ဆိပ်ခံဗောရေယာဉ် မီးလောင်၊ လူ ၆ ဦး ဒဏ်ရာရ
Aung Aung Naing
·
December 26, 2018
မန္တလေးတိုင်းဒေသကြီး၊ ပုသိမ်ကြီးမြို့နယ်၊ သံဘိုကျွန်းကျေးရွာအုပ်စု ဧရာဝတီမြစ်ကမ်းဘေးက မရမ်းခြံဆိပ်ကမ်းမှာ ဆိုက်ကပ်ထားတဲ့ ဆိပ်ခံဗော မော်တော်တစီး ဒီမနက်က မီးလောင်ပြီး လူ ၆ ဦး ဒဏ်ရာရသွားပါတယ်။
သံထည်နဲ့ ပြုလုပ်ထားတဲ့ အလျား ၆၀ပေ၊ အနံ ၁၅ပေ၊ အမြင့် ၁၅ပေရှိ ဆိပ်ခံဗော မော်တော်ပေါ်မှာ လျှပ်စစ်ရေနွေးအိုး တည်ထားခဲ့ရာက မီးပလပ်ခုံကစပြီး အပူချိန်လွန်ကဲကာ အနီးအနားမှာထားတဲ့ အောက်တိန်းဓာတ်ဆီထည့်ထားတဲ့ ဆီပေပါကို ကူးစက် မီးလောင်ခဲ့တာပါ။
မီးလောင်မှုကြောင့် ရေယာဉ်ပေါ်မှာ ရှိနေသူ ၆ ယောက် ဒဏ်ရာရသွားပြီး မန္တလေး ဆေးရုံကြီးကို တင်ပို့ ဆေးကုသထားရပါတယ်။
မီးလောင်မှုကြောင့် မော်တော်နဲ့ ပစ္စည်းတချို့ ပျက်စီးဆုံးရှုံးခဲ့ကာ ကာလတန်ဖိုးငွေကျပ် ၃,၃၅၀,၀၀၀ လောက်ရှိနိုင်မယ်လို့ မန္တလေးခရိုင် မီးသတ်ဦးစီးဌာန တာဝန်ရှိသူ ဦးသန်းဇော်ဦးက ပြောပါတယ်။
မီးလောင်မှုနဲ့ ပတ်သက်ပြီး ဆိပ်ခံဗောမော်တော် ပိုင်ရှင် ဦးမျိုးမင်းသန့်ကို ပုသိမ်ကြီး မြို့မရဲစခန်းက(ပ) ၅၀၄/၂၀၁၈ / ပုဒ်မ၂၈၅/၃၃၇နဲ့ အမှုဖွင့် အရေးယူထားပါတယ်။
