The Old Rangoon စာအုပ်ရေးတဲ့ နိုဝယ်ဆင်းဂါးက သူ့စာအုပ်မှာ ရေးတော့ ရန်ကုန်မြို့သစ်တည်ချိန်မှာ သမိုင်းဝင်အဆောက်အုံတွေ အဖြိုဖျက်ခံလိုက်ရတဲ့အတွက် သူအလွန်ဝမ်းနည်းကြောင်း၊ သမိုင်းတန်ဖိုး ဆုံးရှုံးသွားတဲ့အတွက် စိတ်မကောင်းဖြစ်မိကြောင်းကို စာအုပ်အမှာစာမှာ တခုတ်တရ ရေးသားခဲ့ပါတယ်။ အဲ့ဒီအချိန်က မြန်မာတို့ရဲ့ ကြီးကြီးမားမား အဆောက်အုံဆိုတာ စေတီပုထိုးတွေပဲရှိတာပါ။ နိုဝယ်ဆင်းဂါးကလည်း ဒါကိုပဲ ရည် ညွှန်းလိုဟန်ရှိပါတယ်။ သူကိုယ်တိုင်ကလည်း သူ့ရဲ့ လူငယ်ဘဝတလျောက်လုံးက မြန်မာပြည်မှာ ကြီးပြင်းခဲ့ရသူဖြစ်သလို သူ့လူမျိုးရဲ့ မဆင်မခြင်လုပ်ရပ်တွေအပေါ်မှာ အားနားဟန်ရှိတာကို သူ့စာတွေမှာ တွေ့ရပါတယ်။ သူက “ရန်ကုန်မြို့သစ်တည်ဖို့ ဗြိတိသျှတို့ မြို့ကိုရှင်းလိုက်ချိန်တွင် ကြွင်းကျန်ရစ်ခဲ့သော ဘုရားများမှာ ဆူးလေနှင့် ဗိုလ်တထောင်နှစ်ဆူသာ ကျန်ရစ်ခဲ့သည်။ ထိုအချိန်က ဗိုလ်တထောင်မှာ ရွှေမချသေးတဲ့အတွက် အင်္ဂလိပ်တို့က ဘုရားဖြူဟုသာ ခေါ်ခဲ့ကြသည်” လို့ ရေးခဲ့တယ်။ ကျန်ရစ်တာကိုသာ ဖော်ပြပြီး အဖြိုခံရတဲ့ ဘုရားတွေအကြောင်း အတိအကျဖော်မပြခဲ့ပါဘူး။ ဒါပေမယ့် ၁၈၂၄က အစောဆုံးနဲ့ရှေးအကျဆုံး ရေးဆွဲထားတဲ့ J.Grierson ရဲ့ Twlve Select Views of the Seat of War စာအုပ်ထဲက ဆူးလေစေတီနဲ့ ပတ်ဝန်းကျင်ပုံ ရေးဆွဲထားတဲ့ ပန်းချီ ကားကိုတော့ ဖော်ပြညွှန်းဆိုခဲ့ပါတယ်။ အဲ့ဒီပန်းချီကားဟာ ဆူးလေစေတီကို အခုမြို့တော်ခန်းမရှေ့ကနေ ရေးဆွဲထားတာ။ ဆူးလေစေတီတော်ရဲ့နောက်မှာ စေတီနှစ်ဆူပုံပါ ရှိနေတာကို တွေ့မြင်နိုင်ပါတယ်။ အဲ့ဒီစေတီနှစ်ဆူက ကျိုက်မြတ်သံချိုစေတီနဲ့ သျှင်ပင်ရွှေကြိုးစေတီတို့ ဖြစ်နိုင်ဖွယ်ရှိတယ်လို့ ခန့်မှန်းနိုင်ပါတယ်။ ဒီအကြောင်းမပြောမီ ရန်ကုန်မြို့သစ်တည်ဖို့ ပြင်ဆင်ကြပုံအကြောင်း အနည်းငယ်ပြောဖို့ လိုမယ်ထင်တယ်။ မှတ်တမ်းမှတ်ရာတွေအရဆိုရင် မောင်ဂိုမာရီက ၁၉၅၂ ခုနှစ် စက်တင်ဘာလထဲမှာ သူ့အကြံ တည်ဆောက်ရေးအဖွဲ့ကို ချပြခဲ့တယ်။ သူက ရန်ကုန်မြို့သစ်ကို