New year ည ချောက်မြို့တွင် အရေးပေါ်လူနာတင်ယာဉ်များ အသင့်အနေအထားဖြင့် ဆောင်ရွက်မည်
DVB
·
December 29, 2018
မကွေးတိုင်းဒေသကြီး ချောက်မြို့မှာ New year ညကို အရေးပေါ်လူနာတင်ယာဉ်တွေ အသင့်အနေအထားနဲ့ နေရာဖြန့် ဆောင်ရွက်သွားမယ်လို့ မကွေးတိုင်းဒေသကြီး ချောက်မြို့ မနောဖြူ လူမှု ကူညီရေးအသင်းက ပြောပါတယ်။
မနောဖြူလူမှုကူညီရေးအသင်း အတွင်းရေးမှူး ဦးမျိုးဝင်းက “အဲဒီညမှာ ချောက်မြို့ရဲ့ နေရာသုံးခု အနော်ရထာ တံတားထိပ် ဗိုလ်ချုပ်ပန်းခြံမှာ ၁ စီး၊ သခင်ဘိုးလှကြီး ကြေးရုပ် မေဒေးကျောက်တိုင်မှာ ၁ စီးနဲ့ အေးစေတီဘုရားခြေတော်ရင်း မနောဖြူ အသင်းရုံးမှာ ၁ စီး အရေးပေါ်လူနာတင်ယာဉ် ၃ စီး၊ လူအင်အား ၂၀ နဲ့ အသင့်စောင့်ပြီး ကူညီပေးသွားမယ်” လို့ ပြောပါတယ်။
ချောက်မြို့နယ် မြို့မရဲစခန်းကလည်း New year ညမှာ ခိုက်ရန်ဖြစ်ပွားမှု၊ ထိခိုက်မှု မရှိစေရေးအတွက် လှည့်ကင်း အင်အားကို သာမန်ထက် နှစ်ဆ တိုးမြှင့်ဆောင်ရွက်သွားမယ်လို့ စခန်းတာဝန်ရှိသူက ပြောပါတယ်။
နှစ်သစ်ကူးညကနေ ဇန်နဝါရီ ၄ ရက် လွတ်လပ်ရေးနေ့အထိ လုံခြုံရေး ကျိုးပေါက်မှု မရှိစေဖို့ မြို့နယ်ရဲတပ်ဖွဲ့နဲ့ ရပ်ကွက်ကျေးရွာ ဥက္ကဋ္ဌတွေကို အထူးသတိပြုဆောင်ရွက်ဖို့ ချောက်မြို့နယ် အထွေထွေအုပ်ချုပ်ရေးမှူးက မှာကြားထားတယ်လို့ သိရပါတယ်။
New year ညကို အနယ်နယ်အရပ်ရပ်မှာ ပျော်ပွဲရွင်ပွဲတွေ၊ အစုအဖွဲ့တွေဖွဲ့ပြီး နှစ်စဉ်လိုလို ဆင်နွှဲကြတာပါ။
ကိုလင်း(ချောက်)