တပ်မတော်အပေါ် အကြည်ညိုပျက်စေမှုဖြင့် ရွှေဝါရောင်ဆရာတော်တပါးကို စတင်တရားစွဲ
Aung Aung Naing
·
February 14, 2019
လူမှုကွန်ရက်ပေါ်မှာ တပ်မတော်ကိုသိက္ခာကျဆင်းအောင် ပုတ်ခတ်ရေးသားခဲ့တယ်ဆိုပြီး ရွှေဝါရောင် ဆရာတော် ဦးသောဘိတ (အလင်္ကာကြယ်)ကို တပ်မတော်သားတဦးက ဆက်သွယ်ရေး ဥပဒေ ပုဒ်မ ၆၆ (ဃ) နဲ့ အမှုဖွင့်ထားတာကို ဒီကနေ့ အမရပူရမြိုနယ်တရားရုံးက လက်ခံလိုက်ပါတယ်။
အမရပူရမြို့နယ် ဆင်စွယ်ပွတ်ရပ်ကွက်က မဟာဂန္ဓာရုံကျောင်းတိုက်မှာသီတင်းသုံးနေတဲ့ ဆရာတော် ဦးသောဘိတ (အလင်္ကာကြယ်)ဟာ လူမှုကွန်ရက်စာမျက်ပေါ်မှာ ၂၀၁၈ စက်တင်ဘာ ၉ ရက်နေ့က စေတနာတွေ မှန်ကန်ဖို့လိုပါတယ်။ ခေါင်းစဉ်နဲ့ အလယ်ပိုင်းတိုင်း စစ်ဌာနချုပ် နယ်လှည့်ဆေးကုသရေးအဖွဲ့ရဲ့ ဆေးကုသမှုနဲ့ ပတ်သက်ပြီး ရေးသားခဲ့တာပါ။
“မြတောင် ကျောင်းတိုက်အတွင်း ဆေးကုနေမှုကို ကိုယ့်အလုပ်ကို လုပ်တာဘဲ သဘာဝကြပါတယ်။ ကျန်းမာရေးစောင့်ရှောက်မှုဆိုတာ ကျန်းမာရေး ဝန်ကြီးဌာနက လုပ်တာသဘာဝကြပါတယ်။ တပ်ကတောင်းတဲ့ ဘတ်ဂျက်စာရင်းထဲမှာ အဲဒီအတွက် ထည့်တောင်းတာဆိုရင်တော့ နောက်နှစ်တွေမှာ လျော့ပေါ့ ပြီးတောင်းကြပါ”လို့ ရေးသားကာ စက်တင်ဘာ ၁၁ ရက်နေ့ကလည်း “တပ်မတော်စွမ်းမှသာ တိုင်းပြည်အေးချမ်းမည် ဗီနိုင်းဆိုင်းဘုတ်ရဲ့နောက်မှာခြေအတု တပ်ဆင်ထားသော စစ်မှုထမ်းဟောင်းပုဆိုးဝတ်ပုံကိုတင်ပြီး ပုံရဲ့အပေါ်မှာ တပ်မတော်က မစွမ်းဘဲခိုးနေတော့ တိုင်းပြည်မွဲတာပေါ့”လို့ ဆက်လက်ရေးသားခဲ့ ပါတယ်။
ဒါကြောင့် ရွှေဝါရောင် ဆရာတော် ဦးသောဘိတ (အလင်္ကာကြယ်)ကို တပ်မတော်နဲ့ တပ်မတော်သားတွေအပေါ် ဂုဏ်သိက္ခာထိခိုက်သည်လို့ဆိုကာ အလယ်ပိုင်းတိုင်းစစ်ဌာနချုပ် ၊ပြည်သူ့စစ်မှ ဦးစီးအရာရှိ(ပထမတန်း)ဒု ဗိုလ်မှူးကြီး မျိုးခိုင်ဝင်းက အမရပူရမြို့မရဲစခန်းကို တရားလိုပြုလုပ်တိုင်တန်းခဲ့ရာ ရဲစခန်းက ဆက်သွယ်ရေးဥပဒေ ပုဒ်မ-၆၆ (ဃ)နဲ့ အမှုဖွင့်ထားခဲ့ပါတယ်။
ဘဝအလင်းဆရာတော်ဦးသောဘိတက “ဦးဇင်းလို ရဟန်းတော်တွေကို တပ်မတော်ကနေ လုပ်ချင်တိုင်းလုပ်လို့မရအောင် ဦးဇင်းတို့တတွေက ၂၀၀၈ အခြေဥပဒေထဲပါတဲ့ အထူးသဖြင့် ၄၃၆ ကို အမြန်ဆုံးပြင်ဖို့ ဝိုင်းပြီး ကြိုးစားရမယ်။ ပြည်သူ့အစိုးရလက်ထက်မှာ ပြည်သူ့အာဏာက ပြည်သူ့လက်ထဲမှာ အပြည့်အဝ ရှိရမယ်။ အာဏာက ပြည်သူလူထုက ဆင်းသက်တာဖြစ်ရမယ်။ ဘာဘဲဖြစ်ဖြစ် ဦးဇင်းတို့တတွေက ၂၀၀၈ ဖွဲ့စည်းပုံ အခြေခံဥပဒေကိုပြင်ဖို ဝိုင်းဝန်းကြိုးစားကြရ မယ်။ ဝန်းရံကြရမယ် အားပေးကြရမယ်။ ပါဝင်ကြရမယ်။ အဲဒီမှာ မပါဝင်ကြဘူးဆိုရင်တော် နိုင်ငံသား တယောက်ရဲ့ ဂုဏ်သိက္ခာပျက်ယွင်းခြင်းဘဲ ၂၀၀၈ ဖွဲ့စည်းပုံပြင်ဆင်ဖို့ထဲမှာ ဦးဇင်းတို့လည်း ပါတယ်” လို့ မိန့်ကြားပါတယ်။
ဖေဖော်ဝါရီ ၂၈ရက်နေ့မှာ တရားလိုဘက်က သုံးယောက်ကို စတင်စစ်ဆေးဖြစ်မယ်လို့ ဆရာတော်ဦးသောဘိတရဲ့ရှေ့နေ ဦးအောင်သိန်းကပြောပါတယ်။