မြန်မာ-ဘင်္ဂလားဒေ့ရ်ှနယ်စပ် မိုင် ၁၅၀ ကျော် ခြံစည်းရိုးကာပြီးဟု ပြည်ထဲရေးဝန်ကြီးပြော
DVB
·
August 30, 2018
မြန်မာ-ဘင်္ဂလားဒေ့ရ်ှနယ်စပ်တလျှောက် မိုင် ၁၈၀ ကျော်ရှိတဲ့အနက် မိုင် ၁၅၀ ကျော် ခြံစည်းရိုးကာရံထားပြီး ဖြစ်တယ်လို့ ပြည်ထဲရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီးကျော်ဆွေက ပြောပါတယ်။
သြဂုတ် ၃၀ ရက်က ပြုလုပ်တဲ့ ပြည်ထောင်စုလွှတ်တော်အတွင်း ပြည်ထောင်စု စာရင်းစစ်ချုပ်ရုံးရဲ့ အစီရင်ခံစာအပေါ် ပြန်လည်ရှင်းလင်းတင်ပြရာမှာ ဝန်ကြီးက ပြောခဲ့တာ ဖြစ်ပါတယ်။
“မြန်မာ-ဘင်္ဂလားဒေ့ရှ် နယ်နိမိတ်တလျှောက် ၁၈၂ ဒသမ ၆၈ မိုင် ခြံစည်းရိုးကာရံခြင်းကို ၂၀၀၉-၂၀၁၀ ခုနှစ်မှ စတင်ပြီး ဘဏ္ဍာရေးနှစ်အလိုက် ရန်ပုံငွေ တောင်းခံဆောင်ရွက်ခဲ့ပြီး ၁၅၃ ဒသမ ၁၈ မိုင် ကာရံထားခဲ့ပြီး ဖြစ်ပါတယ်။ ၂၀၁၇-၁၈ ခု ဘဏ္ဍာရေးနှစ်မှာ ဘီပီ အနီး ၃ ဒသမ ၅ မိုင် ခြံစည်းရိုးကာခြင်းကစပြီး ရေရှည်တည်တံ့ကောင်းမွန် ခိုင်မာစေရန် တဖက်နဲ့တဖက် လူ ကျော်တက်ဝင်ရောက်မှု မရှိစေရန်အတွက် ဝိုင် ပုံသဏ္ဌာန်နဲ့ သွပ်ဆူးကြိုးအဝိုင်း ၂ ပေ၊ ထပ်တိုး ပုံစံတို့ကို စံချိန်စံညွှန်းများနဲ့အညီ ပြောင်းလဲပြီး ဆောင်ရွက်ခဲ့ပါတယ်။”
၂၀၁၇ ခုနှစ် သြဂုတ်လ အကြမ်းဖက်တိုက်ခိုက်မှုတွေ ဖြစ်အပြီးမှာ ရေထွက်ပေါက်၊ သံဆန်ခါ ပျက်စီးမှုတွေကို စစ်ဆေးပြီး ပြင်ဆင်ဆောင်ရွက်နေတယ်လို့လည်း ဝန်ကြီးက ပြောပါတယ်။
ပြည်ထောင်စုလွှတ်တော် ကိုယ်စားလှယ်တွေက စာရင်းစစ်ချုပ်ရုံးရဲ့ အစီရင်ခံစာအပေါ် ဆွေးနွေးကြရင်း မြန်မာ-ဘင်္ဂလားဒေ့ရှ် နယ်စပ်ခြံစည်းရိုးကို ရေရှည်တည်တံ့ခိုင်မြဲအောင် ကာရံဖို့ ဆွေးနွေးခဲ့ကြတာ ဖြစ်ပါတယ်။
