ရှမ်းပြည်နယ် ၅ မြို့နယ်တွင် စီမံချက်ဖြင့် တရားမဝင်သစ်များ ဖော်ထုတ်ဖမ်းဆီး
DVB
·
February 17, 2019
ရှမ်းပြည်နယ်အရှေ့ပိုင်းရှိ မိုင်းတုံ၊ မိုင်းဆတ်၊ မိုင်းဖြတ်၊ တာချီလိတ်၊ ကျိုင်းတုံမြို့နယ် အတွင်းမှာ သစ်တောဦးစီးဌာနနဲ့ တပ်မတော်စစ်ကြောင်းများ ပူးပေါင်းကာ ၅ မြို့နယ်စီမံချက်နဲ့ တရားမဝင်သစ် ဖမ်းဆီးမှုတွေ လုပ်ဆောင်နေပါတယ်။
"မြို့နယ် ငါးခုက သစ်တောဝန်ထမ်းတွေနဲ့ တပ်မတော်လုံခြုံရေးစစ်ကြောင်းတွေ ပူးပေါင်းပြီး ဖြန့်ခွဲရှာဖွေ ဖော်ထုတ်ခဲ့ကြတာပါ။ လောလောဆယ် မိုင်းဆတ်မြို့နယ်အတွင်းကနေ စစ်ကြောင်း ၂ ကြောင်းက နေရာသုံးနေရာကနေ သစ်တင် ၆ ဘီးယာဉ်တစီးနဲ့အတူ ဖမ်းဆီးရမိခဲ့တာ ရှိပါတယ်။ ဆက်လက်ရှာဖွေမှုတွေလည်း လုပ်နေပါတယ်” လို့ ဖမ်းဆီးရာမှာ ပါဝင်ခဲ့တဲ့ သစ်တောဝန်ထမ်း တောအုပ်တဦးက ပြောပါတယ်။
မိုင်းဆတ်မြို့နယ်ချောင်းဆုံ (၁၀မိုင်) ရွာမှာ ပိတောက် စကွဲယား ၅၂ တုံးနဲ့ သစ်လုံး ၁ လုံး၊ နားလည်ရွာအနီး တောအုပ်အတွင်းမှ ပိတောက်စကွဲယား ၁၀၅ တုံး၊ ဘာထန်ကျေးရွာအနီးမှ ပိုင်ရှင်မဲ့ ၆ ဘီးယာဉ်နဲ့အတူ ပိတောက်စကွဲယား ၆၉ တုံးတို့ကို ဖမ်းဆီးရမိခဲ့တယ်လို့ ဆိုပါတယ်။
မိုင်းဆတ်မြို့နယ် သစ်တောဦးစီးဌာနဦးစီးအရာရှိ ဦးသန်းနိုင်က ၆ ဘီးယာဉ်နဲ့အတူ ဖမ်းဆီးရမိတဲ့ ပိတောက်သစ်စကွဲယား ၂၂၅ တုံးနဲ့ သစ်လုံး ၁ လုံးအပါအဝင် စုစုပေါင်းသစ်တန် ၂၅ ဒဿမ ၄၅၇ တန်ကို မိုင်းဆတ်မြို့နယ် သစ်တောဦးစီးဌာနဝန်းအတွင်း သယ်ဆောင်ထားရှိပြီး သစ်တောဥပဒေအရ အမှုဖွင့်လှစ်နိုင်ရေးဆောင်ရွက်နေတယ်လို့ ပြောပါတယ်။
အောင်ဇေယျ
