လူသတ်ထွက်ပြေးလာသည့် ထိုင်းဝရမ်းပြေးကို မြန်မာဘက်တွင် ဖမ်းမိ
DVB
·
December 14, 2018
ထိုင်းနိုင်ငံမှာ လူသတ်ပြီး ထွက်ပြေးနေခဲ့တဲ့ တရားခံဝရမ်းပြေးအမျိုးသားတဦးကို မြန်မာနိုင်ငံဘက်မှာ ဖမ်းမိခဲ့တယ်လို့ ဘန်ကောက်ပို့စ်သတင်းမှာ ဒီကနေ့ဖော်ပြပါတယ်။
ဒီအဖြစ်အပျက်ဟာ ထိုင်းနိုင်ငံ၊ ထရန်ခရိုင်ထဲက အရက်ဘားတခုထဲမှာ ပြီးခဲ့တဲ့ နိုဝင်ဘာ ၅ ရက်နေ့က ဖြစ်ခဲ့တာဖြစ်ပြီး သေနတ်နဲ့ ပစ်ခတ်မှုကြောင့် အမျိုးသားတဦး သေဆုံးကာ တခြားလူ ၈ ယောက်လောက်လည်း ထိခိုက်ဒဏ်ရာတွေ ရရှိခဲ့ကြတာ ဖြစ်ပါတယ်။
လက်ရှိမှာ အသက် ၃၄ နှစ်အရွယ် တရားခံ ချိုင်ယာဖိုလ် ခုမ်ဆီယမ်မိုင်ကို ထိုင်း-မြန်မာနယ်စပ် တာချီလိတ်မြို့ စစ်ဆေးရေးဂိတ်မှာ ဒီဇင်ဘာ ၁၁ ရက်နေ့ ညနေ ၅ နာရီဝန်းကျင်က ဖမ်းမိခဲ့တယ်လို့ ထိုင်းရာဇ၀တ်ပြစ်မှုနှိမ်နင်းရေးဆိုင်ရာ ရဲဌာနက ပြောပါတယ်။
တရားခံအမျိုးသား ချိုင်ယာဖိုလ်ကိုတော့ ထရန်ခရိုင်တရားရုံးကနေ နိုဝင်ဘာ ၆ ရက်နေ့မှာ လူသတ်မှုနဲ့ ဖမ်းဝရမ်းထုတ်ပြန်ခဲ့တာဖြစ်ပြီး တရားမ၀င်လက်နက် လက်ဝယ်ကိုင်ဆောင်မှု၊ အများပြည်သူနဲ့ဆိုင်တဲ့နေရာကို သယ်ဆောင်သွားလာမှုတွေနဲ့ စွဲချက်တင်ထားတာပါ။
ထွက်ပြေးလွတ်မြောက်နေတဲ့ တရားခံဟာ မြန်မာနိုင်ငံဘက်ကို ထွက်သွားခဲ့တယ်ဆိုတဲ့ သတင်းပေးချက်တွေအရ ထိုင်းရာဇ၀တ်ပြစ်မှုနှိမ်နင်းရေးဆိုင်ရာရဲဌာနဟာ မြန်မာနိုင်ငံရဲတပ်ဖွဲ့နဲ့ ပူးပေါင်းဖမ်းဆီးနိုင်ဖို့ ကြိုးစားခဲ့တာ ဖြစ်ပါတယ်။
ဒီဇင်ဘာ ၁၁ ရက်နေ့မှာတော့ တာချီလိတ် စစ်ဆေးရေးဂိတ်မှာ ယာဉ်တစီးကို တားပြီး စစ်ဆေးချိန် အဆိုပါ တရားခံထိုင်းအမျိုးသားနဲ့ မြန်မာ ၂ ဦး အပါအ၀င် တခြားထိုင်းနိုင်ငံသား ၃ ဦးကိုလည်း တွေ့ရှိခဲ့ရတာပါ။
အဲဒီနောက် သူတို့ ၆ ဦးစလုံးကို တာချီလိတ်ရဲစခန်းဆီ ပို့ဆောင်ခဲ့ပြီးနောက် တရားခံကို ပြစ်ဒဏ်ချမှတ်ဖို့ ထိုင်းနိုင်ငံဘက်ကို ပြန်လည်လွှဲပြောင်းခဲ့တယ်လို့ ဆိုပါတယ်။
စစ်ဆေးချက်တွေအရ အဆိုပါ တရားခံအမျိုးသား ချိုင်ယာဖိုလ်ဟာ ရာဇ၀တ်ပြစ်မှုဆိုင်ရာ မှတ်တမ်းရှိသူဖြစ်ပြီး ၂၀၀၃ ခုနှစ်ကလည်း ဖမ်းဆီးခံခဲ့ဖူးပြီး ၂၀၁၇ ခုနှစ်တုန်းကလည်း လူသတ်ဖို့ ကြံစည်အားထုတ်မှုနဲ့ ဖမ်းခံခဲ့ရသေးတယ်လို့ ဆိုပါတယ်။