ပါတီတွင်းစည်းလုံးညီညွတ်မှ ရွေးကောက်ပွဲတွင် ခွပ်ဒေါင်းအလံဆက်လွှင့်ထူနိုင်မည်
Aung Aung Naing
·
September 26, 2018
လူငယ်မျိုးဆက်သစ်တွေအနေနဲ့ ပါတီအပေါ်သစ္စာရှိကြဖို့နဲ့ စည်းလုံး ညီညွတ်မှုရှိကြဖို့ မန္တလေးတိုင်း အမျိုးသားဒီမိုကရေစီအဖွဲ့ချုပ်နာယကကြီး ဦးသိန်းတန်က ပါတီဝင်တွေကို တိုက်တွန်း ပြောကြားလိုက်ပါတယ်။
မန္တလေးတိုင်း၊ အောင်မြေသာစံမြို့နယ်၊ ပဒုမ္မာခန်းမမှာ ဒီကနေ့ကျင်းပတဲ့ အမျိုးသား ဒီမိုကရေစီအဖွဲ့ချုပ်(အန်အယ်လ်ဒီ) ပါတီတည်ထောင်ခြင်း နှစ်ပေါင်း ၃၀ ပြည့် ပုလဲရတု အခမ်းအနားမှာပြောကြားခဲ့တာပါ။
ပါတီတွင်း စည်းစည်းလုံးလုံးရှိကြမှာသာ လာမယ့် နိုဝင်ဘာလ ကြားဖြတ်ရွေးကောက်ပွဲနဲ့ ၂၀၂၀ပြည့်ရွေးကောက်ပွဲကို ဆက်ပြီး ခွပ်ဒေါင်းအလံတွေ လွှင့်ထူနိုင်မှာဖြစ်တယ်လို့လည်း ပြောပါတယ်။
မြန်မာနိုင်ငံ ဒီမိုကရေစီရေရှည်တည်တံ့ခိုင်မြဲဖို့အတွက် အန်အယ်လ်ဒီပါတီ တခုတည်းသာရှိသင့်တယ်လို့ ပါတီရဲ့ဗဟို ဒုဥက္ကဋ္ဌ ၂ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်က ပြောပါတယ်။
“ပုတီးတကုံးလို ဖြစ်သင့်တယ်။ အဲ့ဒီပုတီးတစ်ကုံးက အမျိုးသားဒီမိုကရေစီ အဖွဲ့ချုပ်ကြီးပေါ့။ အဲ့ဒီပုတီးထဲမှာဝင်ပြီးတော့ ကျနော်တို့နိုင်ငံရဲ့ ဒီမိုကရေစီ ထူထောင်ရေးကို လုပ်ကြမယ်။ ပြည်ထောင်စုကြီး ထူထောင်ရေးကို လုပ်မယ်ဆိုလို့ရှိရင် ဒီမိုကရေစီပါတီ တစ်ခုတည်းရှိတဲ့အတွက် အားသာချက်တွေရှိတယ်ပေါ့လေ။ ကိုယ့်ပြည်နယ်ရဲ့ အရေးအခင်း ကိုယ့်လူမျိုးတိုင်းရင်းသားတွေရဲ့ အရေးအခင်းကိုပြောမယ်ဆိုလို့ရှိရင်လည်း အဖွဲ့ချုပ်ထဲ ကနေပြီး လုပ်လို့ရနေတာပဲ။ အရေးကြီးတာက တောင့်တောင့်တင်းတင်းနဲ့ ပါတီကြီး တစ်ခုရှိနေခြင်းဟာ ကျနော်တို့နိုင်ငံရဲ့ဒီမိုကရေစီအားကောင်းမောင်းသန်ဖြစ်မယ်ဆို တာ ကျနော်တို့ အမြဲပြောနေရတာလို့ ပြောပါတယ်။”
ဒီအခမ်းအနားကို မန္တလေးတိုင်းဒေသကြီး အန်အယ်လ်ဒီပါတီရဲ့ နာယကတွေဖြစ်ကြတဲ့ ဦးသန်းထိုက်၊ ဦးကိုလေး(အင်းဝဂုဏ်ရည်)၊ ဦးသိန်းတန် (သိန်းတန်စာပေ) ဒေါက်တာကိုကိုကြီး ဒေါ်နွဲ့နွဲ့စသူတွေအပါအ၀င် မန္တလေးတိုင်းအတွင်း မြို့နယ်အသီးသီးက လွှတ်တော်ကိုယ်စားလှယ်တွေ၊ ပါတီဝင်တွေ တက်ရောက်ခဲ့ကြပါတယ်။
အခမ်းအနားမှာ မန္တလေးတိုင်း အမျိုးသားဒီမိုကရေစီအဖွဲ့ချုပ်ရဲ့ နှစ်ပေါင်း ၃၀ အတွင်းကြုံတွေ့ခဲ့ရတဲ့ အခက်အခဲတွေ၊ လှုပ်ရှားမှုတွေ အပါအ၀င် စိတ်ဝင်စားစရာ မှတ်တမ်းဓာတ်ပုံ ၃၀၀၀ ကျော်နဲ့ ဗွီဒီယိုမှတ်တမ်းတွေကို ပြသထားပါတယ်။