အီဂျစ်နိုင်ငံတကာ ကြက်တောင်ရိုက်ပြိုင်ပွဲတွင် မသက်ထားသူဇာ ရွှေတံဆိပ်​ဆုရ

ဓာတ်ပုံ - ဖေ့စ်ဘွတ်ခ်
အီဂျစ်နိုင်ငံ၊ ကိုင်ရိုမြို့တော်မှာ ​အောက်​တိုဘာ ၂၈ ရက်က ကျင်းပတဲ့ 2018 BWF International Series နိုင်ငံတကာ ကြက်တောင်ရိုက်ပြိုင်ပွဲ တဦးချင်းဖိုင်နယ်မှာ မြန်မာနိုင်ငံက မသက်ထားသူဇာက ပထမ ရွှေတံဆိပ်​ဆု ရရှိသွားပါတယ်။ ဒီပြိုင်ပွဲမှာ မသက်ထားသူဇာဟာ ဂျော်ဒန်နဲ့ ချက်ပြည်သူ့သမ္မတနိုင်ငံက ပြိုင်ဘက်တွေကို နှစ်ပွဲပြတ်စီနဲ့ အနိုင်ရကာ ကွာတားဖိုင်နယ်ကို တက်ရောက်ခဲ့ပြီး ကွာတားဖိုင်နယ်မှာ ဟန်ဂေရီက ပြိုင်ဘက် အန်းဂျနက်စ် ကာရိုစီကို ၂၁-၁၈၊ ၂၁-၁၅ နဲ့ နှစ်ပွဲပြတ် အနိုင်ရခဲ့ပါတယ်။ ဆီမီးဖိုင်နယ်မှာလည်း  မလေးရှားနိုင်ငံက ပြိုင်ဘက် လက်ရှာနာ ကာရူပါ သဗန်ကို ရမှတ် ၂၁-၁၈၊ ၂၃-၂၁ နဲ့ နှစ်ပွဲပြတ်အနိုင်ရကာ နောက်ဆုံးဗိုလ်လုပွဲ တက်ရောက်သွားပြီး ဗိုလ်လုပွဲမှာတော့ ဘီလာရုစ် ကစားသမားက ဒူးဒဏ်ရာကြောင့် ဝင်မပြိုင်နိုင်တော့လို့ မြန်မာက  ပထမ ရွှေတံဆိပ်ဆု ရရှိသွားခဲ့တာပါ။ ဒီပြိုင်ပွဲမှာ မြန်မာက ပထမရွှေတံဆိပ်၊ ဘီလာရုစ်က ဒုတိယ ငွေတံဆိပ်နဲ့ တတိယ ကြေးတံဆိပ်ဆုကိုတော့ မလေးရှားနဲ့ ဆွစ်ဇာလန်က ပူးတွဲရရှိသွားပါတယ်။ မသက်ထားသူဇာဟာ အာဖရိကမှာ ပြီးခဲ့တဲ့ ဇွန်လက ကျင်းပခဲ့တဲ့ Mauritius International Future Series 2018 ပြိုင်ပွဲမှာလည်း မြန်မာ့လက်ရွေးစင် ကြက်တောင်အားကစား ကိုယ်စားပြု ဝင်ပြိုင်ခဲ့ပြီး တတိယဆု ရရှိခဲ့ပါတယ်။ အသက် ၁၉ နှစ်အရွယ် မသက်ထားသူဇာဟာ Myanmar Imperial ကောလိပ်မှာ စီးပွားရေးစီမံခန့်ခွဲမှုဘာသာနဲ့ B.A (Hons:) တက်ရောက်ပညာသင်ယူနေသူ ဖြစ်ပါတယ်။

More News
Up