ဂျပန်ယန်းငွေ ၂.၅ဘီလီယံ တရားမဝင် ငွေလွှဲမှုဖြင့် မြန်မာ ၅ ဦး ဖမ်းဆီးခံရ
ဇော်ဇော်လှိုင်
·
December 6, 2018
ဂျပန်နိုင်ငံ၊ တိုကျိုမြို့မှာ ယန်းငွေ ၂.၅ဘီလီယံကို တရားမ၀င် ငွေလွှဲပို့ခဲ့တယ်ဆိုတဲ့ စွပ်စွဲချက်နဲ့ မြန်မာနိုင်ငံသား ၅ ဦးကို ဂျပန်ရဲဌာနက ဖမ်းဆီးလိုက်ပါတယ်။
မြန်မာကျောင်းသား ၄ဦးက မြန်မာပြည်ကို ယန်းငွေ ၂၃၀၀၀၀ လွှဲပို့ခဲ့တာကို ခြေရာခံရင်း ဂျပန်ရဲတွေက အခုလိုဖမ်းဆီးခဲ့တာလို့ ဂျပန်သတင်းဌာနတွေမှာ ရေးသားဖော်ပြပါတယ်။
တိုကျိုမြို့မှာ နေထိုင်တဲ့ စိုင်းသန်းဝင်းက “ဆူဂမိုမြို့မှာ ကုန်စုံဆိုင်ဖွင့်ထားတာလေ၊ အဖမ်းခံရတာက အရင်နိုဝင်ဘာထဲက ကြားနေတာပဲ။ အခုမှ သတင်းထုတ်ပြန်တာတော့ ဘာကြောင့်မှန်း မသိဘူး”လို့ ဒီဗွီဘီကို ပြောပြပါတယ်။
“သူက တခြားငွေလွှဲလက်ခံသူတွေထက် စာရင်ဈေးသက်သာတယ်။ နောက်ဒီက ဂျပန် သူ့ ဘဏ်အကောင့်ထဲ ထည့်ပေးလိုက်ရင် မြန်မာပြည်မှာ နေ့ချင်းထုတ်လို့ရတော့ အရမ်းမြန် အဆင်ပြေခဲ့တယ်။ ဒါပေမယ့်ငွေကို ဘဏ်ကနေသူ့ဆီ လွှဲခဲ့တာဆိုတော့ အခု ဂျပန်ရဲက အကုန်လိုက်စစ်ဆေးရင် ကျနော်တို့ပို့ထားတာတွေပါ သိသွားမယ်ထင်တယ်”လို့ စိုင်းသန်းဝင်းက ပြောပါတယ်။
၂၀၀၉ ခုနှစ်မှ ၂၀၁၈ အောက်တိုဘာအထိ မြန်မာနိုင်ငံသား ၁၂,၈၀၀ ဦးထံမှ ယန်းငွေ ၂.၅ ဘီလီယံ ကောက်ယူ ငွေလွှဲပေးခဲ့ပြီး အခုအဖမ်းခံရသူတွေဟာ အကျိုးအမြတ် ယန်း သိန်းပေါင်း ၁၃၀၀ကျော်(မြန်မာငွေကျပ်သိန်းပေါင်း ၁၆၀၀ နီးပါး) ရရှိခဲ့တယ်လို့ ဂျပန်သတင်းတွေက ရေးပါတယ်။
တိုကျိုမှာ လက်ရှိ ငွေလွှဲလုပ်ကိုင်နေသူ မြန်မာလုပ်ငန်းရှင် အမျိုးသားတဦးက “သူတို့က ကားတွေ၊ ဆိုင်ကယ်ကယ်တွေ ဂျပန်က မှာချင်တဲ့ မြန်မာနိုင်ငံက လုပ်ငန်းရှင်တွေရဲ့ ယန်းငွေ ၀ယ်လိုအား များပြီးသူများထက် ဈေးလျော့ပေးတယ်။ နောက် မြန်မာအလုပ်သမားတွေ အများကြီးရှိတဲ့ စက်ရုံတွေကို လှမ်းချိတ်ဆက်ထားပြီးတော့လည်း လစဉ်လုပ်တာဆိုတော့ သူတို့ကို ဂျပန်ရဲက အရင်ထဲက ထောက်လှမ်းနေတာ”လို့ ဒီဗွီဘီကို ပြောပါတယ်။
ခုလိုအဖမ်းအဆီးတွေဖြစ်ပြီးနောက်မှာလည်း ဂျပန်ရောက်မြန်မာပြည်သားတွေကတော့ ကိုယ်လွှဲနေကျလူတွေနဲ့ပဲ ဆက်လက်သွယ်ပြီး မြန်မာပြည်ကို ပုံမှန်ငွေလွှဲနေကြတယ်လို့ သိရပါတယ်။
တိုကျိုကနေ မြန်မာနိုင်ငံက မိသားစုဆီ လစဉ် ငွေပို့ပေးနေတဲ့ မဟေမာန်ကိုက “တရားဝင်ငွေလွှဲလုပ်ငန်းတွေရှိပေမယ့် မြန်မာနိုင်ငံမှာရှိတဲ့ ဘဏ်လုပ်ငန်းတွေရဲ့ ဝန်ဆောင်မှု အားနည်းချက်တွေကြောင့် အခုလို တရားမ၀င် ငွေလွှဲလုပ်ငန်းတွေ ဂျပန်မှာ ဆက်လက် အားကိုးနေရဦးမှာပဲ” လို့ပြောပါတယ်။
ပြည်ပမှ မြန်မာနိုင်ငံအတွင်း တရားမ၀င်ငွေလွှဲလုပ်ငန်းတွေရဲ့ နောက်ကွယ်မှာ တရားမ၀င်ငွေမဲကနေ ငွေဖြူ ဖြစ်အောင် ငွေကြေးခ၀ါချမှုတွေနဲ့ ပတ်သက်မှု တွေရှိတယ်လို့ ပြောဆိုတာတွေရှိနေပါတယ်။
ဂျပန်နိုင်ငံ၊ တိုကျိုမြို့မှာ အရင်ကလည်း တရားမ၀င်ငွေလွှဲလုပ်ငန်း လုပ်ကိုင်တဲ့ မြန်မာလုပ်ငန်းရှင် တဦး ဖမ်းဆီးခံခဲ့ရပေမယ့် တရားရုံးမှာ ဒဏ်ငွေပေးဆောင်ကာ ခံဝန်ကတိနဲ့ ပြန်လည် လွတ်မြောက်ခဲ့ပါတယ်။