အခြေခံဥပဒေပြင်ဆင်ရေး ညောင်တုန်းမြို့ခံများ ဆန္ဒပြ
DVB
·
March 5, 2019
ဧရာဝတီတိုင်းဒေသကြီး ညောင်တုန်းမြို့မှာ ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး လူထုထောက်ခံ ဆန္ဒဖော်ထုတ်ပွဲကို ကျင်းပရာမှာ ထောင်နဲ့ချီတဲ့မြို့ခံတွေ ပါဝင် ဆန္ဒပြခဲ့ကြ ပါတယ်။
ဆန္ဒဖော်ထုတ်ပွဲမှာ ပန်းရဲ့လမ်းအဖွဲ့ကနေ တေးသီချင်းတွေကို ဖျော်ဖြေခဲ့ကြပြီး မြို့ခံတွေက ဖွဲ့စည်းပုံအခြေခံဥပဒေပြင်ဆင်ဖို့ ဟောပြောခဲ့ပြီး မြို့အနှံ စီတန်း လှည့်လည်ခဲ့ကြပါတယ်။
ဧရာဝတီတိုင်းဒေသကြီးလွှတ်တော် ညောင်တုန်းမြို့နယ် ကိုယ်စားလှယ် ဒေါ်နီနီမိုး က "မြို့ခံတွေရဲ့သဘောထားကတော့ အခြေခံဥပဒေဆိုတာက ပြည်သူလူထုကနေ ရွေးချယ် တင်မြောက်ထားတဲ့ သူတွေကပဲ ရွေးခွင့်ရှိတယ်ပေါ့။ ဖွဲ့စည်းပုံကို နဂိုတုန်းက ၂၀၀၈ အခြေခံဥပဒေကို အတည်ပြုဖို့ တအိမ်တက်ဆင်း မပေးမနေရ မဲပေးရမယ်၊ မပေးရင် ဖမ်းမယ်ဆိုလို့ မဲသွားပေးခဲ့ရတဲ့လူကြီးတွေလည်းပါတယ်။ သူတို့တွေက ဥပဒေကို လွှတ်တော်ကိုယ်စားလှယ်တွေက ရေးခွင့်မရခဲ့လို့ ကန့်ကွက်တယ် ဆိုပြီး လာကြတာပေါ့"လို့ ပြောပါတယ်။
လူထုထောက်ခံပွဲကို ညောင်တုန်းမြို့မိမြို့ဖတွေနဲ့ လူမှုရေးအဖွဲ့တွေ စုပေါင်းပြုလုပ်ခဲ့တာ ဖြစ်ပြီး ညောင်တုန်းမြို့ခံ ၄၀၀၀ နီးပါးက၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ထောက်ခံကြောင်း ဆန္ဒပြုလက်မှတ်ရေးထိုးခဲ့ပါတယ်။
မြမင်းဦး(ပုသိမ်)