မြင်းခြံတွင် စီပီပြောင်းဆန်ဈေး ဆက်တိုက်ကျဆင်းနေ၍ တောင်သူများ အရှုံးပေါ်
DVB
·
February 24, 2019
မန္တလေးတိုင်းဒေသကြီး မြင်းခြံမြို့နယ်မှာ စီပီပြောင်းဆန်တွေ စေျးနှုန် ဆက်တိုက်ကျဆင်းနေတာကြောင့် တောင်သူတွေ အရှုံးပေါ်နေတယ်လို့ သိရပါတယ်။
မြင်းခြံမြို့ ရတနာမင်း စီပီပြောင်းဆန် ရောင်းဝယ်ရေးပွဲရုံမှ မရင်ရင်ဌေးက အဓိက တရုတ်ဘက်က လမ်းပိတ်ထားတာကြောင့် အထွက်မရှိတော့ဘဲ အခုလို ဈေးနှုန်း ဆက်တိုက်ကျဆင်းလာတာလို့ ပြောပါတယ်။
"မနှစ်က စီပီပြောင်းဆံ စပေါ်ချိန်က ဈေးနှုန်းကို အမြင့်ဈေးနဲ့ စပေးဝယ်ရတယ်။ ပြီးတော့ တရုတ်ဘက်ကလည်း ဝယ်ယူတာဆိုတော့ ဈေးကောင်းရတယ်ပေါ့။ ဒီနှစ်မှာတော့ တရုတ်လမ်းပိတ်ထားတော့ ပြည်တွင်းဈေးမှာပဲ ရောင်းချနေရတော့ ဈေးကအကျပဲ ဖြစ်နေတယ်။ ခုလောလောဆယ်မှာ မန္တလေးကစက်ရုံနဲ့ မြို့သာစက်မှုဇုန် စက်ရုံတွေကဝယ်ယူနေတယ်။ ဒါကလည်း ရေရှည်တော့မဟုတ်ဘူး။ အဓိက တရုတ်လမ်းပွင့်မှ တရုတ်ဘက်က ဝယ်ယူမှ ဈေးနှုန်းအပြောင်းအလဲရှိနိုင်မယ်၊ ခုအတိုင်းဆို စီပီပြောင်းဆန်ဈေးက ဆက်ကျသွားဖို့ရှိတယ်၊ စိုက်ပျိုးတဲ့ တောင်သူတွေလည်း အရှုံးပေါ်နေတယ်” လို့ ဒီဗွီဘီကို ပြောပါတယ်။
စီပီပြောင်း ၈ ဧက စိုက်ပျိုးထားတဲ့ နေရင်းပေါက်တောရွာမှ ဦးဖိုးဝက “ကျနော်တို့အခု ဈေးနှုန်းနဲ့က အရှုံးပေါ်နေတယ်၊ တောင်သူလုပ်ရတာက အစစအရာရာ ကုန်ကျစရိတ်တွေကများတယ်။ မြေဆီ၊ စက်သုံးဆီ၊ စီပီပြောင်းဆံမျိုးစေ့ဈေး၊ အလုပ်သမားခ နဲ့ သယ်ယူစရိတ်စတာတွေက ဒီနှစ်အကုန်ဈေးမြင့်တယ်။ ခု ကိုယ်ရောင်းရတဲ့ဈေးက အကျဈေးဖြစ်နေတော့ အရှုံးများတာပေါ့” လို့ ပြောပါတယ်။
ပြီးခဲ့နှစ်က စီပီပြောင်းကို အမြင့်ဈေး ၁ ပိဿာကို ၅၃၅ ကျပ်ကနေ ၆၂၅ ကျပ်ဈေးထိ အရောင်းအ၀ယ်ဖြစ်ခဲ့ပြီး အခုနှစ်မှာတော့ ၁ ပိဿာချိန်ကို ၄၃၀ ကျပ်နှုန်းနဲ့ အရောင်အဝယ်ပြုလုပ်နေရတယ်လို့ သိရပါတယ်။
စီပီပြောင်းဆန်မျိုးစေ့ကို ထိုင်းနိုင်ငံက အဓိကထုတ်လုပ်တင်သွင်းဖြန့်ချိတာဖြစ်ပြီး မြန်မာနိုင်ငံ နေရာအနှံ့အပြားမှာ စိုက်ပျိုးလို့ရတဲ့ သီးနှံအမျိုးအစားထဲမှာ ပါဝင်ပါတယ်။
မြင်းခြံမြို့နယ်မှာတော့ ဧရာဝတီမြစ်ကြောင်းတလျောက်ရှိ မြေနုကျွန်းမြေတွေမှာ တနှစ်ကို နှစ်ရာသီ စီပီပြောင်းဆန်ကို အများဆုံး စိုက်ပျိုးနေကြတာလည်း ဖြစ်ပါတယ်။
သတင်းနှင့်ဓာတ်ပုံ - ရီရီထွန်း