စစ်တုရင်ခုံကွက်ပုံစံအတိုင်း အကွက်ချတည်ဆောက်ဖို့၊ ကမ်းနားလမ်းတလျောက်ကို ဟင်းလင်းပြင်အတိုင်းထားပြီး စီပွားရေးမြို့ပုံစံဖော်ဖို့၊ မြစ်ကမ်းပါး ရေတိုက်စားမှု့ကို ပထမဆုံး အကာကွယ်လုပ်ဖို့။ လမ်းတွေကို အနည်းဆုံးပေ ၆ဝ ရှိဖို့၊ ၂ လမ်းကျဉ်း တလမ်းကျယ်ထားဖို့၊ လမ်းကျယ်ကို ပေတရာထားဖို့နဲ့ နှစ်လမ်းအကျယ်ပြီးတာနဲ့ ပေ နှစ်ရာ လမ်းကျယ်တလမ်းဆိုပြီး အစီစဉ်ချခဲ့သလို ရန်ကုန်မှာရှိတဲ့ ကုန်းတွေကိုဖြိုပြီး အနိမ့်ပိုင်းတွေမှာ မြေကိုဖို့ရတယ်။ အချို့နေရာတွေဆိုရင် မြေကြီးကုဗပေ ၄ သန်းခန့် ဖို့ရတယ်လို့ ဆိုပါတယ်။ အဲ့ဒီလို စစ်တုရင်အကွက်လိုက် နေရာချထားရာမှာ အကွက်လိုက်လမ်းလိုက်နဲ့ မလွတ်တဲ့နေရာတွေကို ဖြိုဖျက် ပစ်တာတွေလည်းရှိပါတယ်။ အဖြိုဖျက်ခံရတဲ့အထဲမှာ ကျိုက်မြတ်သံချိုစေတီနဲ့ သျှင်ပင်ရွှေကြိုးစေတီလည်း ပါသွား ခဲ့တယ်။ မှော်ဘီဆရာသိန်းရဲ့ မှတ်တမ်းအရဆိုရင် ကျုံးကြီးလမ်းနဲ့ ဘုန်းကြီးလမ်းထောင့်က ဘုရားငုတ်တိုတဆူလည်း ပါသွားတယ်လို့ ဆိုပါတယ်။ ကျိုက်မြတ်သံချိုစေတီတော်၊ သျှင်ပင်ရွှေကြိုးစေတီတော်တို့နဲ့ ပတ်သက်လို့ကတော့ မှော်ဘီဆရာသိန်ကြီးရဲ့ မြန်မာနိုင်ငံသုတေသနအသင်းထုတ်စာစောင်မှာ ရေးထားချက်မှတ်တမ်းမှာပဲ တွေ့ရနိုင်ပါတယ်။ တချိန်က ရန်ကုန်နဲ့ပတ်သက်ပြီး ရွှေတိဂုံသမိုင်းအရဆိုရင် ဆံတော်ကြိုရာလမ်းတလျောက်မှာ ဗိုလ်တထောင် ကုန်းမြင့်၊ ဆူးလေကုန်းမြင့်၊ ကျိုက်မရော (ကျိုက်မဲသံကရော၊ ကျိုက်မြတ်သံချို) ကုန်း၊ တန့်တော်မူကုန်း၊ အလံပြကုန်း၊ သိဂုင်္တ္တရကုန်း ဆိုပြီးရှိခဲ့တာ။ ကုန်းတိုင်းမှာ စေတီတွေတည်ခဲ့ကြတာပါပဲ။ ကျိုက်မဲသံကရောလို့ခေါ်တဲ့ ကုန်းက ဆူးလေကုန်းလောက် မြင့်ဟန်မရှိဘူး။ ဘာလို့လည်းဆိုတော့ မှတ်တမ်းတခုအရက “ဘုရားကုန်းမှာ အုတ်သားကို ဆူလေစေဆီကုန်းကဲ့သို့ မြှင့်ထားသည်” လို့ ဆိုထားလို့ပါ။ ဆူးလေကုန်းက ပိုမြင့်ဟန်ရှိတယ်။ ဉာဏ်တော်ကတော့ သိပ်ကွာဟန်မရှိလို့ ယူဆနိုင်ပါတယ်။ ဥပဒေပါရဂူ ဦးချန်ထွန်းကတော့ “ထိုစဉ်သိမ်ကြီးဈေးနေရာတွင် ဆူးလေစေတီလောက်ကြီးသော