ပြင်ဦးလွင်-မန္တလေးသွား ကားလမ်းဘေးဝဲယာမှ ကျူးကျော် နေအိမ် ၁၅၀ ခန့်ကို ရှင်းလင်း
Aung Aung Naing
·
September 9, 2018
မန္တလေးမြို့ ချမ်းမြသာစည်မြို့နယ် ပုသိမ်ကြီးမြို့နယ်အတွင်း ပါဝင်တဲ့ ပြင်ဦးလွင် နဲ့ မန္တလေးသွား ကားလမ်းဘေးဝဲယာ (မြို့ပတ်လမ်း) မှာ ကျူးကျော်နေထိုင်ကြတဲ့ နေအိမ် ၁၅၀ လောက်ကို တာဝန်ရှိသူတွေက စက်တင်ဘာ ၉ ရက်နေ့မှာ ဖယ်ရှားရှင်းလင်းခဲ့ပါတယ်။
ဖယ်ရှားမှုတွေ မပြုလုပ်မီ မိမိသဘောနဲ့ ပြောင်းရွှေ့ပေးကြဖို့ ကြိုတင်အကြောင်းကြားစာ တွေ ဖြန့်ဝေပေးခဲ့ပြီး သတ်မှတ်ရက်အတွင်း မပြောင်းရွှေ့ခဲ့တာကြောင့် နေအိမ်နဲ့ တဲတွေကို စည်ပင်သာယာ၊ ရဲတပ်ဖွဲ့၊ မီးသတ်နဲ့ အုပ်ချုပ်ရေးအဖွဲ့အစည်း အင်အား ၃၀၀ ကျော်နဲ့ ဖယ်ရှားရှင်းလင်းခဲ့ပါတယ်။
ကျူးကျော်နေထိုင်သူတွေအနေနဲ့ ၁၅ နှစ်နီးပါး နေထိုင်ခဲ့ကြသူတွေဖြစ်ပြီး ဖယ်ရှား ရှင်းလင်းခံရတဲ့အတွက် ကျောင်းသားကျောင်းသူတွေရဲ့ ပညာရေးနဲ့ မိသားစု နေထိုင်ရေးတွေပါ အခက်အခဲဖြစ်နေကြပါတယ်။
”မေကြီးအနေနဲ့ ရွှေ့ပေးဆိုရင် ရွှေ့ပေးပါမယ်။၊ ဒါပေမယ့် အချိန်လေးပေးစေချင်တယ်။ မေကြီးက မုဆိုးမလည်းဖြစ်၊ ရင်သားကင်ဆာလည်း ဖြစ်နေတာ မိသားစုကလည်းမရှိဘူး။ ရှေ့ဆက်ဘယ်လိုစခန်းသွားရမလဲ ကူညီပေးကြပါ” လို့ အသက် ၇၀ ကျော် ဒေါ်သန်းရွှေက ပြောပါတယ်။
စည်ပင်နယ်နိမိတ်အတွင်း ကျူးကျော်နေထိုင်သူတွေကို မန္တလေးမြို့နယ် ၇ မြို့နယ်အတွင်း ဆက်လက်ရှင်းလင်းသွားမယ်လို့ ကျူးရှင်းလင်ရေးအဖွဲ့တာဝန်ခံက ပြောပါတယ်။
သတင်းနှင့်ဓာတ်ပုံ - အောင်အောင်နိုင်