မကွေးတိုင်းအတွင် ဒေသန္တရရေနံချက်ဖိုဇုန်တခု တည်ထောင်ပေးရန် တောင်းဆို
DVB
·
September 17, 2018
မကွေးတိုင်းဒေသကြီးအတွင်းမှာ အသေးစားရေနံချက်စက်ရုံလုပ်ငန်း လုပ်ကိုင်ဖို့ အခက်တွေ့နေကြတာကြောင့် ဒေသန္တရ ရေနံချက်ဖိုဇုန်တခု တည်ထောင်ပေးဖို့ မြိုင်မြို့နယ် ဒေသခံတွေ တောင်းဆိုခဲ့ကြပါတယ်။
မြိုင်မြို့နယ် ဒေသခံ ဦးသန့်ဇင်က "ဒီဒေသမှာ တရားဝင်ရေနံချက်ဖိုမရှိတဲ့ အတွက် ဈေးကွက်ချုပ်ကိုင်မှုနဲ့ ဈေးနှိမ်တာတွေခံနေရပြီး ရေနံစိမ်းလုပ်ငန်းလုပ်ကိုင်သူတွေ ထိုက်သင့် သလောက် အကျိုးအမြတ်မရရှိကြဘူး။ ရေနံတွင်းတတွင်းရဲ့ကုန်ကျစရိတ်က သိန်း ၄၀၀ ကျပ်လောက်ကုန်ကျပြီး အစုအဖွဲ့နဲ့ လုပ်ကြတာပါ။ ဒေသန္တရ ချက်ဖိုနဲ့ ရေနံချက်စက်ရုံ အများကြီးကွာခြားပါတယ်။ စက်ရုံတည်ဆောက်ဖို့ သိန်းပေါင်း ၅ သောင်းကနေ သိန်း ၇ သောင်းကျပ်ထိ ကုန်ကျမှာဖြစ်ပြီး အများစုအနေနဲ့ မရင်းနှီးနိုင်ဘူး။ စက်ရုံက အမြဲတမ်း လည်ပတ်နေဖို့ လိုအပ်ပြီး ရေနံလက်ယက်တွင်းတိမ်ဖြစ်တဲ့အတွက် ထွက်ရှိမှု အပြောင်းလဲရှိနိုင်လို့ ကုန်ကြမ်းပိုင်းမှာ သေချာမှုမရှိဘူး။ စက်ရုံတည်တဲ့ အရင်းနှီးနဲ့ ကုန်ကြမ်း မရရှိနိုင်ရင်ဆုံးရှုံးမှုတန်ဖိုး ကြီးမားမယ်။ အခြားတိုင်းဒေသကြီးတွေလို ဒေသနဲ့ကိုက်ညီတဲ့ ဒေသန္တရ ချက်ဖိုချက်လုပ်ချင်နေကြတာပါ" လို့ ဒီဗွီဘီကို ပြောပါတယ်။
ဒေသခံ ဦးမြသန်းက "ရေနံစိမ်း ကုန်ကြမ်းလုပ်တဲ့အတွက် အမြတ်အစွန်းကို ပြည့်မီအောင်မရကြဘူး။ သဘာဝပတ်ဝန်းကျင်ထိခိုက်မှုမရှိအောင် ရေနံချေးနဲ့ အခြား စွန့်ပစ်ပစ္စည်းကနေထုတ်တဲ့ လောင်စာတောင့်တွေကို အသုံးပြုသွားမှာပါ။ စက်ရုံလုပ်ကိုင်ဖို့ အရင်းနှီး မလိုက်နိုင်တဲ့အတွက် မုံရွာလိုမျိုး ဒေသန္တရ ချက်ဖို လုပ်ကိုင်ခွင့် ရချင်ပါတယ်” လို့ ပြောပါတယ်။
မြိုင်ဒေသခံ ကိုနန္ဒမြင့်က "သယ်ယူစရိတ် မြောက်များစွာ အကုန်ကျခံပြီး မုံရွာကျောက္ကာ ရေနံချက်ဖိုတွေကို ပို့ဆောင်နေရတယ်။ ချက်ဖိုလုပ်ငန်း တရားဝင်ခွင့်ပြုပေးမယ်ဆိုရင် ယခင် ထမ်းဆောင်နေတဲ့ အခွန်အပြင် သတ်မှတ်တဲ့ အခွန်အခကိုလည်း တာဝန်ကျေအောင် ထမ်းဆောင်မှာပါ။ ချက်ဖိုလုပ်ငန်းက နိုင်ငံတော်နဲ့တိုင်းဒေသကြီးအတွက် အခွန်ဝင်ငွေတွေ တိုးလာမယ့်အပြင် ဒေသအတွက် အလုပ်အကိုင် အခွင့်လမ်းကောင်းတွေ ရရှိပြီး ဝင်ငွေတွေ ကောင်းလာမှာပါ။ ဒေသထွက်ရေနံတွေကို ကုန်ချောအဖြစ် ထုတ်လုပ်နိုင်ရင် လောင်စာဆီ ဈေးနှုန်း မြင့်တက်မှုကို အကာကွယ်ပေးမဲ့အပြင် နိုင်ငံခြားထွက်ငွေလည်း လျော့နည်းသွားမယ်" လို့ပြောပါတယ်။
ချက်ဖိုလုပ်ကိုင်ဖို့ အမှန်တကယ်လုပ်ကိုင်လိုသူ လူဦးရေ ၁၀၀၀ လောက်ရှိနေပြီး လူဦးရေ ၁၀၀ လောက် လက်မှတ်ထိုးပြီး စွမ်းအင်ဝန်ကြီးဌာနကို တင်ပြသွားမယ်လို့ ဆိုပါတယ်။
လျှပ်စစ်နဲစွမ်းအင်ဝန်ကြီးဌာန မြန်မာ့ရေနံနဲ့ ဓာတုဗေဒလုပ်ငန်းက အသေးစား ရေနံချက်လုပ်ငန်း (Mini Refinery) လုပ်ကိုင်လိုသူတွေကို လိုင်စင်လျှောက်လွှာခေါ်ယူ နေတယ်လို့ သိရပါတယ်။
သတင်း-မင်းထီး