ကျိုက်မြတ်သံချိုစေတီ ရှိခဲ့သည်” လို့ မှတ်တမ်းပြုခဲ့တယ်။ သူက ဆူးလေစေတီကို လမ်းနဲ့မလွတ်လို့ ဖြိုချမယ့်ကိစ္စကို အကြီးအကျယ် ကန့်ကွက်ခဲ့တဲ့သူပါ။ သူကျေးဇူးကြောင်း ဆူးလေစေတီကို အခုတိုင်ဖူးနေကြရတာပါ။ ရှေ့မီ နောက်မီပုဂ္ဂိုလ်ကြီးပါ။ သူ့အကြောင်း အလျဉ်းသင့်တော့ပြောပါ့မယ်။ ဆူးလေစေတီလောက်ရှိတယ်ဆိုတဲ့အတွက် ကျိုက်မဲသံခရောခေါ် ကျိုက်မြတ်သံချိုစေတီဟာ ဉာဏ်တော်အမြင့် ၁၅၁ ပေ နီပါး ရှိနိုင်တယ်။ ဆူးလေစေတီကလည်း ဉာဏ်တော် ၁၅၁ ပေ၊ အရှေ့အနောက်အလျား ၃၂၂ ပေ၊ တောင်မြောက် ၂၉၁ ပေ၊ အကျယ်၂.၁၈၁ ဧက ရှိတယ်။ မှော်ဘီဆရာသိန်းက ကျိုက်မဲသံကရောလို့ ခေါ်တာက ဘုရားအနီးမှာ သခွပ်ပင်ကအစေးဟာ ကျောက်သီးကဲ့သို့ ထွက်နေတာကို အစွဲပြုပြီး တလိုင်းဘာသာစကားအရ ကျိုက်မဲသံကရော (သို့) ကျိုက်မြတ်သံချိုလို့ခေါ်ဆို တာပဲဖြစ်တယ်လို့ ဆိုပါတယ်။ တလိုင်းဆိုတာကတော့ အဲ့ဒီခေတ်က မွန်ကို ခေါ်တဲ့အမည်ပါ။ ကျိုက်မြတ်သံချိုနဲ့ပတ်သက်ပြီး မှော်ဘီဆရာသိန်းက “ယခု နာရီစင်နဲ့ကပ်လျက် သိမ်ကြီးဈေးနေရာတွင် ဆူးလေစေတီထက်ကြီး သော ဘုရားစေတီတဆူရှိသည်။ ဘုရားရှေ့ကပ်လျက်တွင် ရဟန္တာများသမုတ်သော သိမ်တလုံး အခုတိုင်ရှိသည်။ မြေအုတ်ကြွပ်မိုးသော ဇရပ်များရှိသည်။ ယခုသိမ်ကြီးမြောက်ဘက်ကပ်လျက် ဘုရားကုန်းတော်ကို တက်ရန်ဘုရား ရှေ့စောင်းတန်းလမ်းရှိသည်။ ၄င်းအပြင် တောင်မြောက်အနောက် စောင်းတန်းလမ်းများလည်း ရှိသေးသည်။” လို့ JBRS မှာ ရေးသားမှတ်တမ်းတင်ခဲ့ပါတယ်။ J.Gerierson ရေးဆွဲခဲ့တဲ့ ပုံအရဆိုရင် ဆူးလေရဲ့နောက်ဘက်မှာရှိတဲ့ ဉာဏ်တော်မြင့်ပြီး အလုံးအဝန်းကြီးပြီး မြောက်ဘက်ကျတဲ့ပုံဟာ ကျိုက်မြတ်သံချို (သို့) ကျိုက်မဲ သံခရောစေတီဖြစ်တယ်။ နောက်စေတီတဆူကတော့ “အခုသိမ်ကြီးဈေး အရှေ့တောင်ထောင့် ပန်းပဲတန်းလမ်းနဲ့ သံဖြူတန်း နှစ်ခုကြားရှေ့မှာ မှန်ကင်းကျောင်းတိုက်ရှိပြီး ဂိုဏ်းထောက် ဦးရွှန်းနေသည်။ ၄င်းမှန်ကင်းကျောင်းတိုက်၏ တောင်ဘက်တွင် သျှင်ပင်ရွှေကြိုးစေတီရှိပြီး ဉာဏ်တော်သုံးဆယ်ခန့်ရှိသည်။ မဟာရံတံတိုင်မရှိ” လို့ မှော်ဘီဆရာသိမ်းက မှတ်တမ်းမှာ တွေ့ရပါတယ်။ ဒါကြောင့် ဉာဏ်တော်အနည်းငယ်နိမ့်တဲ့ တောင်ဘက်ကျတဲ့ေ စတီဟာ သျှင်ပင်ရွှေကြိုးစေတီဖြစ်တယ်လို့ ယူဆနိုင်ပါတယ်။ အဲ့ဒီလို ဘုရားကျောင်းကန်တွေ ဖြိုဖျက်ပြီးနောက် ၂ နှစ်ကြာတဲ့ ၁၈၅၄ ခုနှစ်မှာ မော်လမြိုင် စူရတီဘရာဘဇား ဆောက်သူတွေက မြေနေရာကို ဝယ်ယူလိုက်တယ်လို့ ဆိုပါတယ်။ ဘာပဲဖြစ်ဖြစ် တချိန်က သိမ်ကြီးဈေးနေရာမှာ  ကျိုက်မြတ်သံချိုခေါ် ကျိုက်မဲသံခရောစေတီ ရှိခဲ့တယ်ဆိုတာ သမိုင်းအထောက်အထားရှိခဲ့ပါတယ်။ နိုဝယ်ဆင်းဂါး ပြောသလို အဖြိုဖျက်ခံလိုက်ရတဲ့အတွက်တော့ သမိုင်းတန်ဖိုးနဲ့ ယဉ်ကျေးမှုတန်ဖိုးတွေ ဆုံးရှုံးခဲ့ရတာလည်း အမှန်ပါ။ စဉ်းစားစရာတွေ အများကြီးထွက်ပေါ်လာပါတယ်။ လမ်းရပ်ကွက်တို့ မလွတ်လို့ ဖြိုဖျက်ခဲ့တာလား။ အင်္ဂလိပ်မြန်မာစစ် နှစ်ကြိမ် ကြုံတွေ့ခဲ့ရတဲ့ အတောအတွင်း အဆောက်အုံနဲ့ေ စတီပုထိုးတွေကရော ဘယ်အခြေနေ ရှိနေလေမလဲ။ ထိခိုက်ပျက်စီးမှု မရှိနိုင်တော့ပြီလော။ ပထမအကြိမ်မှာကတည်းက စေတီပုထိုး ရုပ်တုတွေထဲမှာ ဋ္ဌာပနာတိုက်အကြောင်း သိထားတဲ့ စစ်သားတွေရဲ့ လက်ချက်ကရော လွတ်ကင်းနိုင်ပါ့မလား။ စစ်ဘေးစစ်ဒဏ် ခိုးဆိုးဓားပြဒဏ်တွေနဲ့အတူ ပြိုပျက်နေတဲ့အတွက် တလက်စတည်း ရှင်းပစ်လိုက်လေသလား။ လန်ဒန်မြို့ကြီးကို ခေတ်မီအောင် တည်ဆောက်စဉ်က Square Building အဝိုင်း ကို လမ်းနဲ့မလွတ်ပေမယ့် ရှေးဟောင်းအဆောက်အုံဖြစ်တဲ့အတွက်ေ ရှာင်ကွင်းချန်လှပ်ခဲ့တဲ့ လူယဉ်ကျေးတို့ရဲ့ လုပ်ရပ်အပေါ်မှာ စဉ်းစားဆင်ခြင်စရာတွေဖြစ်ခဲ့ပါတယ်။ စစ်ရဲ့အနိဋ္ဌာရုံလား၊ ကိုလိုနီရဲ့နယ်ချဲ့စနစ်လား၊ သမိုင်းတန်ဖိုးတခု ဆုံးရှုံးခြင်းလား။ လှပတဲ့မြို့တော်တခုအဖြစ် အောင်မြင်ခြင်းပေပဲလားဆိုတာကတော့ ပဟေဠိတပုဒ်ပါပဲ။ ဘာပဲဖြစ်ဖြစ် ပြန်လည်ကုစားခွင့် မရှိတော့တဲ့  ဖြစ်စဉ်တခုဆိုပေမယ့် တချိန်က ဒီနေရာမှာ ကျိုက်မြတ်သံချိုစေတီ ရှိခဲ့ဖူးတယ် ဆိုတာကိုတော့ နောင်လာနောက်သားတို့ သတိပြုဆင်ခြင်နိုင်ဖို့ တင်ပြပြလိုက်ရကြောင်းပါ။