအဖြစ် တည်ဆောက်ခဲ့တာပါ။
ဒီအထဲက ပိုနေတဲ့ မြေဧက ၃၇.၄၄ ဧကကို ပြန်လည်စွန့်လွှတ်တယ်လို့ တောင်သူတွေဆီ စာထုတ်ပေးခဲ့ပေမယ့် ပြန်မရပဲ ခြံစည်းရိုးခတ်ထပ်ခတ်တာလို့ မြေသိမ်းခံတောင်သူတွေက ပြောပါတယ်။
မြေသိမ်းခံတောင်သူ ဒေါ်ခင်သန်းအေးက "ဒီမြေတွေက ကျမတို့မိဘတွေ အိုစာမင်းစာအဖြစ် ချန်ထားခဲ့တဲ့မြေတွေပါ။ ဒါပေမယ့် မိဘတွေကသာ ရနိုးရနိုးနဲ့ မျှော်ရင်း ဆုံးသွားတယ်။ အခုထိမရပါဘူး။ အိုစာစားမသွားရပဲ မင်းစာ ဖြစ်ခဲ့ရတဲ့မြေတွေပါ။ အခုလည်းစွန့်လွှတ်တယ်ဆိုပြီး ခြံစည်းရိုးတွေထပ်ခတ်လာတာကို ကန့်ကွက်ပါတယ်"လို့ ပြောပါတယ်။
တပ်မတော်က ပြန်လည်စွန့်လွှတ်တဲ့ မြေပေါ်မှာ ခြံစည်းရိုးခတ်ပြီး အဆောက်အဦတွေ ဆောက်ဖို့လုပ်လာတာတယ်လို့လည်း ဒေသခံတောင်သူတွေက ပြောပါတယ်။
ဒီကိစ္စနဲ့ ပတ်သက်ပြီး အမှတ် ၁ ရပ်ကွက် အုပ်ချုပ်ရေးမှူး ဦးဇော်မျိုးမင်း "သူတို့ကိုယ်စား အုပ်ချုပ်ရေးမှူးတယောက်အနေနဲ့ စိတ်မကောင်းပါဘူး။ နိုင်ငံတော် အတိုင်ပင်ခံ နိုင်ငံတော် သမ္မတကြီးနဲ့တကွ တပ်မတော်ကာကွယ်ရေးဦးစီးချုပ်နဲ့တကွ တပ်မတော် အရာရှိ အရာခံတပ်သားများအားလုံး ကျနော်တို့ဆီက တပ်သိမ်းမြေလေးကို ပြန်မပေးရင်လည်း လျော်ကြေး နစ်နာကြေးကို ထိုက်သင့်သလောက်ပေးပါလို့ မေတ္တာရပ်ခံချင်ပါတယ်"လို့ ပြောပါတယ်။
တပ်မတော်က စွန့်လွှတ်တယ်ဆိုတဲ့ အုန်းဥယျာဉ်ခြံတွေ ပြန်လည်မရရှိတဲ့အပေါ် သိမ်းဆည်းခံလယ်ယာမြေနှင့် အခြားမြေများစိစစ်ရေးကော်မတီက ၂၀၁၇ ခုနှစ်မေလက စစ်ဆေးခဲ့ပြီး သက်ဆိုင်ရာအထက်အဆင့်ဆင့်ကို ဆက်လက်တင်ပြထားပေမယ့်လည်း ထူးခြားမှုမရှိဘူးလို့ ဒေသခံတွေက ပြောပါတယ်။
မြမင်းဦး(ပုသိမ်)
