ကာမိုင်း-ဖားကန့် ကားလမ်း ရေကျော်၊ ခရီးသည်တင်ကားများ သွားလာမှု ရပ်တန့်ထား
DVB
·
July 8, 2018
ကချင်ပြည်နယ် ကာမိုင်း-ဖားကန့်သွား ကားလမ်းရေကျော်တာ ပိုမိုဆိုးရွားလာနေတဲ့ အတွက် ခရီးသည်တင်ကားတွေကို သွားလာမှုရပ်တန့်ထားတယ်လို့ နိုင်ငံပိုင်သတင်းစာမှာ ဖော်ပြထားပါတယ်။
ဇူလိုင် ၇ ရက်နေ့ မနက် ၉ နာရီလောက်က ကာမိုင်း-ဖားကန့် ကားလမ်းမကြီးပေါ် ကာမိုင်းမြို့ မအူပင်ကျေးရွာကြား ၆ မိုင် ကားလမ်းပေါ်မှာ ၃ ပေကျော်လောက် ရေမြင့်တက် လာပြီး ကားလမ်းအရှည်ပေ ၁ ထောင် ကျော်လောက်ကို ရေလွှမ်းခဲ့တာပါ။
ကာမိုင်း-ဖားကန့် ကားလမ်းမပေါ်ကို ဇူလိုင် ၄ ရက်က စတင် ရေကျော်လာခဲ့ပြီး ရေစတင်ကျော်တဲ့နေ့က အနက် ၁ ပေလောက်နဲ့ ပေ ၂ဝဝ ကျော်ထိသာ ရေဖုံးလွှမ်းခဲ့ပါတယ်။
ကားလမ်းပေါ် ရေလွှမ်းမိုးနေတဲ့အတွက် ၆ ဘီးကားတစီး လမ်းမှားမောင်းမိကာ လမ်းချော်တိမ်းစောင်းသွားခဲ့ပါတယ်။
အခုကားလမ်းရေကျော်မှုမှာ အထက်ဘက်မိုးရွာသွန်းမှုမှ နန့်ကောင်းချောင်းရေ မြင့်တက်လာတာကြောင့်ဖြစ်ပြီး ကာမိုင်းမြို့မှာ ဇူလိုင် ၂ ရက်မှ ၇ ရက်နေ့အထိ မိုးသည်းထန်စွာရွာသွန်းမှုမရှိဘဲ ရေလျော့ကျနိုင်မယ့် အခြေအနေမရှိသေးဘူးလို့ ဒေသခံတွေက ပြောပါတယ်။
ကာမိုင်းဒေသခံ ဒေါ်ဝေဝေအောင်က “အခုတော့ ရေက ၆ လက်မကနေ ၁ ပေလောက်အထိ ကျသွားပြီ။ ကားလေးတွေကတော့ သွားလို့မလွယ်ဘူးပေါ့။ ထွန်စက်လိုကားကြီးတွေနဲ့ ဆွဲပြီးတော့ သွားနေရတယ်။ လဝါးနဲ့ ကာမိုင်းကြားက ကျွန်းတောဆိုတဲ့ နေရာမှာလည်း ကားလမ်းရေကျော်တာ ရှိတယ်။ သွားလို့တော့ ရပါတယ်” လို့ ဇူလိုင် ၈ ရက် နေ့လယ်မှာ ပြောပါတယ်။