ယူပီဒီဂျေစီအစည်းအဝေး အပစ်ရပ် လက်မှတ်မထိုးထားသည့် ၅ ဖွဲ့ကို ဖိတ်ကြား
DVB
·
October 28, 2018
လာမယ့် နိုဝင်ဘာလဆန်း ရန်ကုန်မှာ ကျင်းပမယ့် ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (ယူပီဒီဂျေစီ) အစည်းအဝေးကို အပစ်ရပ်လက်မှတ်မထိုးထားတဲ့ အဖွဲ့ ၅ ခု တက်ရောက်ဖို့ ဖိတ်ကြားလိုက်ပါတယ်။
အမျိုးသားပြန်လည်သင့်မြတ်ရေးနဲ့ ငြိမ်းချမ်းရေး ဗဟိုဌာန အတွင်းရေးမှူးကိုယ်စား ဦးဇော်ဌေးက လက်မှတ်ရေးထိုးပြီး ဖိတ်ကြားထားတာပါ။
ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ အစုအဖွဲ့ အတွင်းရေးမှူးတွေပါဝင်တဲ့ နိုင်ငံရေး ဆွေးနွေးမှု မူဘောင်နဲ့ လုပ်ငန်းလမ်းညွှန်တွေ ပြန်လည်သုံးသပ်တဲ့ အလုပ်အဖွဲ့ အစည်းအဝေးကို လာမယ့် နိုဝင်ဘာ ၁ ရက်ကနေ ၃ ရက်အထိ ကျင်းပမယ်လို့ ဆိုပါတယ်။
ဒီအစည်းအဝေးကို ဝ ပြည်သွေးစည်းညီညွတ်ရေး တပ်မတော် (UWSA)၊ အမျိုးသားဒီမိုကရက်တစ် မဟာမိတ်တပ်မတော် (NDAA)၊ ကချင်ပြည်လွတ်မြောက်ရေးအဖွဲ့/ကချင်ပြည်လွတ်မြောက်ရေးတပ်မတော် (KIO/KIA)၊ ရှမ်းပြည်တိုးတက်ရေးပါတီ (SSPP/SSA)၊ ကရင်နီ အမျိုးသားတိုးတက်ရေးပါတီ (KNPP) တို့က ကိုယ်စားလှယ် တယောက်စီ တက်ရောက်ဖို့ ဖိတ်ကြားလိုက်တာပါ။
ကရင်နီ အမျိုးသားတိုးတက်ရေးပါတီ အတွင်းရေးမှူး ၂ ခူးဒယ်နီယာယ်က ဒီကိစ္စနဲ့ ပတ်သက်လို့ ဗဟိုကော်မတီက ဆွေးနွေးတုန်းဖြစ်ပြီး ပြန်ကြားချက်မရသေးဘူးလို့ ဒီဗွီဘီကို ပြောပါတယ်။