မြေမူဝါဒ စီမံခန့်ခွဲရေး ကြီးမားသည့်ပြဿနာဖြစ်၍ အသေချာပြန်စိစစ်ရမည်ဟု ၀န်ကြီးချုပ်ပြော
DVB
·
September 2, 2018
မြေရဲ့မူဝါဒတွေချမှတ်ပြီး စီမံခန့်ခွဲရတဲ့ ကိစ္စရပ်တွေဟာ တော်တော်ကြီးတဲ့ ပြဿနာရပ်တခုဖြစ်ပြီး တချို့ကိစ္စရပ်တွေက သေသေချာချာ ပြန်စိစစ်ရမယ်လို့ ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ပြောပါတယ်။
မနေ့က ရန်ကုန်မှာလုပ်တဲ့ အမျိုးသားမြေအသုံးချမှု မူဝါဒလမ်းညွှန်ချက်တွေနဲ့အညီ စုပေါင်း ဆွေးနွေးဖော်ထုတ်တဲ့ အလုပ်ရုံဆွေးနွေးပွဲမှာ ပြောခဲ့တာပါ။
မြေယာနဲ့ပတ်သက်တဲ့ ကဏ္ဍဟာ ရန်ကုန်တိုင်းအတွက် အလွန်အင်မတန် အရေးကြီးလို့ မြေတွေကို စနစ်တကျသတ်မှတ်ပြီး မြို့ကို ဖွံ့ဖြိုးတိုးတက်အောင်လုပ်ဖို့ အခုဖွဲ့စည်းမယ့် ကော်မတီဟာ အရေးကြီးတယ်လို့ ပြောပါတယ်။
“ကျနော်တို့နိုင်ငံရဲ့မြေဟာ ရှုပ်ထွေးမှုတွေထဲမှာ တော်တော့်ကိုကြီးမားတဲ့ကိစ္စရပ်ဖြစ်ပါတယ်။ ဒီအထဲမှာ အရေးအကြီးဆုံးဟာ ရန်ကုန်ဖြစ်ပါတယ်။ ဒီနေရာမှာ ပြည်ထောင်စုအစိုးရကနေ ဥပဒေတွေ မူဝါဒတွေ လုပ်ထုံးလုပ်နည်းတွေ ထုတ်ပြန်လာတဲ့ အခြေအနေမှာ မြေအသုံးချမှုကောင်စီကို ပြည်ထောင်စုမှာ ဖွဲ့စည်းပါတယ်။ နိုင်ငံတော်ဒုတိယသမ္မတ (၂)က တာဝန်ယူပြီးတော့ ဝန်ကြီးချုပ်တွေလည်း အဖွဲ့ဝင်တွေအဖြစ် ပါဝင်ပြီး ဖွဲ့စည်းတဲ့အချိန်မှာ တိုင်းဒေသကြီးတွေကိုလည်း ဖွဲ့စည်းရမယ်ဆိုပြီး ဖြစ်လာပါတယ်။ တခြား ပါဝင်မယ့်သူတွေကတော့ ဌာနဆိုင်ရာတွေ၊ အပြင်က သူတွေပါ ထည့်ရမယ်ဆိုတော့ အားလုံးကို အသိပေးပြီး ထည့်ချင်တယ်” လို့ ဝန်ကြီးချုပ်က ပြောပါတယ်။
ဒီမိုကရေစီနည်းလမ်းအရလည်း မြေစီမံခန့်ခွဲတဲ့ ကိစ္စရပ်တွေနဲ့ ပတ်သက်လို့ အားလုံးတိုင်ပင်ပြီး လုပ်ဆောင်မယ့် အခြေအနေမျိုးကို ဆောင်ရွက်ချင်သလို ကော်မတီမှာ ပါဝင်ရမယ့်သူတွေအပြင် တခြားစိတ်ဝင်စားသူတွေကိုလည်း စာရင်းရယူမယ်လို့ ပြောပါတယ်။
“ဒီမှာပါဝင်ရမယ့်သူတွေအားလုံးကလည်း ရန်ကုန်မြို့ကို ဘယ်နေရာတော့ ဘာအဖြစ် ဆက်လက် တည်ရှိ ဆောင်ရွက်နေနိုင်တဲ့ အခွင့်အလမ်းတွေကို ဆွေးနွေးနိုင်ဖို့အတွက် ဖွဲ့စည်းဆောင်ရွက် သွားကြရမှာဖြစ်ပါတယ်။ လက်ရှိဆောင်ရွက်နေကြတဲ့ ရန်ကုန်မြို့တော်ကြီးရဲ့ မြို့တော် ဖွံ့ဖြိုး တိုးတက်ရေးအတွက် မြို့ပြအသစ်တွေ၊ တဖက်မှာရှိနေတဲ့ အသုံးမကျတဲ့ လယ်ယာတွေနဲ့ ထွက်ရှိမှုနည်းနေတဲ့မြေတွေကို မြေတန်ဖိုးကို ပိုတန်ဖိုးရှိအောင် လုပ်ရမှာဖြစ်သလို စိုက်ပျိုးရေးအတွက် ထားထားခဲ့ရမှာနဲ့ Green Area တွေနဲ့၊ သစ်တောဧရိယာတွေ ထိန်းသိမ်းစောင့်ရှောက်ဖို့ကိုလည်း မြေစီမံမှုကော်မတီတွေကနေ ဆုံးဖြတ်ရမှာဖြစ်ပါတယ်” လို့လည်း ဝန်ကြီးချုပ်က ပြောပါတယ်။