တိုက်ကြီးတွင် တောဆင်ရိုင်း အုပ်စုလိုက်ဝင်ရောက်ဖျက်ဆီးသဖြင့် လူနေအိမ် ၂ လုံးပျက်စီး
DVB
·
February 27, 2019
ရန်ကုန်တိုင်း၊ တိုက်ကြီးမြို့နယ်၊ ချင်းကုန်းကျေးရွာအုပ်စု၊ ကျားချောင်းကျေးရွာ အနောက်ဘက် စမ်းကလေးမှာ မနေ့ညက တောဆင်ရိုင်းတွေ အုပ်စုလိုက် ၀င်ရောက်ခဲ့တဲ့အတွက် လူနေအိမ် ၂လုံး ဖျက်ဆီးခံရပြီး သီးနှံစိုက်ခင်းတချို့ပျက်ဆီးသွားပါတယ်။
အိမ်ဖျက်ဆီးခံရသူ ကိုနှစ်ဦးမောင်က “ဆင်တွေက ညဘက်မြင်လိုက်တာဆိုတော့ အကောင်ရေတော့ မသိဘူး။ များတော့များတယ်။ အဓိက မီးဖိုဆောင်ဘက်ကိုဝင်ပြီး အစားအသောက်တွေဖြစ်တဲ့ ငပိ၊ ငါးခြောက်၊ ဆန်၊ စပါးနဲ့ ဆားတွေကို ရှာစားတာ။ ခွေးဟောင်သံကြားတော့ ဆင်းလာပြီဆိုတာကို သိတာနဲ့မိသားစုတွေ ထွက်ပြေးခဲ့ရတယ်။ ဆင်တွေက လူကိုအန္တရာယ်ပြုဖို့ မဟုတ်ဘူး။ သူတို့အစားအတွက် အိမ်တွေကို ဝင်ရှာတာ။ သူတို့ ကိုယ်လုံးတွေနဲ့ဆိုတော့ အိမ်တွေပြိုတာပေါ့”လို့ ပြောပါတယ်။
ချင်းကုန်းကျေးရွာအုပ်ချုပ်ရေးမှူး ဦးကျော်ဝင်းက “ကျေးရွာတွေဘက်မှာ ဆင်တွေက အမြဲဝင်နေကျဖြစ်တော့ အခုလိုအပျက်အစီးကတော့ အနည်းနဲ့အများရှိပါတယ်။ သိပ်တော့ မထူးခြားတော့ပါဘူး။ ဆင်တွေဝင်လာတယ်လို့ သစ်တောကိုအကြောင်းကြားရင် မြိုင်ဟေဝန် ဆင်စခန်းကအဖွဲ့တွေနဲ့ သစ်တောက ဝန်ထမ်းတွေ လာမောင်းလိုက်နဲ့ အဆင်ပြေသွားတာပါ။ ကိုနှစ်ဦးမောင် အိမ်ကိုအရင်ဝင်ပြီး ၄ ဖာလုံလောက်ဝေးတဲ့ သရက်ခြံထဲမှာ အစားအသောက် ရှာရင်း ခြံစောင့်တဲကို ဖျက်သွားတာ။ ပျက်စီးဆုံးရှုံးမှုကတော့ ကျပ် ၄ သိန်းလောက်ရှိမယ်”လို့ ပြောပါတယ်။
တိုက်ကြီးမြို့နယ်၊ အရှေ့ဘက် ပဲခူးရိုးမတောင်ခြေမှာရှိတဲ့ ကျေးရွာတွေကို တောဆင်ရိုင်းတွေ နှစ်စဉ်ဝင်ရောက်နေပြီး လူတွေစိုက်ပျိုးထားတဲ့ သီးနှံခင်းတွေနဲ့ လူနေအိမ်တွေကိုပါ ဝင်ရောက်စားသောက်ဖျက်ဆီးတာတွေ ရှိနေတာပါ။
သက်ဆိုင်ရာဌာနဆိုင်ရာတွေ၊ ဆင်ချစ်သူများအဖွဲ့ကတော့ တောဆင်ရိုင်းတွေ အသတ်ခံရတာ လျော့နည်းစေဖို့နဲ့ မျိုးသုဉ်းပျောက်ကွယ်မှာကို ကာကွယ်ဖို့ ကျေးရွာတွေကိုဆင်းပြီး ဟောပြောပွဲကျင်းပ၊ ဆိုင်းဘုတ်စိုက်ထူ၊ လျှပ်စစ်ခြံစည်းရိုးကာပေးနေပါတယ်။
သတင်း - မေသွယ်၊ ဓာတ်ပုံ - ချင်းကုန်းကျေးရွာအုပ်ချုပ်ရေးမှူး