Homeမြန်မာသတင်း
သတ္တုသန့်စင်စက်ရုံအနံ့ဆိုးကြောင့် တောင်ကြီးဒေသခံများ၏ စိုက်ခင်းနှင့်ကျန်းမာရေး ဆိုးရွားစွာထိခိုက်
သတ္တုသန့်စင်စက်ရုံအနံ့ဆိုးကြောင့် တောင်ကြီးဒေသခံများ၏ စိုက်ခင်းနှင့်ကျန်းမာရေး ဆိုးရွားစွာထိခိုက်
DVB
·
September 14, 2018
ရှမ်းပြည်နယ်တောင်ပိုင်း တောင်ကြီးမြို့နယ် ဘုရားငါးဆူကျေးရွာအနီးရှိ ခနောက်စိမ်းသတ္တုသန့်စင်စက်ရုံက ထွက်ရှိတဲ့ အနံ့ဆိုး၊ အငွေ့၊ မီးခိုးတွေကြောင့် အနီးရှိ ကျေးရွာ ၆ ရွာက စိုက်ခင်းတွေ ပျက်စီးပြီး ကျန်းမာရေး ထိခိုက်တာတွေ ခံစားနေရပါတယ်။
အဲဒီခနောက်စိမ်းသန့်စင်စက်ရုံဟာ စနစ်တကျ ပြုလုပ်ခြင်းမရှိတဲ့အတွက် ဆိုးကျိုးခံစားနေရတာကို ဒေသခံတွေက အစိုးရထံ တိုင်ကြားပြီး ကွင်းဆင်းစစ်ဆေးတားမြစ်ထားပေမယ့် ခိုးပြီးပြန်လည်နေတယ်လို့ ပုန်းစိမ်းကျေးရွာနေ ကိုသန်းစိုးက ပြောပါတယ်။
“ကျနော်တို့ စာတင်တော့ ပြီးခဲ့တဲ့ သြဂုတ် ၆ ရက်နေ့ ခရိုင်အစိုးရရုံးမှာ ခေါ်ပြောတယ်။ စက်ရုံမန်နေဂျာတွေလည်းပါတယ်။ လူကြီးတွေ ကွင်းဆင်စစ်ဆေးချိန်မှာ အန္တရာယ်ရှိမှန်း သူတို့သိတယ်၊ ပြင်ကိုပြင်ရမယ် ပြင်နေတဲ့ကာလမှာ လုံးဝမလည်ရဘူး၊ စက်ရုံမန်နေဂျာ လည်း ကတိပေးတယ်။ ဒါပေမယ် လေးငါရက်ပဲ နားပြီးပြန်လည်တယ်၊ စက်ရုံက အနံ့ဆိုးတွေ မီးခိုးတွေပြန်ရနေတယ်။”
စက်ရုံကထွက်တဲ့ မီးခိုး၊ အနံ့ဆိုးနဲ့ အငွေ့တွေကြောင့် ပတ်ဝန်းကျင်က စိုက်ထားတဲ့ ကန်စွန်းဥ၊ ပဲစဉ်းငုံ၊ ပြောင်း စတဲ့ သီးနံတွေ ပျက်ဆီးဆုံးရှုံးနေရတယ်လို့ ဒေသခံတွေက ပြောပါတယ်။
စိုက်ခင်းပျက်စီးသွားတဲ့ တောင်သူ ခွန်ကျော်စွာက “စက်ရုံက မီးခိုးငွေ့တွေကြောင့် ကျနော့် ကန်စွန်းဥအပင်တွေ ပျက်စီးသွားပြီး အပင်ညှိုးကုန်တယ် မဥတော့ဘူး။ ဒီမီးခိုးငွေ့တွေက ဘယ်အပင်မှမခံနိုင်ဘူး။ ပြောင်းပင်ဆို အဖူးမထွက်တော့ဘူး၊ ပေါက်ပင်ကြီးတောင် ညှိုးကုန်တယ်။ ကျနော့် ခြံဆို တန်ဖိုး သိန်းလေးငါးဆယ်ရှိတယ်။ လူငှါးတာ တရက်ရှစ်ထောင်ပေးရတယ်။”
