ကျောင်းသား ၂ ဦးထံမှ မူးယစ်ဆေးပြားများ တွေ့ရှိ၊ လက်ခွဲရောင်းသူအချို့ ထွက်ပြေး
DVB
·
February 10, 2019
ပဲခူးတိုင်း ဖြူးမြို့မရဲတပ်ဖွဲစခန်းအပိုင် မင်းကံရိုးကျေးရွာမှာ ဖေဖော်ဝါရီ ၉ ရက်နေ့က ကျောင်းသာလူငယ် ၂ ဦးထံနေ WY စိတ်ကြွမူးယစ်ဆေးပြားတွေ တွေ့ရှိခဲ့တယ်လို့ ဖြူးမြို့နယ် ရဲတပ်ဖွဲ့မှူးရုံးမှ တာဝန်ရှိသူတဦးက ပြောပါတယ်။
ကျောင်းသားလူငယ် ၂ ဦးမှာ မူးယစ်ဆေးဝါးဝယ်ယူပြီး အပြန်မှာ ရဲတပ်ဖွဲ့က ရပ်တန့် စစ်ဆေးရာ ထွက်ပြေးခဲ့တဲ့အတွက် လိုက်လံဖမ်းဆီးရှာဖွေရာကနေ WY စိတ်ကြွရူးသွတ်ဆေးပြား ၅ ပြားရှာဖွေတွေရှိခဲ့တာကြောင့် ဆက်လက်စစ်ဆေးမှုတွေပြုလုပ်ခဲ့ပြီး လက်ခွဲရောင်းချသူအချို့ကို ဖမ်းဆီးရမိခဲ့ပြီး ထွက်ပြေးလွတ်မြောက်နေသူတွေလည်း ရှိနေတယ်လို့ သိရပါတယ်။
ဖြူးမြို့မရဲတပ်ဖွဲ့စခန်းမှ တာဝန်ရှိသူတဦးက “ဆေးရောင်းတယ်ဆိုတာ သတင်းရနေတာ တော့ကြာပြီ၊ မသေချာသေးတော့ ဝင်ဖမ်းမရသေးလို့ စောင့်ကြည့်နေတာ။ ဒီနေ့မှာ ကလေးနှစ်ယောက်က ဆိုင်ကယ်နဲ့ ပြန်ထွက်လာတာ တွေ့တော့ ရပ်ခိုင်းပြီး စစ်တယ်။ သူတို့က ထွက်ပြေးတော့ နောက်ကလိုက်ဖမ်းရတာပါ။ ကလေးတွေစီက ဆေးပြား ၅ ပြားမိတယ်။ ဘယ်ကဝယ်လာလဲ ဆက်ပြီး စစ်ဆေးဖမ်းဆီးခဲ့တာပါ။ အခုလက်ရှိတော့ တရားခံနှစ်ယောက်က ထွက်ပြေးနေတယ်။ ရောင်းတယ်ဆိုတဲ့အိမ်က ဆေးပြားအချို့ ထပ်မိပါတယ်”လို့ ပြောပါတယ်။
ကျောင်းသား ၂ ဦးကို စစ်ဆေးချက်အရ မင်းကံရိုး ကျေးရွာမှာ နေထိုင်တဲ့ သိန်းအောင် (ခ) ဂျဝါဟီးနဲ့ သားဖြစ်သူ ညွန့်မောင် (ခ) အူးမားတို့ထံမှာ ဝယ်ယူခဲ့ကြောင်း သိရပါတယ်။ သိန်းအောင်နဲ့ ညွှန့်မောင်တို့ နေရာကို ဆက်လက်သွားရောက်ရှာဖွေခဲ့ရမှာ နေအိမ်တွေမှာ ဇနီးဖြစ်သူတွေကိုသာ တွေ့ရှိခဲ့ပြီး အိမ်အတွင်းရှာဖွေရာမှ WY စိတ်ကြွရူးသွပ်ဆေးပြား ၃၈ ပြားကို ထပ်မံရှာဖွေတွေ့ရှိခဲ့ပါတယ်။
မူးယစ်ဆေးဝါးတွေ လက်ဝယ်တွေ့ရှိသူနဲ့ သုံးစွဲဖို့ ၀ယ်ယူခဲ့သူ ၂ ဦးတို့ကို လက်ရှိမှာ အမှုဖွင့် အရေးယူဆောင်ရွက်တာတွေ ပြုလုပ်ထားပြီး ထွက်ပြေးလွတ်မြောက်နေသူတွေ ဖမ်းဆီးရမိရေးကိုလည်း ဆောင်ရွက်နေတယ်လို့ ဖြူးမြို့မရဲတပ်ဖွဲ့စခန်းမှ တာဝန်ရှိသူတဦးက ပြောပါတယ်။
အခုထွက်ပြေး လွတ်မြောက်နေသူတဦးမှာ မူးယစ်ဆေးဝါးမှုနဲ့ ထောင်ကြဖူးသူဖြစ်ပြီး ၂၀၁၉ ခုနှစ်မှာ ဖြူးမြို့နယ်အတွင်း မူးရစ်ဆေးဝါးမှု ၃ မှု ဖမ်းဆီးရမိခဲ့ကြောင်း ဖြူးမြို့နယ်ရဲတပ်ဖွဲ့မှူးရုံးမှ သိရပါတယ်။
သတင်း - ကျော်အောင်(ကညွတ်ကွင်း)