ပလိပ် ပန်ဒါချည်မျှင်စက်ရုံ အလုပ်သမား ၂၅၀ ကျော်ဆန္ဒပြ
Aung Aung Naing
·
July 29, 2018
မန္တလေးတိုင်း စဥ့်ကိုင်မြို့နယ်နယ် ပလိပ်ပန်ဒါချည်မျှင်နဲ့အထည် အချောကိုင်စက်ရုံက အလုပ်သမား ၂၅၀ ဟာ အလုပ်ခန့်ထားမှုဆိုင်ရာ သဘောတူစာချုပ် (EC) ပြန်လည်ချုပ်ဆိုရတဲ့အပေါ် ကျေနပ်မှုမရှိတဲ့အတွက် အချက် ၆ ချက်ကို ဒီနေ့ မနက်က တောင်းဆိုဆန္ဒထုတ်ဖော်ခဲ့ကြပါတယ်။
အလုပ်မှထုတ်ပယ်ထားတဲ့ ဝန်ထမ်းတွေကို ပြန်လည်ခန့်ထားပေးရေး၊ ဥပဒေမဲ့ လုပ်ရပ်တွေကို အလုပ်ရှင်မှအမြန်ဆုံး ရပ်တန့်ပေးရေး၊ ဥပဒေကိုချိုးဖောက်နေသော အလုပ်ရှင်အား အလုပ်သမားဝန်ကြီးဌာနမှ အမြန်ဆုံးအရေးယူဆောင်ရွက်ပေးရေး၊ လွှဲပြောင်းခံ နိုင်ငံဝန်ထမ်းများ၏ လုပ်ငန်းခွင် ဘဝအာမခံချက်ရရှိရေး၊ စာချုပ်များကို အကြိမ်ကြိမ် ချိုးဖောက်နေသော ပန်ဒါကုမ္ပဏီ အလိုမရှိ၊ ဥပဒေကို ချိုးဖောက်သော ပန်ဒါကုမ္ပဏီ အလိုမရှိ စတဲ့ ကြွေးကြော်သံတွေကို ကြွေးကြော်ပြီး ပလိပ်စက်ရုံးဝင်းအတွင်း အလုပ်သမားသက်သာ ခန်းမကနေ ပလိပ်မြို့ဝန် ဆိုင်းဘုတ်အထိ လမ်းလျောက်တောင်းဆို ဆန္ဒထုတ်ဖော်ခဲ့ကြတာပါ။
ပလိပ်ပန်ဒါအထည်စက်ရုံက အလုပ်သမားထုဟာ လွှဲပြောင်းခံ နိုင်ငံဝန်ထမ်းတွေအတွက် ဘဝအာမခံချက်ရရေးကို ၈ လကျော်ကြာ သပိတ် ၃ ကြိမ်မှောက်ခဲ့တဲ့ စက်ရုံဖြစ်ပြီး မြန်မာပြည်မှာ ရက်အရှည်ဆုံးသပိတ်မှောက်ခဲ့တဲ့ စက်ရုံ ဖြစ်ပါတယ်။
အရင် ပလိပ်ချည်မျှင်နဲ့ အထည်အချောကိုင်စက်ရုံကို ၁၉၇၄ ခုနှစ်က စတင်လည်ပတ်ခဲ့ပြီး ၂၀၁၃ ခုနှစ်မှာစတင်ကာ ပန်ဒါကုမ္ပဏီကို စတင် ငှားရမ်းလွှဲပြောင်းခဲ့ပါတယ်။