အင်ဒိုနီးရှား တရားမဝင်ငါးဖမ်းလှေ ၁ စီး မြန်မာရေတပ် ဖမ်းမိ
DVB
·
November 8, 2018
အင်ဒိုနီးရှား တရားမဝင်ငါးဖမ်းလှေတစီးကို မြန်မာ့တပ်မတော် (ရေ)က နိုဝင်ဘာ ၆ ရက်နေ့ ညပိုင်းက ဖမ်းဆီးရမိတယ်လို့ တနင်္သာရီတိုင်း၊ ကော့သောင်းမြို့ရဲတပ်ဖွဲ့ထံက သိရပါတယ်။
T-201 မြန်မာစစ်ရေယာဉ်ဟာ ကော့သောင်းမြို့ သံကျွန်းအနောက်မြောက် ၅၄ မိုင်အကွာမှာ မသင်္ကာဖွယ်ရာ တွေ့ရှိရတဲ့အတွက် သွားရောက်စစ်ဆေးရာ BIN TANG JAS အမည်ရှိတဲ့ အင်ဒိုနီးရှား တရားမဝင် ငါးဖမ်းလှေ တစီးကိုတွေ့ရှိ ဖမ်းဆီးရမိခဲ့တာပါ။
အလျား ၅၅ ပေ၊ အနံ ၁၆ ပေ ၅ လက်မ၊ ရေစူး ၇ ပေ ၅ လက်မ လောက်ရှိတဲ့ သစ်သားကိုယ်ထည် လှေကို စစ်ဆေးရာ လှေပေါ်ပါသူအားလုံး ရေထဲခုန်ချထွက်ပြေး တဲ့အတွက် လိုက်လံဆယ်ယူရာ ရေထဲခုန်ချသွားတဲ့ အင်ဒိုနီးရှားနိုင်ငံသား ကျား ၁၆ ဦးအနက် ၁ဦးရေနစ်သေဆုံးပြီး အသက်ရှင်သူ ၁၅ ဦးကို ဖမ်းဆီးနိုင်ခဲ့ပါတယ်။
ဖမ်းဆီးရမိတဲ့ လှေလုပ်သား ၁၅ ဦးကို ကော့သောင်းမြို့ရဲတပ်ဖွဲစခန်းမှာ ရေယာဉ်ငါးဖမ်းခွင့် ဥပဒေပုဒ်မ ၃၈ (က)(ခ)နဲ့ အရေးယူထားပြီး လဝက ဥပဒေနဲ့ အရေးယူနိုင်ဖို့ ဆက်လက် ဆောင်ရွက်နေတယ်လို့ ကော့သောင်းမြို့ရဲတပ်ဖွဲမှ တာဝန်ရှိသူတဦးက ပြောပါတယ်။
သတင်း - လတ်ကိုကိုဦး