နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ UNDP အာရှ-ပစိဖိတ် ဒေသဆိုင်ရာ ညွှန်ကြားရေးမှူးနဲ့ မနေ့က တွေ့ဆုံပြီး ရခိုင်ပြည်နယ် လူမှုစီးပွားဖွံ့ဖြိုးတိုးတက်ရေးနဲ့ ပြည်တွင်းငြိမ်းချမ်းရေး အကူညီပေးရေး ကိစ္စရပ်တွေ ဆွေးနွေးခဲ့ကြပါတယ်။ ဒေါ်အောင်ဆန်းစုကြည်ဟာ ကုလသမဂ္ဂလက်ထောက် အတွင်းရေးမှူးချုပ်နှင့် UNDP ရဲ့ အာရှ-ပစိဖိတ် ဒေသဆိုင်ရာ ညွှန်ကြားရေးမှူး Mr. Haoliang Xu နဲ့ အဖွဲ့ကို ဒီဇင်ဘာ ၁၃ ရက်နေ့ မနက် ၁၀ နာရီက နေပြည်တော်ရှိ နိုင်ငံခြားရေးဝန်ကြီးဌာနမှာ တွေ့ဆုံခဲ့တာပါ။ တွေ့ဆုံရာမှာ မြန်မာအစိုးရရဲ့ တရားဥပဒေစိုးမိုးရေး၊ လူမှုစီးပွားဘဝ ဖွံ့ဖြိုးတိုးတက်ရေး၊ အမျိုးသားပြန်လည်သင့်မြတ်ရေးနဲ့ ပြည်တွင်း ငြိမ်းချမ်းရေး လုပ်ငန်းစဉ်တို့မှာ UNDP က ဆက်လက်ကူညီပံ့ပိုးရေး၊ မြန်မာနိုင်ငံအစိုးရ၊ UNDP နဲ့ UNHCR တို့အကြား ၆-၆-၂၀၁၈ ရက်က လက်မှတ်ရေးထိုးခဲ့တဲ့ MoU အကောင်အထည် ဖော်ဆောင်ရွက်နေမှုနဲ့ ဖြစ်ပေါ်တိုးတက်မှုတွေ၊ ရခိုင်ပြည်နယ်ရှိ အသိုက်အဝန်းများ၏ လူမှုစီးပွား ဖွံ့ဖြိုးတိုးတက်ရေးအတွက် ဆောင်ရွက်နေမှုအခြေနေတွေ ဆွေးနွေးခဲ့ကြတယ်လို့ အတိုင်ပင်ခံရုံးက သတင်းထုတ်ပြန်ပါတယ်။ တွေ့ဆုံပွဲကို အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး ဌာန ပြည်ထောင်စုဝန်ကြီး ဦးကျော်တင်နဲ့ နိုင်ငံခြားရေးဝန်ကြီးဌာနမှ တာဝန်ရှိသူတွေ တက်ရောက်ခဲ့ကြပါတယ်။