မြိတ်တွင် စိတ်ကျန်းမာရေးမကောင်းသည့် ချစ်သူအား သားမယားပြုကျင့် လူသတ်မှုဖြစ်ပွား
DVB
·
January 20, 2019
မြိတ်မြို့၊ မြိတ်တောင်ကျေးရွာ၊ ရွှေပြည်တန်လမ်းမကြီး၊ အဝေးပြေးကားဝင်းသစ်အနီးမှာ ဇန်နဝါရီလ ၂၀ ရက် မနက် ၁ နာရီလောက်က စိတ်ကျန်းမာရေးမကောင်းတဲ့ အမျိုးသမီးကို သားမယားပြုကျင့်ပြီး လူသတ်မှုဖြစ်ပွားခဲ့တယ်လို့ ရဲက ပြောပါတယ်။
နယ်ထိန်းဒုရဲအုပ်ထွန်းထွန်းနိုင်နဲ့အဖွဲ့ဟာ လှည့်ကင်းဆောင်ရွက်နေစဉ် ရွှေပြည်တန် လမ်းမကြီး၊ လမ်းသွယ် ၁ အရောက်မှာ ဘေးတွဲဆိုင်ကယ် ၁ စီးနဲ့ စုံတွဲတတွဲတွေ့တဲ့အတွက် မေးမြန်းရာမှ သားမယားအဖြစ်ပြုကျင့်မှု၊ လူသတ်မှုပေါ်ပေါက်ခဲ့ကြောင်း သိရပါတယ်။
ဇေယျာသီရိ ၁ ရပ်ကွက်မှာနေတဲ့ သန်းထိုက်ဦး(ခ) ပါပူး (၂၈) နှစ် ဆိုသူဟာ သူရဲ့ ချစ်သူ မမိုးသွယ်အေး (၂၈ နှစ်) ကို ဘေးတွဲဆိုင်ကယ်နဲ့ ခေါ်ဆောင်ကာ မိုးသွယ်အေးမှာ စိတ်ကျန်းမာရေး မကောင်းသူတဦးဖြစ်တာကို အခွင့်ကောင်းယူပြီး လူအသွားအလာပြတ်တဲ့ ရွှေပြည်တန် လမ်းမကြီး၊ လမ်းသွယ် ၁ အရောက်တွင် သန်းထိုက်ဦး မှ မိုးသွယ်အေး အားသားမယားအဖြစ် ၂ ကြိမ် ကျူးလွန်ပြီး မိုးသွယ်အေးမှ အိမ်မပြန်ရဲတော့ကြောင်းပြောရာ သန်းထိုက်ဦးမှ ဘေးတွဲ ပေါ်ပါလာတဲ့ လက်သန်းလုံးလောက်ရှိတဲ့ နိုင်လွန်ကြိုးနဲ့ လည်ပင်းညစ်သတ်ခဲ့ကြောင်း သိရပါတယ်။
“အဝေးပြေးကားဝင်းသစ်ဘက်မှာ ညဘက်ဆိုစုံတွဲတွေချိန်းတွေ့ပြီး မကြာခဏ ပြဿနာ တက်လို့ အဲဒီဘက်ကို လှည်ကင်းဆောင်ရွက်တော့ လမ်းသွယ် ၁ ထဲမှာ အတွဲတစ်တွဲ ထိုင်နေတာ တွေ့တယ်။ ကောင်လေးက ကောင်မလေးကိုနောက်က သိုင်းဖက်ထားတယ်။ အိမ်ပြန်ခိုင်းတော့ လည်း မပြန်ဘူး၊ မသင်္ကာလို့ ဖက်ထားတာကို ဖယ်ခိုင်းလိုက်တော့ ကောင်မလေးက ပက်လက်လှန်လဲကျသွားတယ်။ စစ်ဆေးလိုက်တော့ ကောင်မလေးက အသက်မရှိတော့ဘူး၊ လည်ပင်းမှာလည်း လက်သန်းလုံးအရွယ် နိုင်လွန်ကြိုးနဲ့တွေ့တယ်”လို့ နယ်ထိန်းခေါင်းဆောင် ဒုရဲအုပ်ထွန်းထွန်းနိုင်က ပြောပါတယ်။
ဖြစ်စဉ်နဲ့ပတ်သက်ပြီး သန်းထိုက်ဦး(ခ)ပါပူး ကို မြိတ်မြို့မရဲစခန်းမှ ရာဇသတ်ကြီးပုဒ်မ ၃၇၆ /၃၀၂ နဲ့ အရေးယူထားကြောင်း သိရပါတယ်။
သတင်း - မြတ်ထွဋ် (မြိတ်)