ရဲတပ်ဖွဲ့ဝင်များ၏ စက်လှေကို အေအေအဖွဲ့ ပစ်ခတ်၊ ရဲတပ်ဖွဲ့ဝင် ၁ ဦးကျဆုံး
DVB
·
March 11, 2019
ရသေ့တောင်မြို့နယ် အိုးဖောက်ရဲကင်းစခန်း တပ်ဖွဲ့ဝင် ၁၄ ဦး စီးနှင်းလိုက်ပါလာတဲ့ စက်လှေတစီးကို အေအေအဖွဲ့က ပစ်ခတ်တာကြောင့် ရဲတပ်ဖွဲ့ဝင်တဦး ကျဆုံးသွားတယ်လို့ သိရပါတယ်။
ညောင်ချောင်းစခန်းကို အင်အားပူးပေါင်းဖို့ ရေကြောင်းနဲ့ လာရောက်တဲ့ ရဲတပ်ဖွဲ့ဝင်တွေရဲ လှေကို ကာဒီချောင်းအတွင်းမှာ အေအေအဖွဲ့က မတ်လ ၁၀ ရက်နေ့ ည ၆ နာရီ လောက်က ချုံခိုတိုက်ခိုက်ခဲ့တာလို့ ညောင်ချောင်းစခန်း တာဝန်ရှိသူတဦးက အတည်ပြုပြောကြားပါတယ်။
"စက်လှေက ရသေ့တောင်မြို့နယ် အာကာတောင်ကျေးရွာမှ စက်လှေဖြစ်စပါတယ်။ ညနေ ၆ နာရီ လောက်မှာ ညောင်ဘင်္ဂလီကျေးရွာအနီး ကာတီကျေးရွာ နားမှာ တိုက်ခိုက်ခံရတယ်။ တဦးကျပြီး ရေစီးနဲ့မျောပါသွားတယ်၊ အလောင်းကို အခုထိရှာမရသေးဘူး။ ကျန်တပ်ဖွဲ့ဝင်တွေကတော ကမ်းကိုကပ်နိုင်ခဲ့တယ်။ စက်လှေလည်း နှစ်မြုပ်သွားတယ်။"
မြန်မာနိုင်ငံ ရဲတပ်ဖွဲ့ထုတ်ပြန်ချက်မှာတော့ အေအေအဖွဲ့က စက်လှေကြီးတစီးနဲ့ ရောက်ရှိလာပြီး လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့သလို ရဲတပ်ဖွဲ့ဝင်တွေရဲ့ စက်လှေကိုလည်း ဝင်တိုက်ခဲ့တာကြောင့် စက်လှေမှာ နစ်မြုပ်သွားပြီး လက်နက်ငယ် ၃ လက်ပါသွားခဲ့ကြောင်း၊ ရဲတပ်သားတဦး သေနတ်ဒဏ်ရာရရှိပြီး ရေနဲ့အတူ မျောပါသွားကာ ကျန်ရဲတပ်ဖွဲ့ဝင်တွေကတော့ ဒဏ်ရာမရရှိဘူးလို့ ဆိုပါတယ်။
