အဆိုတော် ရသ အပါအဝင် ၃ ဦးကို ဒုတိယအကြိမ် ရမန်ယူ
Aung Aung Naing
·
August 28, 2018
မူးယစ်ဆေးဝါးမှုနဲ့ ဖမ်းဆီးခံထားရတဲ့ အဆိုတော် ရသ(ခ)ရဲမင်းသိန်း အပါအဝင် ၃ ဦးကို သြဂုတ် ၂၈ ရက်က ချမ်းမြသာစည်မြို့နယ်တရားရုံးမှာ ချုပ်မိန့်ရမန် ဒုတိယအကြိမ် ရယူခဲ့ပါတယ်။
အဆိုတော် ရသက “ကျနော့်အနေနဲ့ ဘာမှ ပြောစရာမရှိဘူး ကံတရားပေါ့ဗျာ။ ကျနော် ချစ်တဲ့ ပရိသတ်ကိုတော့ ကျနော် ပြောချင်တာတွေကိုတော့ သီချင်းနဲ့ပဲ ပြောပြတော့မယ်။ ကျနော်က သီချင်းတွေ ဆက်ဆိုဦးမှာပါ”လို့ ပြောပါတယ်။
မန္တလေးမြို့၊ ချမ်းမြသာစည်မြို့နယ် ထွန်တုံးရပ်ကွက် အောင်စေတနာလမ်း ၄၉ လမ်းနဲ့ လမ်း ၅၀ လမ်းကြားရှိ နန်းထိုက်ပန် ဧည့်ရိပ်မွန်ကို သတင်းအရ ဝင်ရောက် ရှာဖွေခဲ့ရာက ရဲမင်းသိန်း (ခ) ရသ၊ မျိုးတင့်နဲ့ ခေမီ(ခ) ဗာတားမီးတို့ ၃ ဦးအား စိတ်ကြွရူးသွပ်ဆေးပြား ၁၆၅၅ ပြားနဲ့ အတူ ဖမ်းဆီးရမိခဲ့တာပါ။
ဖမ်းဆီးရမိတဲ့ မူးယစ်ဆေးဝါးတွေကို ကျောက်မဲမြို့နေ ကိုသားကြီး ဆိုသူထံမှ အပြား ၂၀၀ ပါ တထုပ်ကို ၈ သောင်းကျပ်နဲ့ ပြန်လည်ဖြန့်ဖြူးရောင်းချဖို့နဲ့ သုံးစွဲဖို့အတွက် ဝယ်ယူခဲ့တဲ့ ဆေးပြားတွေဖြစ်ကြောင်း စစ်ဆေးပေါ်ပေါက်ခဲ့ပါတယ်။
ရဲမင်းသိန်း(ခ) အဆိုတော် ရသ ပါ (၃) ဦးကို ချမ်းမြသာစည်မြို့နယ် အောင်ပင်လယ်ရဲစခန်းမှာ မူးယစ်ဆေးဝါးနှင့် စိတ်ကိုပြောင်းလဲ စေတတ်သော ဆေးဝါးများ တားဆီးကာကွယ်ရေး ဥပဒေ ပုဒ်မ-၁၉ (က)/၂၁ နဲ့ အမှုဖွင့် အရေးယူထားပါတယ်။
