မောင်တောတွင် ကျပ်သိန်း ၃၈၀၀၀ ကျော်တန်ဖိုးရှိ စိတ်ကြွဆေးများ ဖမ်းမိ
DVB
·
December 7, 2018
ရခိုင်ပြည်နယ်၊ မောင်တောမြို့ ၄ မိုင် စစ်ဆေးရေးဂိတ်မှာ ဒီဇင်ဘာ ၆ ရက် နေ့လယ်ပိုင်းက ကာလတန်ဖိုး ကျပ်သိန်းပေါင်း ၃၈၀၀၀ ကျော် တန်ဖိုးရှိ wy စိတ်ကြွဆေးပြား ၁၉ သိန်းကျော်ကို တရားခံတွေနဲ့အတူ ဖမ်းဆီးရမိခဲ့ပါတယ်။
ဘူးသီးတောင်ကနေ မောင်တောကို မောင်းနှင်လာတဲ့ ကုန်တင်ကားကို မောင်တောမြို့ ၆ မိုင်စစ်ဆေးရေးဂိတ်မှာ သတင်းအရ အသင့်စောင့်ဆိုင်းနေတဲ့ ပူးပေါင်းအဖွဲ့က တားဆီး ရှာဖွေခဲ့တာပါ။
ရှာဖွေရာမှာ wy စာတမ်းပါ ပန်းရောင် စိတ်ကြွဆေးပြား ၁၀၀၀၀ ပြားခန့်ပါ ၃၅ ထုပ်၊ ၉၇၅၀ ပြားစီပါ ၁၆၄ ထုပ်၊ စုစုပေါင်း ၁၉၉ ထုတ် စိတ်ကြွဆေးပြားစုစုပေါင်း ၁၉၄၀၂၅၀ ပြား၊ ကာလတန်ဖိုးကျပ်သိန်းပေါင်း ၃၈၈၀၅ တန်ဖိုးရှိ စိတ်ကြွဆေးပြားတွေ ဖမ်းဆီးရမိခဲ့တယ်လို့ မောင်တောခရိုင် မူးယစ်အထူးတပ်ဖွဲ့က ပြောပါတယ်။
ဖမ်းဆီးရမိတဲ့ တရားခံ ယာဉ်မောင်းညီမျိုးသန့်နဲ့ ယာဉ်နောက်လိုက် အာဇီဇူလောင် တို့ကို စစ်ဆေးချက်အရ ဘူးသီးတောင်မြို့ မီးရထားဆိပ် အမှတ် ၇ ရပ်ကွက်ရှိ ကျော်သိန်းရဲ့ ဂိုဒေါင်ထဲက တင်ဆောင်လာတဲ့ ပစ္စည်းတွေဖြစ်တယ်လို့သိရပြီး ဘူးသီးတောင်မြို့က ပါဝင်ပတ်သက်သူ တဦးနဲ့ ကွင်းဆက် ဘူးသီးတောင်နဲ့ စစ်တွေက တရားခံ နှစ်ဦးဖမ်းမိထားတယ်လို့ မောင်တောခရိုင် ရဲတပ်ဖွဲ့မှူး ဒုရဲမှူးကြီး ထွန်းမြတ်ထွန်းက ပြောပါတယ်။
နောက်ထပ်ကွင်းဆက်တရားခံတွေကို ဖော်ထုတ်နေပြီး ဖမ်းဆီးရမိသူတွေကို မူးယစ်ဥပဒေနဲ့ ထိရောက်စွာ အရေးယူဖို့ ရဲတပ်ဖွဲ့က လုပ်ဆောင်နေပါတယ်။