ဝန်ထမ်းလေးဦးအား ပါးရိုက်ခဲ့သည့် လုံခြုံရေးအရာရှိကို အရေးယူပေးရန် တိုင်ကြား
DVB
·
July 14, 2018
မကွေးတိုင်းဒေသကြီး မန်းရေနံမြေမှာ ဝန်ထမ်း ၄ ဦးကို ပါးရိုက်ခဲ့တဲ့ လုံခြုံရေးအရာရှိကို အရေးယူပေးဖို့ နိုင်ငံတော်အတိုင်ပင်ခံ၊ သမ္မကြီးနဲ့ တိုင်းဒေသကြီးအစိုးရ ဝန်ကြီးဌာနနဲ့ ရေနံမြေတာဝန်ရှိသူတွေထံ မြန်မာနိုင်ငံလုံးဆိုင်ရာ ရေနံအလုပ်သမား သမဂ္ဂများအဖွဲ့ချုပ်က တိုင်ကြားစာ ပေးပို့လိုက်ကြောင်း အဖွဲ့အစည်းတာန်ရှိသူတဦးက ပြောပါတယ်။
ဒီနေ့ ရက်စွဲနဲ့ တိုင်ကြားစာပေါင်း ၁၅ စောင် ပေးပို့လိုက်ကြောင်း ရွှေရည်မြေလတ် ရေနံမြေ အလုပ်သမားအဖွဲ့အစည်း ဥက္ကဋ္ဌ ဦးလေးနိုင်က ပြောပါတယ်။
“အခုက တိုင်စာပို့ရတာ ဆိုဒ်က နှစ်ခုဗျ။ ရေနံနဲ့ပတ်သက်တဲ့ ဌာနတွေရယ်၊ အစိုးရဌာနတွေရယ် နှစ်ခုသွားနေရတယ်။ ဖြစ်စဉ်သဘောအရဆိုရင် ရေနံနဲ့သက်ဆိုင်တဲ့ ဝန်ကြီးဌာနကပဲ တိုင်ကြားဖြေရှင်းပေးသင့်တာ၊ အခုလိုရိုက်တဲ့ အရာရှိက စစ်တပ်ကနေ အရပ်ဘက်ပြောင်းလာတဲ့ အရာတန်းဖြစ်နေတာရယ်၊ ကျနော်တို့ ဝန်ကြီးဌာနတွေမှာ လက်ရှိ ဦးဆောင်ညွှန်ကြားရေးမှူးတို့ ညွှန်ကြားရေးမှူးတို့ကလည်း အခုလိုပဲ စစ်ဘက်ဆိုင်ရာကနေပဲ ပြောင်းလာတဲ့ လူတွေဖြစ်နေတာဆိုတော့ ထိရောက်တဲ့ အရေးယူမှု တကယ်ရှိပါမလားဆိုတာရယ်။ အခုကျူးလွန်တဲ့ အရာတန်း ဦးဝင်းနိုင်ချိုဟာလည်း ကျောက်ခွက်၊ လက်ပံတိုရေနံမြေမှာ တာဝန်ကျစဉ်က စာရေး ဝန်ထမ်းတယောက်ကို တကြိမ်၊ ထောက်ရှာပင် ရေနံမြေမှာလည်း ရေနံထုတ်လုပ်ရေး ဝန်ထမ်းတဦးကို တကြီမ် အခုလို ရိုက်ခဲ့တာတွေ ရှိနေတော့၊ ကျနော့်အတွေးအရ သူဟာ အရေးယူမခံခဲ့ရဘူးလား။ ဒီတခါကော အဲလိုထပ်ဖြစ်ဦးမှာလား၊ ထိရောက်တဲ့ အပြစ်ပေးခြင်းဖြစ်မှာလား ဆိုတာတွေကြောင့် နိုင်ငံတော်အတိုင်ပင်ခံနဲ့ သမ္မတတွေအထိပါ တိုင်ကြားရတဲ့ အခြေနေတွေ ဖြစ်လာတာပါ” လို့ ပြောပါတယ်။
မန်းရေနံမှ နစ်နာသူ ဝန်ထမ်းလေးဦး ရှိပေမယ့် နှစ်ဦးသာ တိုင်ကြားအကူညီ တောင်းခံရတာဟာ ကျန်နှစ်ဦးက ယာယီ နေ့စားဝန်ထမ်းတွေ ဖြစ်နေလို့ အကြောက်တရား စိုးရိမ်စိတ်တွေ ရှိနေလို့ မတိုင်ကြားတာလို့ ဆိုပါတယ်။
ဇွန်လ ၃ဝ ရက် ညက မန်းရေနံထုတ်လုပ်ရေးဌာနမှ ဝန်ထမ်း ၁ ဦးနဲ့ လုံခြုံရေးဌာန ဝန်ထမ်း ၃ ဦးတို့ကို မန်းရေနံမြေလုံခြုံရေးအရာရှိတဦးက ပါးရိုက်ခဲ့တဲ့အတွက် ဝန်ထမ်းတွေရဲ့ လူ့ဂုဏ်သိက္ခာကျဆင်းစေပြီး စိတ်ပိုင်းဆိုင်ရာ ထိခိုက်ခဲ့တာကြောင့် မန်းရေနံမြေ ဇူလိုင်က ကျင်းပတဲ့ မြန်မာနိုင်ငံလုံးဆိုင်ရာ ရေနံအလုပ်သမား သမဂ္ဂများအဖွဲ့ချုပ် အစည်းအဝေး ဆုံးဖြတ်ချက်အရ သမဂ္ဂအားလုံးက ကန့်ကွက်ရှုတ်ချကြောင်း ထုတ်ပြန်ချက်တွေကိုလည်း ဇူလိုင် ၉ ရက်နေ့က ရေနံမြေ သမဂ္ဂအဖွဲ့အစည်း အသီးသီးက ထုတ်ပြန်ခဲ့ပြီး ဖြစ်ပါတယ်။
ကိုလင်း(ချောက်)