ဒေသလုံခြုံမှုမရှိ၍ ပန်ပီး ပြည်သူ ၅၀၀ ကျော် UWSA ထံ ထွက်ပြေးခိုလှုံ
DVB
·
January 6, 2019
ရှမ်းပြည်နယ်တောင်ပိုင်း မိုင်းပန်မြို့နယ် ပန်ပီးဒေသ နားမွန်းကျေးရွာအုပ်စုမှာ အပစ်ရပ်လက်မှတ်ရေးထိုးထားတဲ့ RCSS/SSA နဲ့ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) တို့ တိုက်ပွဲဖြစ်ပွားပြီးနောက် ဒေသလုံခြုံမှု မရှိတဲ့အတွက် ဒေသခံတွေ နေရပ်စွန့်ခွာပြီး UWSA နယ်မြေထဲ လာရောက်ခိုလှုံတာ လူဦးရေ ၅၀၀ ကျော်ရှိပြီလို့ သိရပါတယ်။
ပြီးခဲ့တဲ့နှစ် ဒီဇင်ဘာ လကုန်ပိုင်းက တိုက်ပွဲတွေ ဖြစ်ပွားပြီးနောက် ရှမ်းပြည်ပြန်လည် ထူထောင်ရေးကောင်စီ/ရှမ်းပြည်တပ်မတော် RCSS/SSA လက်နက်ကိုင်အဖွဲ့က မိုင်းပုတ်ရွာသားတွေကို ရွာမှာ ဆက်မနေဖို့ ခြိမ်းခြောက်ခြင်းမှုတွေ ရှိနေတဲ့အတွက် မနေရဲတော့ဘဲ နေရပ်စွန့်ခွာရတာလို့ ဒေသခံတွေက ပြောပါတယ်။
“အရင်တခါကလည်း အိမ်မီးလာရှို့ဖို့ လုပ်သေးတယ်၊ မီးမလောင်ဘူး၊ သေနတ်နဲ့လည်း လှမ်းပစ်သေးတယ်၊ လူတော့မထိဘူး သစ်ပင်ပဲထိတယ်။ လွိုင်လင်မြို့နယ်မှာ တပ်မတော်ရှိတယ်၊ ရဲတွေရှိတယ်၊ ပအိုဝ်းစစ်သားလည်းရှိတယ်။ ဒါတောင် လုံခြုံရေးက ပိုဆိုးတယ်။ ဒါကြောင့် မနေရဲဘဲ နေရပ်စွန့်ရတာပါ” လို့ အမည်မဖော်လိုတဲ့ ဒေသခံတဦးက ပြောပါတယ်။
ဝပြည်သွေးစည်းညီညွတ်ရေးတပ်မတော် UWSA တောင်ပိုင်း ဆက်ဆံရေးမှူး ဦးဆမ်လော့က “ဒီဇင်ဘာလကုန်ပိုင်းလောက်ဖြစ်မယ်၊ ထွက်ပြေးလာတယ်။ ကျနော့်ဖုန်းကိုဆက်သွယ်တာ၊ အထက်ကိုတင်ပြ လက်ခံတော့ လက်ခံထားတယ်။ ပြည်သူ လေးငါးရာလောက်ရှိပြီ။ စာရင်းအတိကျမရသေးဘူး၊ သူတို့ပြောတာက အဲဒေသမှာ RCSS အဖွဲ့က နေရာတကာ နေရာယူ၊ မီးတုတ်တွေ သေနတ်တွေနဲ့ အားလုံး ရိုက်ထုတ်မယ် ခြိမ်းခြောက်တော့ လူထုတွေလန့်ပြီး မြောက်ပိုင်းပုံစံလိုဖြစ်မှာစိုးလို့ ထွက်ပြေးတာ အဲလိုပုံစံပါ” လို့ ပြောပါတယ်။
ဒီကိစ္စနဲ့ပတ်သက်ပြီး RCSS/SSA အဖွဲ့ တောင်ကြီး ဆက်ဆံရေးရုံး တာဝန်ခံ ဗိုလ်မှူးကြီး စိုင်းဦးက “ကျနော်တို့ မခြိမ်းခြောက်ရဘူး၊ တိုက်ပွဲဖြစ်ပွားပြီးနောက် ပြည်သူတွေက မနေရဲလို့ ထွက်ပြေးတာ၊ တိုက်ပွဲမဖြစ်ခင်က အဲဒေသမှာ အေးချမ်းနေတယ်၊ ဘာမှမဖြစ်ဘူး၊ ဒီကိစ္စက လူကြီးပိုင်းတွေ တွေ့ဆုံညှိနိုင်းမှ အဖြေရမှာပါ” လို့ ပြောပါတယ်။
အခု ဇန်နဝါရီ ၆ ရက်နေ့အထိ ပန်ပီး၊ မိုင်းပုတ်ရွာသား နေရပ်စွန့်ခွာသူ စုစုပေါင်း ၅၀၀ လောက် ရှိပြီဖြစ်ပြီး စာသင်ကျောင်းတွေလည်း ပိတ်ထားရတယ်လို့ သိရပါတယ်။
ခွန်ရာဇာ