မြန်မာ့ကမ်းလွန် တွင်းအမှတ် ရွှေရည်ထွန်း-၂ မှ သဘာဝဓာတ်ငွေ့တွေ့ရှိ
DVB
·
September 26, 2018
မြန်မာ့ကမ်းလွန်လုပ်ကွက်အမှတ် A-6 မှာ တူးဖော်ခဲ့တဲ့ တွင်းအမှတ် ရွှေရည်ထွန်း-၂ ကနေ သဘာဝဓာတ်ငွေ့တွေ့ရှိတယ်လို့ လျှပ်စစ်နှင့် စွမ်းအင်ဝန်ကြီးဌာနက မနေ့က နေပြည်တော်မှာ အခမ်းအနားနဲ့ သတင်းထုတ်ပြန်ပါတယ်။
ရွှေရည်ထွန်း-၂ ကို ၂၀၁၈ ဇူလိုင် ၂၀ ရက်မှာ စတင်တူးဖော်ခဲ့ရာ ရည်မှန်းအနက် ၄၈၅၀ မီတာအထိတူးဖော်ခဲ့ကာ သဘာဝ ဓာတ်ငွေ့အသားတင်ထုတ်ယူ ရရှိနိုင်မယ့် သဲကြောအထူ ၄၀ မီတာခန့်ကို တွေ့ရှိခဲ့ပြီးနောက် ခုအခါသဲကြောကို သဘာဝဓာတ်ငွေ့ထုတ်လုပ်မှု စမ်းသပ်ခြင်း Drill Stem Test (DST) ကို အောင်မြင်စွာဆောင်ရွက်နိုင်ခဲ့တာလို့ ဆိုပါတယ်။
အခုလို ရွှေရည်ထွန်း-၂မှာ သဘာဝဓာတ်ငွေ့တွေ ထုတ်ယူရရှိကြောင်း စမ်းသပ် တွေ့ရှိရလို့ မြန်မာ့ကမ်းလွန်လုပ်ကွက်အမှတ် A-6 ထဲမှာ အကဲဖြတ်တွင်း/ ရှာဖွေရေးတွင်းတွေ ဆက်လက်တူးဖော်ရှာဖွေခြင်းဖြင့် စီးပွားဖြစ် ထုတ်လုပ်နိုင်တဲ့ သဘာဝဓာတ်ငွေ့ စီမံကိန်းကြီး တစ်ခုအဖြစ် အကောင်အထည်ပေါ်လာဖို့ ဆက်လက်မယ်လို့လည်း သိရပါတယ်။
မြန်မာ့ကမ်းလွန်လုပ်ကွက်အမှတ် A-6 မှာ မြန်မာအမျိုးသားတွေဦးဆောင်တဲ့ MPRL E&P ကုမ္ပဏီက ရင်းနှီးမြှုပ်နှံမှု ၂၀ ရာခိုင်နှုန်း၊ သြစတြေးလျနိုင်ငံ Woodside Energy (Myanmar)ကုမ္ပဏီက ၄၀ ရာခိုင်နှုန်း၊ ပြင်သစ်နိုင်ငံ Total E&P Myanmar ကုမ္ပဏီက ၄၀ ရာခိုင်နှုန်း အစုရှယ်ယာအချိုးကျပါဝင် အကျိုးတူပူးပေါင်းဆောင်ရွက် နေတာပါ။
မြန်မာနိုင်ငံ အနောက်ဘက် ကမ်းလွန်ရှိ လုပ်ကွက်အမှတ် A-6 မှာ မြန်မာ့ရေနံနှင့် သဘာဝ ဓာတ်ငွေ့ လုပ်ငန်းနဲ့ MPRL E&P ကုမ္ပဏီတို့အကြား ထုတ်လုပ်မှုအပေါ် ခွဲဝေခံစားရေးစာချုပ် ကို ၂၀၀၇ ဇန်နဝါရီ ၁၈ ရက်မှာ ချုပ်ဆိုကာ ကမ်းလွန်ရေနံရှာဖွေရေး လုပ်ငန်းတွေ စတင်ဆောင်ရွက်ခဲ့တာဖြစ်ပြီး သြစတြေးလျနိုင်ငံ အခြေစိုက် Woodside Energy (Myanmar) ကုမ္ပဏီနဲ့ ပြင်သစ်နိုင်ငံအခြေစိုက် Total E&P Myanmar ကုမ္ပဏီတို့က နောက်မှ ပူးပေါင်းပါဝင်လာခဲ့တာလို့ အစိုးရထုတ်ပြန်ချက်အရ သိရပါတယ်။
ဓာတ်ပုံ-MOI