ဒီလို ဆိုးကျိုးတွေ ခံစားနေရတဲ့အတွက် စက်ရုံ ပိတ်သိမ်းပေးဖို့ ဒေသခံတွေက လိုလားနေကြပါတယ်။
တောင်ကြီးမြို့နယ် အထွေထွေအုပ်ချုပ်ရေးမှူး ဦးမင်းစိုးက “သဘာဝပတ်ဝန်းကျင် ထိန်းသိမ်းရေးအဖွဲ့၊ သတ္ထုဌာနနဲ့ အုပ်ချုပ်ရေးတွေ ခေါ်ပြီး အကြံပြုချက် ၁၀ ချက်ကျော် ဆောင်ရွက်ဖို့ ချပေးလိုက်တယ်။ စက်ရုံမှူးတွေခေါ်ပြောပြီးပြီ စက်ရုံ ပြင်ရမယ့်ဟာတွေကို၊ ပြင်ဆင်ကာလမှာ စက်ရုံမလည်ရဘူးလို့ပြောထားတယ်၊ ပြန်လည်နေရင် ပြန်စစ်ရလိမ့်မယ်။ စီးပွားရေးအတွက် ပြည်သူတွေ ထိခိုက်ရင် လုပ်လို့မရဘူး” လို့ ပြောပါတယ်။
အဲဒီစက်ရုံ ပြန်လည်တာနဲ့ပတ်သက်ပြီး စက်ရုံက တာဝန်ရှိသူကို သွားရောက်မေးမြန်းရာ စက်ရုံ မန်နေဂျင်းဒါရိုက်တာ ခရီးလွန်နေလို့ ဆိုပြီး ပြန်လည်ဖြေကြားပေးခြင်းမရှိပါ။
အဲဒီစက်ရုံက အနံ့ဆိုးကို ရှူမိပါက အာခေါင်ခြောက်တာ၊ မူးဝေတာ၊ အသက်ရှူမဝတာ၊ အော့အံတာ စတဲ့ရောဂါတွေ ခံစားနေရတယ်လို့ ဒေသခံတွေက ပြောပါတယ်။
နောင်လံ ကျေးရွာ ရွာသူကြီး ဦးမောင်လေးက “ရွာသူရွာသားတွေက ပိတ်ချင်တာပေါ့။ ရပ်ဆိုင်းချင်တာပေါ့။ ရွာသူရွာသားတွေခံရပြီလေ အသက်ကြီးသူတွေ ခေါင်းတအားမူးကြတယ်။ အဲဘေးမှာလည်း လုပ်စားတာ ပြဿနာတက်တက်ပြီးတော့ စိတ်ညစ်ကုန်ကြပြီ” လို့ ပြောပါတယ်။
စက်ရုံကြောင့် တောင်ကြီးမြို့နယ် နဲ့ ဟိုပုံးမြို့နယ်ရှိ နောင်လံ၊ ဟံးခြောက်၊ ဘုရားငါးဆူ၊ ပုန်းစိမ်း၊ ညောင်ဖြူရွာနဲ့ လွယ်နောင်ကျေးရွာခြောက်ခုက ကျန်းမာရေး နဲ့စိုက်ခင်းပျက်ဆီးမှုကို ဆိုးရွားစွာခံစားနေရတာပါ။
အဲဒီစက်ရုံက ငွေကမ္ဘာကျော် သတ္ထုကုမ္ပဏီက ၂၀၁၂-၂၀၁၃ က စတင်လုပ်ဆောင်ပြီး ၂၀၁၄ မှစတင်လည်ပတ်ကြောင်း သိရပါတယ်။
သတင်းနှင့်ဓာတ်ပုံ - ခွန်ရာဇာ