ပေါက်လွှတ်ပဲစား အသုံးအနှုန်း လွှတ်တော်ကိုယ်စားလှယ် ကန့်ကွက်
အာကာ
·
October 9, 2018
လွှတ်တော်ထဲမှာ ပေါက်လွှတ်ပဲစား ဆိုတဲ့ စကားလုံးကိုသုံးခဲ့တဲ့ မြို့တော်ဝန်ရဲ့ အသုံးအနှုန်းကို လွှတ်တော်ကိုယ်စားလှယ်က ကန့်ကွက်လိုက်ပါတယ်။
အောက်တိုဘာလ ၉ ရက် ဒီနေ့ ပြုလုပ်တဲ့ ရန်ကုန်တိုင်းလွှတ်တော် အစည်းအဝေးမှာ ကိုယ်စားလှယ် ဒေါ်ကြည်ပြာရဲ့ ကားပါကင်နဲ့ ပတ်သတ်တဲ့ မေးခွန်းကို မြို့တော်ဝန်က ပြန်လည်ဖြေကြားချက်မှာ “တင်ဒါတွေကို ပေါက်လွှတ်ပဲစားပေးလို့ မရပါဘူး”လို့ ထည့်သွင်း သုံးနှုန်းခဲ့တဲ့အပေါ် အခုလို ကန့်ကွက်ခဲ့တာပါ။
ဒေါ်ကြည်ပြာက “ကျမတို့ လွှတ်တော်ကိုယ်စားလှယ်တွေ မေးမြန်းတဲ့ မေးခွန်းအပေါ်မှာ “ပေါက်လွှတ်ပဲစား” စကားလုံးသုံးသွားတာကို လွှတ်တော်အနေနဲ့ ကန့်ကွက်ပါတယ်။ မှတ်တမ်းတင်ပေးထားပါရှင့်” လို့ ကန့်ကွက်ခဲ့ပါတယ်။
မြို့တော်ဝန်က မိမိအနေနဲ့ ပေါက်လွှတ်ပဲစားဖြေလို့မရကြောင်း ကိုယ့်ကိုယ်ကိုယ် ပြောတာဖြစ်တယ်လို့ ပြန်ရှင်းပါတယ်။
ဒေါ်ကြည်ပြာကတော့ “ရန်ကုန်မှာ လူဦးရေ ၇ သန်းရှိရင် လွှတ်တော်ကိုယ်စားလှယ် တွေဟာ လူဦးရေ ၇ သန်းကို ကိုယ်စားပြုပြီးလာတာပါ။ ဒီလိုနေရာမျိုးမှာ အခုလို လမ်းဘေးမှာ ပြောတဲ့ အသုံးနှုန်းမျိုးသုံးလို့ ကန့်ကွက်တာပါ” လို့လည်း ပြောပါတယ်။