ရတနာပုံဆိုင်ဘာစီးတီး ကျောင်းသားအသတ်ခံရမှု တရားခံအစစ်အမှန်ကို ဖမ်းဆီးရန်တောင်းဆို
Aung Aung Naing
·
December 11, 2018
ပြင်ဦးလွင်မြို့နယ် နည်းပညာတက္ကသိုလ်၊ ရတနာပုံဆိုက်ဘာစီးတီး ကျောင်းသား တဦး အသတ်ခံခဲ့ရတာနဲ့ပတ်သက်ပြီး ကျောင်းသားသမဂ္ဂအဖွဲ့ဝင်တွေနဲ့ မန္တလေးတိုင်း ဒေသကြီး အစိုးရအဖွဲ့တို့ ဒီနေ့ တွေ့ဆုံပါတယ်။
အခုလိုတွေ့ဆုံရာမှာ တရားခံအစစ်အမှန်ကို အမြန်ဆုံး ဖမ်းဆီးရမိစေရေးကျောင်း ပတ်ဝန်းကျင်လုံခြုံရေး တိုးမြှင့်ပေးရေးတို့ကို အဓိကထား တောင်းဆိုခဲ့ကြတယ်လို့ နည်းပညာ တက္ကသိုလ် ရတနာပုံဆိုက်ဘာစီးတီး ကျောင်းသားများသမဂ္ဂဥက္ကဋ္ဌ ကိုခွန်နိုင်ပြည့်ထွန်း ကပြောပါတယ်။
“မန္တလေးတိုင်းအစိုးရအဖွဲ့ဝန်ကြီးတွေနဲ့ တွေ့ခွင့်ရခဲ့ပါတယ်။ နယ်လုံဝန်ကြီးရော တိုင်းဒေသကြီး ရဲတပ်ဖွဲ့၊ ခရိုင် မြို့နယ် ရဲတပ်ဖွဲ့က တာဝန်ရှိသူတွေပါကြတယ်။ သူတို့အနေ တရားခံ ဖမ်းဆီးရေးကိုလည်း စစ်မှန်တဲ့ တရားခံဖြစ်ဖို့အတွက် DNA စစ်တာကအစ တိတိကျကျ အသေးစိတ် လုပ်မယ်ပြောတယ်အတွက် အားရကျေနပ်မိတယ်။ တရားစွဲတဲ့ အချိန်မှာ လည်း ပြစ်ဒဏ်လေးနက်တဲ့ ပုဒ်မတွေနဲ့ အရေးယူနိုင်အောင် ဆောင်ရွက်မယ်ပြောတယ်”
နည်းပညာတက္ကသိုလ် ရတနာပုံဆိုင်ဘာစီးတီးရဲ့ ပတ်ဝန်းကျင်မှာ လှည့်ကင်းပတ်ကင်းတွေ ချထားပေးမယ့်အပြင် လုံခြုံရေးရဲကင်းလည်း ချထားပေးသွားမယ်လို့ မန္တလေးတိုင်းဒေသကြီး အစိုးရအဖွဲ့က ကတိပေးပြောကြားခဲ့တယ်လို့ ဆိုပါတယ်။
နည်းပညာတက္ကသိုလ် ရတနာပုံ ဆိုင်ဘာစီးတီးမှာ ICT မေဂျာနဲ့ ဒုတိယနှစ် ပညာသင်ကြားနေတဲ့ ကိုထက်လင်းသန့်ဟာ ဒီဇင်ဘာ ၆ ရက်ညနေက အသတ်ခံခဲ့ရတာ ဖြစ်ပြီး ဒီဇင်ဘာ ၁၀ ရက်မှာ တရားခံတချို့ကို ဖမ်းဆီးရမိခဲ့ပါတယ်။
ရတနာပုံဆိုင်ဘာစီးတီး ပါမောက္ခနဲ့ တာဝန်ရှိသူတွေကလည်း ဒီအမှုကိစ္စ တိုင်းဒေသကြီးအစိုးရနဲ့ ဆွေးနွေးခဲ့ကြပြီး ကျူးလွန်သူတွေကို ရာဇသတ်ကြီးပုဒ်မ ၃၀၂/၃၉၄/၁၄နဲ့ အမှုဖွင့်ထားပါတယ်။
