မြောင်ကျေးရွာတွင် အေဒီ ၁၃ ရာစု ရှေးဟောင်းဘုရားစေတီ ၂၇ ဆူ တူးဖော်တွေ့ရှိ
DVB
·
January 21, 2019
ညောင်ဦးခရိုင်၊ ညောင်ဦးမြို့နယ် စဥ့်ကူတိုက်နယ်၊ ကြအိုကျေးရွာအုပ်စု မြောင်ကျေးရွာမှာ အေဒီ ၁၃ ရာစုမှ ရှေးဟောင်း စေတီတော် ၂၇ ဆူကို တူးဖော်တွေ့ရှိထားပြီး နောက်ထပ် အနည်းဆုံး ၆ ဆူလောက်ရှိသေးတယ်လို့ စတင်ရာကနေ ပါဝင်ဆောင်ရွက်နေသူ ဦးချစ်ဦးက ပြောပါတယ်။
“ခြုံနွယ်တွေ ကြားထဲကနေ ၂၀၁၈ ခုနှစ် ၃ လပိုင်း ဝန်းကျင်က စတင်ဆောင်ရွက်ခဲ့ပြီး လိုအပ်တဲ့ လမ်းအတွက်လည်း ယာခင်းရှင်တွေဆီက အလှူခံခဲရပြီး လက်ရှိအခြေအနေကိုတော့ ပြုပြင်ပြီး စေတီ ၁၅ ဆူ နောက်ထပ် တူးတော့ တူးပြီးပြီ၊ မပြင်ရသေးတဲ့ စေတီက ၁၂ ဆူ ပေါင်းလိုက်တော့ ၂၇ ဆူ၊ နောက်ထပ်မြေကြီးထဲမှာ အနည်းဆုံး ၆ ဆူလောက် ရှိနေသေးတယ်၊ အားလုံး ၃၃ ဆူ။ ကျနော်တို့ နဂိုက ချုံတွေ ပေါင်းတွေ မရှင်းခင်က ၁၁ ဆူလောက်ရှိမယ်လို့ ခန့်မှန်း ခဲ့ပေမယ့် အခုတော့ ၃၃ ဆူ ဟာ အနည်းဆုံးပဲ။ နောက်ထပ်လည်း ထပ်ပြီးပေါ်နိုင်သေးတဲ့ ကုန်းတွေရှိနေသေးတယ်။ ၁၉၆၀ ခုနှစ် ဒီဇင်ဘာလက ရှေးဟောင်းဌာနက ရွှေဘုံသာကနေ ကျောက်စာကို သိမ်းဆည်းသွားပါတယ်။ အဲဒီကျောက်စာရဲ့ ခုနှစ်အရ နှစ်ပေါင်း ၇၉၀ တနည်းအားဖြင့် AD ၁၃ ရာစု အနည်းဆုံးရှိနိုင်ပါတယ်။ အဲဒါကြောင့် ပုဂံခေတ်က ရွာကြီး ၁၉ ရွာကို စကေးချပြောပါဆိုရင် စဥ့်ကူရွာနဲ့ အနီးဆုံးဖြစ်ပါတယ်။”
ရှေးဟောင်းသုတေသနဌာန ညွှန်ကြားရေးမှူ (ငြိမ်း) ဦးအောင်ကြိုင်က “မကြာမကြာ လာရောက်ဆောင်ရွက်နေပြီး ပုဂံညောင်ဦးမြို့နယ် သံဃာ့နာယကဆရာတော်ကြီး ဦးပညာသီရိ သြဝါရအတိုင်း တူးဖော်ရာမှာတွေ့ရှိတဲ့ ရွှေလို့ယူဆရတဲ့ လက်ကောက်နှစ်ကွင်းနဲ့ ကြေညိုရောင်ဖလား စတဲ့ တန်ဖိုးရှိပစ္စည်းတွေကိုလည်း တွေ့ရှိတယ်၊ ဘုရားနေရာအတိုင်း ဌာပနာ ပြန်လည်ထည့်သွင်းခဲ့တယ်” လို့ ပြောပါတယ်။
မြောင် ကျေးရွာတာဝန်ခံ ဦးငွေပေါ်က “နဂိုတုန်းက ရွှေဘုံသာ ရှေးဟောင်းဘုရားတဆူသာ ဖူးမြော်နိုင်ရတဲ့ အနေအထားပါ။ အဲဒီကနေ ဦးချစ်ဦး၊ ဒေါ်ယာဉ်နွဲ့နဲ့ ဦးညွှန့်မောင်တို့ ရောက်ရှိလာပြီး ရှေးဟောင်းဘုရားကို ပြုပြင်ချင်တယ်ဆိုပြီး လာပြောလို့ သက်ဆိုင်ရာ ဌာနအသီးသီးကို တင်ပြပြီးတော့ အဲဒီကနေ တဖြည်းဖြည်းနဲ့ ဦးချစ်ဦးတို့နဲ့ မြောင်ကျေးရွာ လယ်ကန်ကျေးရွာနဲ့တင် မဖြစ်တော့ဘဲ တခြားရွာတွေကိုလည်းဖိတ်ပြီး ပရဟိတအသင်းတွေကော ဝိုင်းဝန်းဆောင်ရွက်ကြလို့ ဒီနေ့ ဒီအခြေအနေထိ ဖြစ်လာတာပါ။ အလှူရှင်လည်း လိုအပ်နေပါတယ်။ ရေမီးကအစအခက်အခဲတွေ ရှိနေပါတယ်။ အားလုံးအလှူရှင်အနေနဲ့ ဘုရားတွေ ပြုပြင်မွမ်းမံဖို့တင် သိန်း ၁၀၀၀ လောက် လိုအပ်မှာပါ။ ရေနဲ့ပတ်သက်ရင် ကျနော်တို့နေရာက ပေ ၆၀၀ ကျော်လောက်တူးမှ ရေရတာ ဆိုတော့ သိန်း ၂၀၀ ဝန်းကျင်နဲ့ လျှပ်စစ်မီးက ဒီနားလေး ဇရပ်နားဆွဲမယ်ဆိုရင်ကို သိန်း ၂၀၀ လောက်ကုန်လိမ့်မယ်လို့ ခန့်မှန်းထားပါတယ်”လို့ ပြောပါတယ်။
ရွှေဘုံသာ ရှေးဟောင်းဘုရားစေတီတွေ တူးဖော်ပြင်ဆင်နေလို့ အခုဆိုလျှင် ဘုရားဖူးလာရောက်သူ၊ လုပ်အားပေးဒါန ပြုလုပ်သူတွေလည်း ရှိနေကြပြီး ချောက်-ညောင်ဦး ကားလမ်း မီးလောင်ဖျား ကျေးရွာမှ အရှေ့ဘက်(၁)မိုင်ကျော် လယ်ကန် ကျေးရွာနဲ့ မြောင်ကျေးရွာ ခြားမှာ တွေ့ရမှာဖြစ်ပါတယ်။
သတင်း - ကိုလင်း(ချောက်)